កោះកុង ៖ តំណាងអយ្យការអមសាលាដំបូងខេត្តកោះកុង សហការជាមួយកងកម្លាំងនគរបាលខេត្ត និងក្រុងខេមរភូមិន្ទ ចុះត្រួតពិនិត្យជនអន្តោប្រវេសន៍ជាង៨០នាក់ដែលសង្ស័យប្រព្រឹត្តបទល្មើសល្បែងស៊ីសងតាមអនឡាញ នៅក្នុងផ្ទះសំណាក់ ថាន់ តាយ។

នេះជាប្រតិបត្តិការចុះពិនិត្យស្រាវជ្រាវលើកដំបូងហើយលើក្រុមជនអន្តោប្រវេសន៍ដែលចូលមកស្នាក់នៅក្នុងក្រុងខេមរភូមិន្ទ ខេត្តកោះកុង បន្ទាប់ពីមានការសង្ស័យពីសមត្ថកិច្ចជំនាញកាលពីថ្ងៃទី១៩ ខែកញ្ញា ថ្មីៗនេះ ដែលដឹកនាំដោយផ្ទាល់ពីឯកឧត្តម រស់ សារាំ ព្រះរាជអាជ្ញាអមសាលាដំបូងខេត្ត ព្រមទាំងកម្លាំងសមត្ថកិច្ចជំនាញចម្រុះ។

បើតាមការបញ្ជាក់បឋមរបស់លោក យស់ ចាន់វិចិត្រ អធិការនគរបាលក្រុងខេរមភូមិន្ទ បានឱ្យដឹងនៅរសៀលថ្ងៃទី២១ ខែកញ្ញា ថា ជនអន្តោប្រវេសន៍ដែលចូលមកស្នាក់នៅក្នុងផ្ទះសំំណាក់ ថាន់ តាយ មានគ្នាសរុប៨២នាក់ ស្រី២៨នាក់ ដោយពួកគេមានសញ្ជាត្តិចិន វៀតណាម និងឥណ្ឌនេស៊ី។តាមការសាកសួរព័ត៌មាន​ពួកគេធ្វើដំណើរដោយ​រថយន្តក្រុងមកពីខេត្តព្រះសីហនុ។ ព្រោះតែការសង្ស័យជាប់ពាក់ព័ន្ធនឹងបទល្មើសល្បែងស៊ីសងតាមអនឡាយ ទើបមានប្រតិបត្តិការទប់ស្កាត់បែបនេះ។

លោកអធិការនគរបាលក្រុងខេមរភូមិន្ទ បានបន្ថែមថា ក្នុងចំណោម៨៦នាក់ រកឃើញចំនួន៧នាក់ នាក់ ជាជនជាតិវៀតណាម និងឥណ្ឌនេស៊ី ដែលពុំមានលិខិតឆ្លងដែន និងឯកសារគ្រប់គ្រាន់ ហើយឃាត់ខ្លួន​បញ្ចូនទៅស្នងការដ្ឋានគរបាលខេត្តភ្លាមៗ ដើម្បីកសាងសំណុំរឿងបន្ត។

បញ្ហាបង្រ្កាបជនអន្តោប្រវេសន៍នេះដែរ ត្រូវបានឯកឧត្តម រស់ សារាំ ព្រះរាជអាជ្ញាខេត្តកោះកុង អះអាងថា តំណាងអយ្យការ​សាលាដំបូង កំពុងធ្វើការលម្អិតបន្ថែមទៀតលើករណីជនអន្តោប្រវេសន៍​ចូលស្នាក់នៅជាក្រុមៗមកមូលដ្ឋានខេត្តកោះកុង ដោយដាក់កម្លាំងសមត្ថកិច្ចជំនាញស្រាវជ្រាវ​៕ ​អត្តបទ​ ៖ ឈឹម មករា