ភ្នំពេញ៖ ​ក្រុមការងារគ្រូពេទ្យ នៃការិយាល័យសុខាភិបាល ​ស្រុកប្រតិបត្តិសែនសុខ (ហៅកាត់ OD សែនសុខ) ​បន្តយកវ៉ាក់សាំងបង្ការជំងឺកូវីដ-១៩ ​ចាក់វ៉ាក់សាំងជូនប្រជាពុទ្ធបរិស័ទដល់វត្តអារាម ក្នុងពិធីបុណ្យភ្ជុំបិណ្ឌ ​ដើម្បីបង្កើនភាពស៊ាំក្នុងសហគមន៍។

ជាក់ស្តែងនាព្រឹកថ្ងៃទី២១ ខែកញ្ញា ឆ្នាំ២០២២នេះ លោកវេជ្ជបណ្ឌិត រស់ ញឿន ប្រធានការិយាល័យ​សុខាភិបាល ស្រុកប្រតិបត្តិសែនសុខ (ហៅកាត់ OD សែនសុខ) ប្រាប់BTV ព័ត៌មានថា ដោយមាន​ការ​ចង្អុលបង្ហាញពីឯកឧត្តម វេជ្ជបណ្ឌិត ងី មានហេង ប្រធានមនី្ទរសុខាភិបាល​រាជធានីភ្នំពេញ ក៏ដូចជារដ្ឋបាលរាជធានីភ្នំពេញ​ បានអនុញ្ញាតឲ្យក្រុមការងារគ្រូពេទ្យនៃការិយាល័យសុខាភិបាល ស្រុក​ប្រតិបតិ្តសែនសុខ ចុះមករៀបចំចាក់វ៉ាក់សាំងបង្ការជំងឺកូវីដ១៩ ជូនបងប្អូនប្រជាពលរដ្ឋស្ថិត​នៅទីតាំងវត្តសែនសុខ ​ដែលជាពេលវេលាមួយ ប្រជាពុទ្ធបរិស័ទអញ្ជើញមកវត្តអារាម ប្រារព្ធ​ពិធីបុណ្យកាន់បិណ្ឌ និងភ្ជុំបិណ្ឌ ដែលធ្វើឲ្យប្រជាពុទ្ធបរិស័ទមកវត្តច្រើន ហើយក៏ជាឱកាស​មួយ​សម្រាប់ក្រុមគ្រូពេទ្យ ចំនួន០២ក្រុម ​ចាក់វ៉ាក់សាំងជូនប្រជាពុទ្ធបរិស័ទ ដែលខកខាន​មិនបាន​ចាក់វ៉ាក់សាំងកូវីដ-១៩ ជាពិសេសដូសជំរុញ ទី៣ ទី៤ និងទី៥ និងដូសមូលដ្ឋាន។

ជាមួយគ្នានោះដែរ ប្រជាពុទ្ធបរិស័ទបានមកធ្វើបុណ្យកាន់បិណ្ឌ១១ និងគណៈកម្មាការវត្ត បាន​បង្ហាញ​ពី​អារម្មណ៍សប្បាយរីករាយជាខ្លាំង​ ដោយក្រុមការងារគ្រូពេទ្យ យកចិត្តទុកដាក់​ចំពោះ​សុខុមាលភាព​ប្រជាពលរដ្ឋ ​បានចុះមកដល់វត្តសែនសុខ និងផ្តល់សេវាចាក់វ៉ាក់សាំងបង្ការជំងឺកូវីដ-១៩ ​ព្រមទាំងរាវរកប្រជាពលរដ្ឋ ​ពុទ្ធបរិស័ទ​ណាដែលមិនទាន់បានចាក់វ៉ាក់សាំងកូវីដ-១៩ អញ្ជើញមកចាក់វ៉ាក់សាំងឲ្យបានគ្រប់ៗគ្នា។

លោក រស់ ញឿន ​បានបញ្ជាក់ថា រដ្ឋបាលខណ្ឌសែនសុខ គឺមាន៧អង្គភាព សម្រាប់ផ្តល់សេវា​សុខាភិបាល​ទូទៅជូន​ប្រជាពលរដ្ឋរបស់យើង ​មិនមែនផ្តល់តែសេវាការងារចាក់វ៉ាក់សាំង​បង្ការ​ជំងឺកូវីដ-១៩នោះទេ​ ដូចជាមនី្ទរពេទ្យ គឺទទួលចាក់វ៉ាក់សាំង​ និងពិគ្រោះជំងឺផ្សេងៗ រួមទាំង​ទទួលឲ្យអ្នកជំងឺ ​ចូលមកសម្រាកព្យាបាលជាប្រចាំ​។ ចំណែកមណ្ឌលសុខភាព ក៏បានផ្តល់​សេវា​២៤ម៉ោង លើ២៤ម៉ោង គ្រប់អង្គភាពទាំង៧ ​ដែលចំណុះឲ្យការិយាល័យសុខាភិបាល ស្រុក​ប្រតិបត្តិសែនសុខ មិនគិតថាថ្ងៃ ​ឬយប់នោះទេ ​បងប្អូនត្រូវការសេវាពិនិត្យ ពិគ្រោះ ព្យាបាល ពេលណា ​សូមអញ្ជើញមកទទួលសេវា ​ដូចជាការសម្រាលកូន និងករណីផ្សេងៗ សូមអញ្ជើញ​មក​ទទួលសេវានៅមូលដ្ឋានសុខាភិបាលដែលនៅជិតផ្ទះរបស់បងប្អូនប្រជាពលរដ្ឋ៕

អត្ថបទ រដ្ឋា