ភ្នំពេញ៖ ដោយយោងតាមអនុសាសន៍ណែនាំ របស់សម្តេចនាយករដ្ឋមន្ត្រី ដែលបានដាក់ចេញនូវយុទ្ធនាការចាក់វ៉ាក់សាំងការពារជំងឺកូវីដ១៩ តាមរយៈគណៈកម្មការចំពោះកិច្ចចាក់វ៉ាក់សាំងជំងឺកូវីដ-១៩ ក្នុងក្របខណ្ឌទូទាំងប្រទេស មន្ត្រីរាជការក្រោមឱវាទនៃក្រសួងពាណិជ្ជកម្មចំនួនសរុប ១,៣៦៤នាក់ បានទទួលចាក់រួចរាល់ហើយនូវវ៉ាក់សាំងប្រភេទ ស៊ីណូវ៉ាក់។
ឯកឧត្ដម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម នៅក្នុងពិធីបិទយុទ្ធនាការចាក់វ៉ាក់សាំងការពារកូវីដ-១៩ កាលពីថ្ងៃទី០៦ មេសា ឆ្នាំ២០២១កន្លងទៅ បានបញ្ជាក់ថា វ៉ាក់សាំងនេះ ជាឧបករណ៍ថ្មីមួយបន្ថែមលើវិធានការសុខាភិបាលដែលមានស្រាប់ សម្រាប់ទប់ស្កាត់ការរីករាលដាល និងសង្គ្រោះជីវិតមនុស្សដែលជួយបុគ្គលមិនឱ្យឈឺធ្ងន់ធ្ងរនៅពេលឆ្លងជំងឺកូវីដ-១៩ និងកាត់បន្ថយការព្យាបាលនៅមន្ទីរពេទ្យ។ វ៉ាក់សាំងកូវីដ១៩ ដែលកំពុងប្រើប្រាស់នៅកម្ពុជា ជាវ៉ាក់សាំងដែលបានធ្វើតេស្តពីសុវត្ថិភាព និងប្រសិទ្ធភាពម៉ត់ចត់ និងកំពុងប្រើប្រាស់នៅតាមបណ្តាប្រទេសនានាក្នុងតំបន់ និងក្នុងពិភពលោក ដែលបណ្តាប្រទេសមួយចំនួនបាននិងកំពុងដំណើរការចាក់រាប់សិបលាននាក់ផងដែរ។
ក្នុងឱកាសនោះ ឯកឧត្តមរដ្ឋមន្ត្រី បានក្រើនរំលឹកដល់មន្ត្រីរាជការទាំងអស់ដែលបានទទួលវ៉ាក់សាំងរួចហើយ ត្រូវបន្តតាមដានពិនិត្យសុខភាព ត្រៀមលក្ខណៈដើម្បីចាក់លើកទី២ និងត្រូវបន្តអនុវត្តឱ្យបានត្រឹមត្រូវតាមអនុសាសន៍ណែនាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងវិធានការរបស់ក្រសួងសុខាភិបាល ក្នុងការការពារ ជាពិសេសត្រូវបន្តអនុវត្តនូវវិធានការ ៣កុំ ៣ការពារ ឲ្យបានល្អប្រសើរចៀសវាងពីការឆ្លងនៃជំងឺដ៏កាចសាហាវមួយនេះ។
សូមបញ្ជាក់ថា សម្តេចនាយករដ្ឋមន្ត្រីតេជោ ហ៊ុន សែន បានចាត់តាំងឲ្យគណៈកម្មការ ចំពោះកិច្ចចាក់វ៉ាក់សាំងកូវីដ-១៩ សហការជាមួយក្រសួង-ស្ថាប័ន អាជ្ញាធរដែនដីគ្រប់លំដាប់ថ្នាក់ ឲ្យបើកយុទ្ធនាការចាក់វ៉ាក់សាំង ជាលក្ខណៈទ្រុងទ្រោយធំទូទាំងប្រទេស ដោយពលរដ្ឋអាយុចាប់ពី ១៨ឆ្នាំឡើងទៅ ដែលស្ថិតក្នុងក្រុមអាទិភាព នៃការចាក់វ៉ាក់សាំងចូលរួមទទួលវ៉ាក់សាំង ដោយស្ម័គ្រចិត្ត ដើម្បីការពារខ្លួន និងក្រុមគ្រួសារកុំឲ្យឆ្លងកូវីដ១៩៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
