ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ នឹងដាក់ឲ្យប្រើប្រាស់នូវអត្ថប្រយោជន៍ដ៏សំខាន់​មួយទៀតគិតចាប់ពីខែតុលា ឆ្នាំ២០២២នេះតទៅ បន្ទាប់ពីរបបសន្តិសុខសង្គមផ្នែកហានិភ័យការងារ និងផ្នែកថែទាំសុខភាព​ គឺរបបសន្តិសុខសង្គមផ្នែកប្រាក់សោធន ​ខណៈយុទ្ធនារការ ​៩០ថ្ងៃ នៃការ​ចុះផ្សព្វផ្សាយរបបថ្មីនេះ ​នឹងត្រូវបិទបញ្ចប់នៅចុងខែកញ្ញានេះ។

នៅក្រោយបញ្ចប់កិច្ចចចារប្រាក់ឈ្នួលអប្បបរមាវិស័យឧស្សាហកម្មកាត់ដេរសម្រាប់ឆ្នាំ២០២៣ កាលពីព្រឹកថ្ងៃទី២១ កញ្ញា ឆ្នាំ២០២២កន្លងទៅ នៅទីស្តីការក្រសួង ឯកឧត្តម អ៊ិត សំហេង រដ្ឋមន្រ្តី​ក្រសួងការងារ និងបណ្តុះបណ្តាលវិជ្ជាជីវៈ ​បានមានប្រសាសន៍ថា ​តាមរយៈយុទ្ធនាការ ​ស្តីពីប្រាក់​សោធន ​ដែលក្រសួងបានទទួលនូវមតិយោបល់ ក៏ដូចជាការ​ឆ្លុះបញ្ចាំង​ពីការ​យល់​ឃើញ​របស់​កម្មករ​និយោជិត ​និងនិយោជក ឃើញថា ពួកគាត់អបអរសារទរ​ ហើយនឹងត្រៀមខ្លួនជាស្រេចក្នុង​ការ​ចូលរួមបង់ភាគទាន ដើម្បីទទួលបានអត្ថប្រយោជន៍ ​នៅពេលដែលឈានចូលវ័យជរា។

យោងតាមបេឡាជាតិរបបសន្តិសុខសង្គម ហៅកាត់​ ប.ស.ស. គិតចាប់ពីខែកក្កដា រហូតមកដល់​ពេលនេះ ក្រុមការងារបានចុះរផ្សព្វផ្សាយនៅតាមបណ្តាតំបន់សេដ្ឋកិច្ចពិសេស​ សួនឧស្សាហកម្ម រោងចក្រ ​សហគ្រាស គ្រឹះស្ថាន ទូទាំងរាជធានី ខេត្ត ចំនួនប្រមាណជាង ៣ពាន់លើក ដែលមាន​ការចូលរួម​ពីកម្មករនិយោជិតសរុបប្រមាណជាង ១,៤លាននាក់។

សូមបញ្ជាក់ថា ​ការបង់ភាគលើរបបនេះ ​សម្រាប់រយៈពេល៥ឆ្នាំដំបូង ​ត្រូវកំណត់ក្នុងអត្រាស្មើនឹង ៤ភាគរយ ​នៃប្រាក់ឈ្នួលជាប់ភាគទាន​ ក្នុងនោះ ២ភាគរយ ​ជាបន្ទុកនិយោជក និង២ភាគរយ ជាបន្ទុកកម្មករ​និយោជិត ហើយការបង់ភាគទានផ្នែកប្រាក់សោធនមួយនេះ ​ត្រូវធ្វើជាប្រចាំខែ៕

អត្ថបទ៖ ឈិត បូរ៉ាវី