ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងនាមជាប្រធានប្ដូរវេន បានអញ្ជើញដឹកនាំកិច្ចប្រជុំថ្នាក់រដ្ឋមន្ត្រីអាស៊ានទទួល បន្ទុកឧក្រិដ្ឋកម្មឆ្លងដែន លើកទី១៦ និងកិច្ចប្រជុំពាក់ព័ន្ធ តាមរយៈប្រព័ន្ធវីដេអូ ពីទីស្ដីការក្រសួងមហាផ្ទៃនាព្រឹកថ្ងៃទី២១ ខែកញ្ញា ឆ្នាំ២០២២នេះ។
កិច្ចប្រជុំថ្នាក់រដ្ឋមន្ត្រីអាស៊ានទទួល បន្ទុកឧក្រិដ្ឋកម្មឆ្លងដែន លើកទី១៦ និងកិច្ចប្រជុំពាក់ព័ន្ធនាឱកាសនេះ មានការចូលរួមពីឯកឧត្តម រដ្ឋមន្ដ្រីប្រធានប្រតិភូទទួលបន្ទុកឧក្រិដ្ឋកម្មឆ្លងដែននៃបណ្ដាប្រទេសសមាជិកអាស៊ាន អគ្គលេខាធិការរងអាស៊ានទទួលបន្ទុកសហគមសន្ដិសុខ នយោបាយ និងភ្ញៀវកិត្តិយសជាច្រើនរូបទៀត។
សម្ដេចក្រឡាហោម បានលើកឡើងថា នៅមានកិច្ចការសំខាន់ៗជាអាទិភាពច្រើនទៀតដែលអាស៊ានត្រូវបន្ត ផ្តល់កិច្ចសហការ និងគាំទ្រគ្នាទៅវិញទៅមក ដូចជាគ្រោះមហន្តរាយធម្មជាតិ សង្គ្រាមប្រដាប់អាវុធ វិបត្តិថាម ពល ការប្រកួតប្រជែងភូមិសាស្ត្រនយោបាយ និងការគំរាមកំហែងដោយបទល្មើសមិនប្រពៃណី ដូចអំពើជួញដូរ អំពើឆបោកតាមប្រព័ន្ធបច្ចេកវិទ្យានិងទូរគមនាគមន៍ ការជួញដូរគ្រឿងញៀន និងការសម្អាតប្រាក់ជាដើម។
កិច្ចប្រជុំថ្នាក់រដ្ឋមន្ត្រីអាស៊ានទទួល បន្ទុកឧក្រិដ្ឋកម្មឆ្លងដែន លើកទី ១៦ និងកិច្ចប្រជុំពាក់ព័ន្ធនាឱកាសនេះ នឹងដើរតួជាវេទិកាដ៏មានសារៈសំខាន់ សម្រាប់ផ្លាស់ប្ដូរ និងចែករំលែកទៅវិញទៅមកនូវព័ត៌មាន ក៏ដូចជាបទពិសោធន៍ថ្មីៗក្នុងកិច្ចខិតខំប្រឹងប្រែងរួមគ្នា ដើម្បីបុព្វហេតុនៃសន្តិភាព សន្តិសុខ ស្ថិរភាព វិបុលភាព ភាពសុខដុមរមនា និងការអភិវឌ្ឍសម្រាប់តំបន់អាស៊ានទាំងមូល។
សូមបញ្ជាក់ថាកិច្ចប្រជុំដែលកម្ពុជាធ្វើជាម្ចាស់ផ្ទះនេះ នឹងបន្តធ្វើរហូតដល់ថ្ងៃទី២២ ខែកញ្ញា ឆ្នាំ២០២២ ដោយនៅព្រឹកថ្ងៃស្អែក នឹងបន្តអញ្ជើញដឹកនាំកិច្ចប្រជុំបូក៣ គឺអាស៊ានបូកចិន ជប៉ុន និងកូរ៉េខាងត្បូង ហើយនៅពេលល្ងាចសម្ដេចនឹងថ្លែងសុន្ទកថាបិទ ព្រមទាំងផ្ទេរតួនាប្រធានជូនរដ្ឋមន្ត្រីឥណ្ឌូនេស៊ី។ សេចក្ដីប្រកាសព័ត៌មានរួមមួយនឹងត្រូវបានធ្វើឡើងនៅក្រោយចប់កិច្ចប្រជុំ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
