ភ្នំពេញ៖ ឯកឧត្តមបណ្ឌិត ឈឹម ឃិនដារ៉េត អគ្គលេខាធិការ និងជាប្រធាន​ក្រុម​ប្រឹក្សា​បច្ចេក​ទេស​អាជ្ញាធរ​ជាតិ​ប្រយុទ្ធនឹងជំងឺអេដស៍ អះអាងថា នៅឆ្នាំ២០២១នេះ កម្ពុជាសម្រេចបាន ៨៤ % នៃ​អ្នក​ផ្ទុក​មេរោគអេដស៍ទាំងអស់បានដឹងពីស្ថានភាពរបស់ខ្លួន ក្នុងចំណោមអ្នក​ដែល​ដឹង​ថា​ខ្លួន​មាន​ផ្ទុក​មេរោ​គអេដស៍៩៩% បានធ្វើរោគវិនិច្ឆ័យ។

ការថ្លែងរបស់ឯកឧត្តមបណ្ឌិត ឈឹម ឃិនដារ៉េត យ៉ាងដូច្នេះ​ក្នុង​កិច្ច​ប្រជុំ​ក្រុម​ប្រឹក្សា​បច្ចេក​ទេស​អាជ្ញាធរ​ជាតិ​ប្រយុទ្ធ នឹងជំងឺអេដស៍លើកទី៩ តាមរយៈការចូលរួមផ្ទាល់ និងតាម​រយៈ​ប្រព័ន្ធ​អន​ឡាញ​ ដោយមានការចូលរួមពីសមាជិក សមាជិកាមន្ត្រីបច្ចេកទេសអន្តរក្រសួង ស្ថាប័ន រាជធានី ខេត្ត និងអង្គការដៃគូ។ ឯកឧត្តមបណ្ឌិត បានលើកឡើងទៀតថា សម្រាប់អ្នកទទួលការព្យាបាល បាន​៩៧% នៃអ្នកផ្ទុកមេរោគអេដស៍ ដែល​បាន​ទទួល​ការ​ព្យាបា​ល​មាន​អត្រា​មេរោគ​តិច​បំផុត​មិន​អាច​ជា​ការគម្រាមចំពោះសុខភាពរបស់អ្នកផ្ទុក។ ទន្ទឹមនឹង​នោះ​ក្រុម​ប្រឹក្សា​បច្ចេក​ទេស​មាន​តួនាទី​ជា​សេនាធិការបច្ចេកទេស ជូនអាជ្ញាធរជាតិប្រយុទ្ធនឹងជំងឺអេដស៍ ក្នុងការ​រៀប​ចំ​គោល​នយោបាយ​ជាតិ​ប្រយុទ្ធនឹង​ជំងឺ​អេដស៍​រៀប​ចំ​យុទ្ធសាស្ត្រ​​សម្រាប់​អនុវត្ត​គោល​នយោបាយ​ជាតិ​រៀប​ចំផែន​ការ​សកម្ម​ភាព​ជួយណែនាំការអនុវត្តគោលនយោបាយ ផែនការយុទ្ធសាស្ត្រ ផែនការសកម្មភាព ដើម្បី​ឆ្លើយ​តប​ដោយប្រសិទ្ធភាពទៅនឹងតម្រូវការនៃស្ថានភាពមេរោគអេដស៍។ រាជរដ្ឋាភិបាលកម្ពុជា បាន​ប្តេជ្ញាចិត្ត ដើម្បីសម្រេចបាននូវគោលដៅ៩៥-៩៥-៩៥ នៅឆ្នាំ ២០២៥។

