ភ្នំពេញ៖ ក្នុងអំឡុងរយៈពេល១៥ថ្ងៃនេះ នៅតាមទីវត្តអារ៉ាមនានាទូទាំងប្រទេស បាននិងកំពុង​រៀបចំពិធីបុណ្យ​កាន់បិណ្ឌ និងភ្ជុំបិណ្ឌទៅតាមទំនៀមទំលាប់​ប្រពៃណីខ្មែរ​តាំងពីបុរាណ។ ក្នុងពិធីបុណ្យនេះ គេក៏សង្កេត​ឃើញ តាមវត្តអារ៉ាមមួយចំនួនដែលរៀបចំល្អ និងបានទាក់ទាញភ្ញៀវទេសចរ​អន្តរជាតិចូលទស្សនា ។

ភ្ញៀវទេសចរអន្តរជាតិ ដែលអញ្ជើញចូលទស្សនានៅវត្តនៅក្នុងរាជធានីភ្នំពេញ បានថ្លែង​ប្រាប់​BTVនៅថ្ងៃទី២២ ខែកញ្ញានេះថា ​ការអញ្ជើញមកទស្សនាកម្ពុជាក្នុងអំឡុងពេលនេះ គឺពួកគាត់​បានសិក្សាស្វែងយល់អំពីរបៀបនៃការ​ប្រារព្ធ​បុណ្យកាន់បិណ្ឌរបស់ពលរដ្ឋខ្មែរ ។

លោក វណ្ណ គន្ធុល ​មគ្គុទ្ទេសក៍​ទេសចរណ៍​ បានថ្លែងថា នៅក្នុងកញ្ចប់ទស្សនកិច្ចទេសចរណ៍ គឺបាន​ដាក់បញ្ចូលវត្តនៅភ្នំពេញ​ និងនៅតាមបណ្តាខេត្ត ដើម្បីនាំភ្ញៀវទេសចរអន្តរជាតិអញ្ជើញ​ទស្សនាការ​ធ្វើបុណ្យកាន់បិណ្ឌនៅកម្ពុជា ។

បើតាមវរៈគតិវិសាលវង្ស យាត តាត ព្រះលេខាគណគង់នៅវត្តឧណ្ណាលោមរាជធានីភ្នំពេញ ក្នុងរយៈពេលរៀបចំពិធីបុណ្យកាន់បិណ្ឌចំនួន១២ ថ្ងៃកន្លងមកនេះ​ វត្តឧណ្ណាលោម បានទទួល​ភ្ញៀវទេសចរអន្តរជាតិទស្សនាមើលរបៀបរៀបចំ ​និងមើល​រចនាបថ​សំណង់​អគារវត្តជាហូរហែរ ហើយខ្លះក៏បានចូលធ្វើបុណ្យជាមួយពលរដ្ឋខ្មែរផងដែរ។

យ៉ាងណាក៏ដោយ ព្រះតេជគណ ​បន្តថេរដីកាថា ​នៅក្នុងដំណើរការរៀបចំបុណ្យកាន់បិណ្ឌ និង​ភ្ជុំបិណ្ឌនេះ វត្តបានសហការជាមួយអាជ្ញាធរមូលដ្ឋានរៀបចំការពារសន្តិសុខ សណ្តាប់ធ្នាប់​ឲ្យបានល្អប្រសើរ ជាពិសេសគឺរៀបចំអភិវឌ្ឍន៍វត្តឲ្យបានស្អាត ​ដើម្បីឲ្យវត្តក្លាយជាវត្តទេសចរណ៍គំរូ និងទាក់ទាញភ្ញៀវទេសចរអន្តរជាតិ ​មកទស្សនាកម្ពុជាម្តងហើយ ​ចង់មកទស្សនាម្តងទៀត ជាពិសេស​មកទស្សនា និងស្របតាមការចង់បានរាជរដ្ឋាភិបាល៕អត្ថបទ ស៊ុម សុខជា