ឧត្តរមានជ័យ៖ ស្របពេលតាមបណ្តាខេត្តមួយចំនួនរងផលប៉ះពាល់ដោយសារជំនន់ទឹកភ្លៀង ក្នុងនោះមានខេត្តពីរដែលមាន​ប្រជាជន​ប្រមាណ៥០០គ្រួសារ​ត្រូច​បានជម្លៀសពីលំនៅដ្ឋាន។បន្ទាប់ពីធ្វេីដំណេីរចុះពិនិត្យទឹកជំនន់ក្នុងខេត្តបី រួមមាន សៀមរាប ឧត្តរមានជ័យ និងបន្ទាយមានជ័យ ​ឯកឧត្តមទេសរដ្ឋមន្រ្តី គន់ គីម ​អនុប្រធានទី១នៃគណ:កម្មាធិការជាតិគ្រប់គ្រងគ្រោះមហន្តរាយ​ នៅថ្ងៃទី២៣ ខែកញ្ញា ឆ្នាំ២០២២ ​បានឱ្យដឹងថា​ បន្ទាប់ពីការព្យាករណ៍​របស់ក្រសួងធនធានទឹក និងឧតុនិយមឃេីញថា ​មានខេត្ត៥ បានរងផលប៉ះពាល់ដោយជំនន់ទឹកភ្លៀង​ រួមមាន កំពង់ធំ ព្រះវិហារ ​សៀមរាប​ ឧត្តរមានជ័យ និងបន្ទាយមានជ័យ។ ឯកឧត្តមទេសរដ្ឋមន្រ្តី បន្តថា ក្នុងចំណោមខេត្តទាំង៥ឃេីញថា ស្ថានភាព​ចំពោះ​ខេត្តកំពង់ធំ និងព្រះវិហារ ទឹកបានថមថយ និងហូរចូលបឹងទន្លេសាប​ជាបន្តបន្ទាប់ ប៉ុន្តែខេត្ត៣ទៀត បានរងផលប៉ះពាល់​ដល់ហេដ្ឋារចនាសម្ព័ន្ធ ​និងលំនៅដ្ឋានប្រជាពលរដ្ឋ។

ឯកឧត្តមទេសរដ្ឋមន្រ្តី មានប្រសាសន៍ថា ក្នុងនាមសេនាធិការរបស់សម្តេចតេជោ ហ៊ុន សែន នាយករដ្ឋមន្រ្តី និងជាប្រធានគណ:កម្មាធិការជាតិ​គ្រប់គ្រង​គ្រោះមហន្តរាយ បានដឹកនាំមន្រ្តីជំនាញចុះពិនិត្យដោយផ្ទាល់អំពីការលំបាកការខូចខាត ឬការជម្លៀសប្រជាជនទៅទីទួលសុវត្ថិភាព។ ជាក់ស្តែង ការជម្លៀសប្រជាជនមានតែពីរខេត្តប៉ុណ្ណោះ គឺឧត្តរមានជ័យ និងបន្ទាយមានជ័យ ដោយក្នុងចំណោមខេត្តនីមួយៗបានជម្លៀស​ប្រជាជនប្រមាណជាង២០០គ្រួសារ។

ឯកឧត្តម ទេសរដ្ឋមន្រ្តី គន់ គីម សូមអំពាវនាវដល់បងប្អូនប្រជាជនតាមខេត្តដែលបានចុះពិនិត្យ ត្រូវយកចិត្តទុក​ដាក់ តាមដាន និងប្រុងប្រយ័ត្ន​ជាប់ជាប្រចាំ ជាពិសេសសូមស្នេីមន្ទីរធនធានទឹក ត្រូវជូនដំណឹងជាបន្ទាន់​ដល់ប្រជាជនមុនបេីលទ្វារ​ទឹករបស់ខ្លួនដោយសារបញ្ហានេះ​​អាច​បង្កអោយ​លិចលង់ក្នុងរយ:ពេលខ្លីបំផុត។

ឯកឧត្តមទេសរដ្ឋមន្រ្តី បន្ថែមថា ទោះបីស្ថិតក្នុងកាល:ទេស:មិនប្រឈមធ្ងន់ធ្ងរក្តី ប៉ុន្តែគណ:កម្មាធិការជាតិគ្រប់គ្រង​គ្រោះមហន្តរាយ បានត្រៀមរួចរាល់ ជាមួយបណ្តាកងឯកភាពរុករក និងសង្គ្រោះមហន្តរាយសរុបទាំង១៦កង ដើម្បីឆ្លើយតបចំពោះហេតុការណ៍​ដែលអាចកើតឡើងជាយថាហេតុ ពិសេសគឺជំនន់ទឹកភ្លៀងដែលកម្ពុជាតែងតែប្រឈមជារៀងរាល់ឆ្នាំ។

បន្ថែមលេីសពីនេះ ឯកឧត្តមទេសរដ្ឋមន្រ្តី បានណែនាំដល់លេខាធិការដ្ឋានគ្រប់គ្រងគ្រោះមហន្តរាយរាជធានី-ខេត្តទាំងអស់ មេត្តាយកចិត្តទុកដាក់ខ្ពស់ដើម្បីតាមដានសភាពការណ៍នេះ និងត្រូវរាយការណ៍ជាបន្ទាន់ទៅកងអន្តរាគមន៍សង្គ្រោះគ្រោះមហន្តរាយ​ក្នុងករណីការអន្តរាគមន៍លើសពីសមត្ថភាព របស់ខ្លួន ដើម្បីធានាការជួយសង្គ្រោះជូនប្រជាពលរដ្ឋបានទាន់ពេលវេលា៕

អត្ថបទ សេក ឧត្តម