ព្រះវិហារ៖ ឯកឧត្តម នាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជនកម្ពុជា ថ្លែងថា រាជរដ្ឋាភិបាល តាមរយៈសមាគម​អតីតយុទ្ធជន​កម្ពុជា​នឹង​បន្ត​លើក​កម្ពស់​ជីវភាព​រស់​នៅ​របស់​អតីតយុទ្ធជនគ្រប់រូបឱ្យកាន់តែល្អប្រសើរ។

ការថ្លែងយ៉ាងដូច្នេះធ្វើឡើងនៅថ្ងៃទី២៣ ខែកញ្ញា ឆ្នាំ២០២២ ក្នុងឱកាសឯកឧត្តម នាយ​ឧត្តម​សេនីយ៍ គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា អញ្ជើញ​ក្នុង​ពិធី​ប្រកាស​តែងតែងឯកឧត្តម គីម រិទ្ធី អភិបាលខេត្តព្រះវិហារ ជាប្រធានកិត្តិយស​សមាគម​អតីត​យុទ្ធ​ជន​ខេត្ត និងជួបសំណេះសំណាល រួមទាំងចែក​អំណោយ​ជូន​អតីត​យុទ្ធជន​ប្រមាណ​២០០​នាក់​។

នាឱកាសនោះ នាយឧត្តមសេនីយ៍ គន់ គីម បានពាំនាំនូវសេចក្តីនឹករឭក និងការ​សាកសួរ​សុខ​ទុក្ខ​ ពីសម្ដេចតេជោហ៊ុនសែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ដែល​តែង​តែ​យក​ចិត្ត​ទុកដាក់ និងនឹករលឹកមកដល់អតីតយុទ្ធជនគ្រប់រូប គ្រប់ពេលវេលា ទោះ​បី​ស្ថិត​ក្នុង​កាលៈទេសៈ​ណាក៏ដោយ។

នាយឧត្តមសេនីយ៍ គន់ គីម មានប្រសាសន៍ថា រាជរដ្ឋាភិបាល​តាម​រយៈ​សមាគម​អតីត​យុទ្ធជន​កម្ពុជា ពិសេសថ្នាក់ដឹកនាំសមាគមគ្រប់ថ្នាក់ ត្រូវបន្តការចុះសួរសុខទុក្ខអតីតយុទ្ធជន ដើម្បី​ស្វែង​យល់​ពី​ស្ថានភាពជីវភាព ដោយបន្ត​លើក​កម្ពស់​ជីវភាព​រស់​នៅ​របស់​អតីត​យុទ្ធជន​គ្រប់​រូប​ឱ្យ​កាន់​តែ​ល្អប្រ​សើរ និងត្រូវមានវិធានការជួយពួកគាត់ពេលមានបញ្ហាឱ្យទាន់ពេលវេលា។

ជាក់ស្តែង ដើមឆ្នាំ២០២២នេះ រាជរដ្ឋាភិបាល បានតម្លើង​ប្រាក់បៀរវត្សន៍ ជាបន្តបន្ទាប់។

នាយ​ឧត្តមសេនីយ៍ គន់ គីម គូសបញ្ជាក់ទៀតថា ដើម្បីឆ្លើយតបទៅនឹងការលំបាក និងលើក​ស្ទួយ​ជីវភាព​របស់​អតីតយុទ្ធជន ជារៀងរាល់ឆ្នាំ សម្តេចតេជោ ហ៊ុន សែន នាយករដ្ឋមន្រ្តី និងជា​ប្រធាន​សមាគមអតីតយុទ្ធជនកម្ពុជា បានណែនាំឱ្យបន្តសកម្មភាពដំណើរការសាងសង់ផ្ទះ និង​រៀប​ចំ​ដីសម្បទានសង្គមកិច្ចសម្រាប់ចែកជូនអតីតយុទ្ធជនក្រីក្រជាបន្តបន្ទាប់ ខណៈ​នា​ពាក់​កណ្តាល​ឆ្នាំ​នេះ សមាគម​អតីត​យុទ្ធ​ជន​កម្ពុជា​បាន​ខិតខំ​បញ្ចប់​គម្រោង​សាង​សង់​ផ្ទះ​ចំនួ​ន​៤០០​ខ្នង​បន្ថែម​ទៀតដល់អតីតយុទ្ធជនមុនបំណាច់ឆ្នាំ២០២២។

នាយឧត្តមសេនីយ៍ គន់ គីម មានប្រសាសន៍ថា អ្វីៗដែល​សមាជិក​អតីត​យុទ្ធជន​កម្ពុជា​ទទួល​បាន​ដូច​សព្វ​ថ្ងៃ​នេះ គឺដោយសារកម្ពុជាមានសន្តិភាពក្រោមការដឹកនាំ និងដឹងគុណ​ចំពោះ​សម្តេច​តេជោ ហ៊ុន សែន ដែលជាស្ថាបនិកសន្តិភាព។

ទន្ទឹមគ្នានេះ នាយឧត្តមសេនីយ៍ គន់ គីម ក៏បានជំរុ​ញ​ឱ្យ​ថ្នាក់​ដឹកនាំ​សមាគម​គ្រប់​ថ្នាក់​ត្រូវ​បន្ត​យក​ចិត្ត​ទុក​ដាក់ដល់អតីតយុទ្ធជនដែលកំពុងរស់នៅតាមឃុំសង្កាត់ ដោយត្រូវ​បែង​ចែក​ភារកិច្ច​គ្នា​ចុះ​ជួ​ប​​សំណេះ​សំណាល ផ្សារភ្ជាប់ទំនាក់ទំនងឱ្យកាន់តែជិតស្និទ្ធជាមួយបងប្អូនតាមគ្រួសារ តាម​ខ្នង​ផ្ទះ​នីមួយៗ៕ អត្ថបទ៖ សេក ឧត្តម