​បាល់ទាត់៖ ​ខ្សែប្រយុទ្ធ​ក្រុម​បិសាច​ក្រហម Manchester United, Cristiano Ronaldo គ្មាន​គម្រោង​ចូលនិវត្តន៍​ពី​អាជីព​បាល់ទាត់​ឡើយ និង​មានបំណង​លេង​ដល់ Euro 2024​។

​​កីឡាករ​វ័យ ៣៧ឆ្នាំ​រូបនេះ​បានលើកឡើង​ អំឡុងពេល​ទទួលពាន​ពី​សហព័ន្ធ​បាល់ទាត់​ព័រទុយហ្កាល់​ ក្នុងនាម​ជា​កីឡាករ​ដែល​ស៊ុត​បញ្ចូល​ទី​ច្រើនជាងគេ​ឱ្យ​ក្រុម​ជំរើសជាតិ​កាលពី​ថ្ងៃ​អង្គា​រថា ដំណើរ​ជីវិត​បាល់ទាត់​របស់គេ​មិនទាន់​ដល់ទី​បញ្ចប់​ឡើយ ហើយ​វា​នឹង​នៅ​រយៈពេល​យូរអង្វែង​ទៀត ជាពិសេស​គឺ​ការ​ផ្តោតអារម្មណ៍ និង​មហិច្ឆតា​បាល់ទាត់​នៅ World Cup ឆ្នាំនេះ និង Euro 2024​។

​​Cristiano Ronaldo បាន​ស៊ុត​បញ្ចូល​ទី​ឱ្យ​ក្រុម​ជម្រើសជាតិ​ព័រទុយហ្កាល់​សរុប ១១៧គ្រាប់​ក្នុងការ​បង្ហាញខ្លួន ១៨៩ប្រកួត ខណៈ​ការលេង​នៅ World Cup 2022 ខាងមុខនេះនឹង​ជា​ព្រឹត្តិការណ៍​បាល់ទាត់​សំខាន់​ទី១០ ដែល​រូបគេ​បាន​ចូលរួម​នៅក្នុង​អាជីព​។ ​​កីឡាករ​វ័យ ៣៧ឆ្នាំ​រូបនេះ​បាន​បំបែក​កំណត់ត្រា​អ្នក​ស៊ុត​បញ្ចូល​ទី​ច្រើន​បំផុត ​នៅ​ក្រុម​ជម្រើសជាតិ​កាលពី​ខែកញ្ញា ឆ្នាំ ២០២១ ពេល​ជួប​ជាមួយ​សាធារណរដ្ឋ​អៀក​ឡង់ និង​បាន​បំបែក​កំណត់ត្រា​របស់​កីឡាករ​អ៊ីរ៉ង់ Ali Daei ដែលមាន​សរុប ១០៩គ្រាប់​៕

​អត្ថបទ​៖​នាង សុភា​វុ​ធ