សៀមរាប៖ អ្នកទេសចរជាច្រើន បានចាប់អារម្មណ៍នាំគ្នាទៅមើលព្រឹត្ដិការណ៍​ថ្ងៃរះចំកណ្ដាល​កំពូលប្រាសាអង្គរ ឬហៅថាព្រឹត្ដិការណ៍សមរាត្រី ​ដែលសញ្ញានេះ ត្រូវបានមន្ត្រី​ទេសចរណ៍​ព្យាករណ៍​អំពី​កំណើន​ទេសចរនាចុង ​សប្ដាហ៍នេះ ​ដែលចំថ្ងៃភ្ជុំបិណ្ឌផងនោះ។

ព្រឹកនេះ អាកាសធាតុមានភាពអាប់អួរ ដែលបានធ្វើឱ្យអ្នកទេសចរខកបំណង ​មិនអាចមើលឃើញ ថ្ងៃរះចំណ្ដាលកំពូលប្រាសាទអង្គរវត្តនោះទេ ​ដែលក្នុងមួយឆ្នាំព្រឹត្តិការណ៍នេះ ​កើតឡើងពីរដងគឺ នៅថ្ងៃទី២២ ​ខែមីនា និងខែកញ្ញ។ ប៉ុន្ដែទោះជាយ៉ាងនេះក្ដី អ្នកទេសចរ ​នៅតែសប្បាយចិត្ដ ដែល​ពួកគេឆ្លៀតឱកាសនេះដើរទស្សនាប្រាសាទបុរាណខ្មែរតែម្ដង។

មន្ត្រីទេសចរណ៍ ​ក៏បានបង្ហាញពីក្ដីរំពឹងថា តំបន់ប្រាសាទអង្គរ ​នឹងទទួលបានទេសចរទៅទស្សនា កម្សាន្តច្រើន​ ដែលរាប់ចាប់តាំងពីថ្ងៃព្រឹត្តិការណ៍​សមរាត្រីនេះទៅ រហូតដល់ថ្ងៃសម្រាកបុណ្យ​ភ្ជុំបិណ្ឌ ដែលចំថ្ងៃចុងសប្ដាហ៍តែម្ដងនោះ។

លោក អ៊ឹម សុខរិទ្ធី បុរាណវិទូ និងជាប្រធាននាយកដ្ឋានស្រាវជ្រាវ បណ្តុះបណ្តាល​ និងផ្សព្វផ្សាយ នៃអាជ្ញាធរជាតិអប្សរា បានឱ្យដឹងថា​ ព្រឹត្តិការណ៍សមរាត្រីនាខែកញ្ញានេះ​ ត្រូវចំវេលា ដែល​ខ្មែរកំពុងបោះ បាយបិណ្ឌ ​ហើយគាប់ជួននឹងសេចក្តីមានចែងក្នុងសិលាចារឹកថ្នល់បារាយណ៍​ K279 នាចុងសតវត្សរ៍ទី៩ ​បាន​អនុញ្ញាត​ឲ្យបោះបាយបិណ្ឌនៅថ្ងៃសមរាត្រីដែរ៕អត្ថបទ៖ ឈិត សាវី