ភ្នំពេញ៖ លោក ឃ្លាំង ហួត អភិបាលរង​រាជ​ធានី​ភ្នំពេញ​បាន​ធ្វើពិធី​ប្រគល់​ម៉ូតូ​ជូន​ជន​រង​គ្រោះ​ចំនួន ០៨គ្រឿង នៅព្រឹកថ្ងៃទី២៣ ខែកញ្ញា ឆ្នាំ២០២២ នេះនៅទីតាំងឃ្លាំងស្តុកម៉ូតូ នៅOCIC ដែលបានដកហូតម៉ូតូពីទីតាំងហាងបញ្ចាំនៅឃ្លាំងរំសេវរយៈពេល៤ថ្ងៃកន្លងមកនេះបានជាង១០០០គ្រឿង។

ក្នុង​ឱកាសប្រគល់ម៉ូតូជូនជនរងគ្រោះនេះផងដែរ លោក ឃ្លាំង ហួត អភិល​រង​រាជ​ធានី​ភ្នំពេញ​លើក​ឡើង​ថា នេះជាជនរងគ្រោះចំនួន០៨ ក្នុងចំណោមជនរងគ្រោះជាច្រើននាក់ទៀត ដូច្នេះ លោក​បាន ជំរុញឲ្យអាជ្ញាធរជំនាញពាក់ព័ន្ធឲ្យពន្លឿនការធ្វើឯកសារ ដើម្បី​ប្រគល់​ជូន​ម៉ូតូ​ដល់​ជន​រង​គ្រោះ​ណា​ដែលផ្ទៀងផ្ទាត់ឃើញម៉ូតូខ្លួន ដើម្បីបានធ្វើជាមធ្យោបាយធ្វើដំណើរ ប្រកបមុខ​របរ​របស់​ខ្លួន​វិញ។

ក្នុងនោះដែរប្រជាពលរដ្ឋដែលជាជនរងគ្រោះបានមកទទួលម៉ូតូរបស់ខ្លួនវិញនោះមានសេចក្ដីរំភើប​រីករាយយ៉ាងខ្លាំងដែលម៉ូតូរបស់ខ្លួនបានបាត់ជាច្រើនឆ្នាំផងដែរហើយបានរកឃើញវិញនោះ និង​បាន​ថ្លែង​អំណរអរគុណដល់អាជ្ញាធរគ្រប់ជាន់ថ្នាក់ ទាំងអស់។

គួរជម្រាបថា ក្នុងប្រតិបត្តិការប៉ុន្មានថ្ងៃមកនេះ កម្លាំងសមត្ថកិច្ចបានរកឃើញម៉ូតូប្រមាណ​ជាង​១,០០០​គ្រឿង​ ដែលបញ្ចាំដោយគ្មានឯកសារត្រឹមត្រូវ ហើយត្រូវបានយក​ទៅ​រក្សា​ទុក​បណ្ដោះ​អាសន្ន ដើម្បីផ្សព្វផ្សាយស្វែងរកម្ចាស់ ។

គួរបញ្ជាក់​ផង​ដែរកាលពីថ្ងៃទី១៩ ខែកញ្ញា ឆ្នាំ កន្លងមក នេះលោក ឃ្លាំង ហួតអភិបាលរង​រាជធានី​ភ្នំពេញបានដឹកនាំកម្លាំងចម្រុះនៃអធិការដ្ឋាននគរបាលខណ្ឌទួលគោក និងដឹកនាំ​ផ្ទាល់​ដោយ លឹម ប៊ុនហេង ព្រះរាជ​អាជ្ញារង​នៃ​អយ្យកាអម​សាលា​ដំបូង​រាជ​ធានី​ភ្នំពេញ​បាន​ចុះ​ត្រួត​ពិនិត្យ​ឃ្លាំងបញ្ចាំនៅតំបន់ឃ្លាំងរំសេវ បន្ទាប់ពីមានបទបញ្ជាពី ឯកឧត្តម ឃួង ស្រេង អភិបាល​រាជ​ធានី​ភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ ដោយ​អនុវត្ត​តាម​អនុសាសន៍​ដ៏​ម៉ឺងម៉ាត់​របស់​សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ពាក់ព័ន្ធការ​បង្ក្រាប​បទ​ល្មើស​ល្បែង​​ស៊ីសង​ខុសច្បាប់។លោក ឃ្លាំង ហួត អភិបាលរងរាជធានីភ្នំពេញបានបញ្ជាក់ប្រាប់ឲ្យដឹងថា ទីតាំ​ង​ឃ្លាំងបញ្ចាំ ស្ថិតនៅភូមិ៣ មូលដ្ឋានសង្កាត់ទឹកល្អក់ទី៣ មានចំនួន ៦០ ទីតាំង ក្នុ​ង​នោះ​មាន​ទីតាំងខ្លះមានអាជ្ញាប័ណ្ណនិងទីតាំងខ្លះមិនមានអាជ្ញាប័នឡើយ។ អភិបាលរងបានបន្តទៀតថា មាន​អាជ្ញាប័ណ្ណឬមិនមានអាជ្ញាប័ណ្ណជារឿងមួយ តែដោយឡែក​ទីតាំង​ដែល​មាន​អាជ្ញា​ប័ណ្ណ​ត្រឹមត្រូវ​សូម​ប្រកបអាជីវកម្មស្របច្បាប់កុំប្រព្រឹត្តបទល្មើស ក្រោមអាជ្ញាប័ណ្ណស្របច្បាប់ ដោយ​ទទួល​បញ្ចាំ​ម៉ូតូខុសប្រក្រតី បើពុំដូចនេះទេនិងចាត់វិធានការច្បាប់៕