ភ្នំពេញ៖ ប្រជាពលរដ្ឋរហូតដល់ប្រមាណជិត ៩០០នាក់ បានធ្វើដំណើរតាមររថភ្លើង ចាកចេញ​ពី​រាជធានីភ្នំពេញ ទៅតាមបណ្តាខេត្ត នៅថ្ងៃសុក្រនេះ ដោយក្រុមហ៊ុនរថភ្លើងអនុញ្ញាត​ឱ្យ​ជិះមិន​គិតថ្លៃ។

នៅថ្ងៃដំបូងនៃការអនុញ្ញាត​ជិះមិនគិតថ្លៃនេះ មានប្រជាពលរដ្ឋរហូតដល់ជិត ៩០០នាក់ បាន​ចាក​ចេញពីរាជធានីភ្នំពេញ។ ការធ្វើដំណើរតាមរថភ្លើងនៅថ្ងៃនេះ គឺដំណើរការតែមួយ​ខ្សែតែប៉ុណ្ណោះ​ គឺសម្រាប់ខ្សែដំណើរឆ្ពោះទៅ ​ខេត្តតាកែវ កំពត​ និងខេត្តព្រះសីហនុ។

ចំពោះខ្សែដំណើរឆ្ពោះទៅខេត្ត ពោធិ៍សាត់ បាត់ដំបង ​ត្រូវបានអាក់ខាន​ ដោយសារបញ្ហាទឹកជំនន់។ ទោះមានភាពអាក់ខាន ខ្សែរថភ្លើងឆ្ពោះទៅខេត្តពោធិ៍សាត់ បាត់ដំបងក្ដី ក្រុមហ៊ុន Royal Railway បាន​សម្រេច​ប្រើប្រាស់រថយន្តក្រុង ដើម្បីដឹកប្រជាពលរដ្ឋទៅទិសដៅទាំងពីរដោយ​មិនគិត​ថ្លៃជំនួសវិញ។

កញ្ញា សក់ វណ្ណនី ប្រធានគ្រប់គ្រងខ្សែអ្នកដំណើររបស់ក្រុមហ៊ុន Royal Railway Plc. បានបង្ហាញ​ភាព​សប្បាយចិត្តដែលបានចូលរួម​ជាមួយរាជរដ្ឋាភិបាលក្នុងការសម្រួល​ដល់ការ​ចាកចេញ​របស់​ប្រជាពលរដ្ឋ។ កញ្ញា បញ្ជាក់ថា ការធ្វើដំណើរតាមរថភ្លើងសព្វថ្ងៃ ​គឺមានភាពងាយស្រួល និងមិន​ចំណាយពេលវេលាច្រើនដូចមុននោះទេ។

ក្នុងពិធីបុណ្យភ្ជុំបិណ្ឌនេះ ​ប្រជាពលរដ្ឋដែលខ្លះចាកចេញទៅស្រុក កំណើត ខ្លះចាកចេញដើម្បី​ដើរ​កំសាន្ត បង្ហាញនូវភាពសប្បាយរីករាយជាខ្លាំង។ ​ភាពរីករាយដោយពួកគាត់ មើលឃើញ មាន​ការរៀបចំ​ជាធម្មតាតាមប្រពៃណី ការដើរកំសាន្តដោយសេរី ​ខណៈការឆ្លងកូវីដ-១៩ មាន​កម្រិតទាប។ ពួកគាត់ពិតជាអរគុណដែលរាជរដ្ឋាភិបាលកម្ពុជា ស្វះស្វែងរកវ៉ាក់សាំងចាក់​ជូន​ប្រជាពលរដ្ឋគ្រប់រូប។

ជាការសម្រួលដល់ប្រជាពលរដ្ឋ ក្នុងការចាកចេញពីរាជធានីភ្នំពេញ ទៅតាមបណ្ដាខេត្ត រាជ​រដ្ឋាភិបាល​បាន​បញ្ចេញរថយន្តក្រុងចំនួន ១៧៥ ​គ្រឿង​សម្រាប់ដឹកប្រជាពលរដ្ឋដោយមិនគិតថ្លៃ ក្នុងរយៈពេល ៥ថ្ងៃ។ រីឯក្រុមហ៊ុន Royal Railway ក៏បានអនុញ្ញាតឱ្យពលរដ្ឋធ្វើដំណើរតាមរថភ្លើង​ដោយមិនគិតថ្លៃ រយៈពេល ៤ថ្ងៃផងដែរ ៕អត្ថបទ៖ គឹមហុក