ឯកឧត្តម អគ្គលេខាធិការ បានបង្ហាញថា ប្រទេសកម្ពុជាយើង នៅមាន​ឧបសគ្គ​ក្នុង​ការ​សម្រេច​ឱ្យ​បាន​នូវ​គោលដៅ៩៥. ទី១៖ ដែលនៅពេលនេះទើបទទួលបានត្រឹម៨៤ ភាគរយ​ដែល​នៅឆ្ងាយ​ពី​គោល​ដៅ​កំណត់ និងដែលទាមទារឱ្យយើងទាំងអស់គ្នាត្រូវបន្តរួមគ្នា រកវិធីសាស្ត្រ​ប្រក​ប​ដោយ​ប្រសិទ្ធ​ភាព​ផ្សេងៗទៀតដើម្បីសម្រេចគោលដៅនេះ។ កម្មវត្ថុនៃកិច្ចប្រជុំលើកទី៩នេះ គឺធ្វើការ​ពិនិត្យ ពិភាក្សាលើ “យុទ្ធវិធីជំរុញខ្លាំងក្លាការបង្ការ ថែទាំ និងព្យាបាលបន្តដល់ក្រុមប្រជាជនគន្លឹះ (Boosted Continuum of Prevention to Care and Treatment for Key Populations)”។ ក្រុមប្រជាជនគន្លឹះ ដែលជាក្រុមប្រឈមមុខខ្ពស់នឹងការឆ្លងមេរោគអេដស៍រួមមាន ក្រុម​បុរស​រួម​ភេទ​ជា​មួយបុរស (MSM) ក្រុមបំប្លែងភេទ (TG) ក្រុមស្ត្រីបម្រើក្នុងសេវាកំសាន្ត (FEW) និង​ក្រុម​ប្រើប្រាស់គ្រឿងញៀន (PWID) មានចំនួនកើនឡើង និង​មានអត្រាឆ្លងមេរោគអេដស៍ខ្ពស់។ ដោយ​ឡែកក្រុមយុវវ័យអាយុពី១៥-២៤ឆ្នាំ កំពុងមានអត្រាឆ្លងថ្មីខ្ពស់រហូតដល់៤១% នៅឆ្នាំ​២០២១ ដែលយើងកំពុងយកចិត្តទុកដាក់បំផុត ក្នុងការធ្វើអន្តរាគមន៍ ដើម្បី​កាត់​បន្ថ​យ​ការ​រាល​ដាល​។

ឯកឧត្តមបណ្ឌិតបានប្រសាសន៍បន្ថែមថាការងារប្រយុទ្ធនឹងមេរោគអេដស៍ និងជំងឺ​អេដស៍​នៅ​មាន​រយៈពេល​យូរទៅមុខទៀត ដែលតម្រូវឱ្យយើងបន្តធ្វើការួមគ្នា រវាងអ្នកធ្វើគោលនយោបាយ និង​យុទ្ធ​សាស្ត្រ អ្នកផ្តល់សេវា និងអ្នករងផលប៉ះពាល់។ ក្នុងឆ្នាំ២០២១នេះ ប្រទេសកម្ពុជា មាន​ចំនួន​អ្នក​ផ្ទុក​មេរោគអេដស៍ប្រមាណ ៧៤.០០០នាក់ អ្នកឆ្លងថ្មីមានចំនួនប្រមាណ១.១០០នាក់ អ្នក​ស្លាប់​ដោយ​សារជំងឺអេដស៍មានចំនួនប្រមាណ១.១០០នាក់ និងអត្រាប្រេវ៉ាឡង់ ក្នុង​ចំណោម​ប្រជាជន​ទូទៅ(អាយុពី១៥-៤៩ឆ្នាំ) មានប្រមាណ ០.៦% និងអ្នកបាន​ចូល​ក្នុង​ប្រព័ន្ធ​ទទួល​សេវា​ព្យាបាល ថែទាំដោយឱសថប្រឆាំងមេរោគអេដស៍ (ARV)ដែលផ្តល់ និងគ្រប់គ្រង​ដោយ​មជ្ឈ​មណ្ឌល​ជាតិប្រយុទ្ធ នឹងជំងឺអេដស៍ សើស្បែក និងកាមរោគ (NCHADS) មានចំនួន​ប្រមាណ​ ៦២.៨៣៨នាក់៕ រូបភាព/អត្ថបទ៖ រដ្ឋា