ភ្ញៀវទេសចរបានសម្ដែងការសប្បាយរីករាយក្នុងការដើរកំសាន្ដនៅរមណីយដ្ឋានអង្គរ នា​ពិធី​បុណ្យ​ភ្ជុំ​ឆ្នាំ​២០២២ បន្ទាប់ពីខកខានចំនួនពីរឆ្នាំកន្លងមក ដោយ​សារ​ការ​រីក​រាល​ដាល ​នៃ​ជំងឺ​កូវីដ-១៩។ ដំណើរ​កំសាន្ដបានសប្បាយនាឆ្នាំនេះ បង្ហាញថា រាជរដ្ឋាភិបាល​បាន​យក​ចិត្ដ​ទុក​ដាក់​ខ្ពស់​ចំពោះ​ផ្លូវ​ថ្នល់ ព្រោះពីមួយឆ្នាំទៅមួយឆ្នាំ ពួកគេងាយស្រួលធ្វើដំណើរទេសចរណ៍។

ភ្ញៀវទេសចរបានលើកឡើងដូចគ្នាថា ពួកគាត់ដើរកំសាន្ដជាច្រើនកន្លែង ជាពិសេស​នៅ​ប្រាសាទ​អង្គរ មានការជួយសម្រួលសណ្ដាប់ធ្នាប់ល្អពីមន្ដ្រីសន្ដាប់ធ្នាប់អាជ្ញាធរជាតិអប្សរា ខណៈ​ដែល​អ្នក​ដំណើរ​កំសាន្ដ​នៅ​ប្រាសាទ​អង្គរវត្ដនាឆ្នាំនេះកើនឡើងគួរឱ្យកត់សំគាល់។ ពួកគាត់បន្ដថា ការ​កំសាន្ដ​នៅ​ខេត្ដសៀមរាប មានកន្លែងទស្សនាច្រើន ដែលរំពឹងថា ប្រជាពលរដ្ឋនៅមូលដ្ឋាន ទទួល​បាន​ចំណូល​ច្រើន​ពី​វិស័យ​ទេសចរណ៍​នេះ​។​ ភ្ញៀវទេសចរ​ដែល​ដើរ​ទៅ​ទស្សនា​ច្រើន​នៅ​ខេត្ដ​សៀមរាប ដោយសារប្រទេសជាតិមានសន្ដិភាព និងមានការអភិវឌ្ឍ ទើប​ធ្វើ​ឱ្យ​មាន​កំណើន​នូវ​វិស័យ​ទេសចរណ៍នេះ។

យោងតាមរបាយការណ៍របស់នាយកដ្ឋាន ទេសចរណ៍ វប្បធម៌ នៃអាជ្ញាធរជាតិអប្សរា បាន​បង្ហាញ​ថា ភ្ញៀវទេសចរជាតិ និងអន្ដរជាតិ ទៅទស្សនារមណីយដ្ឋានអង្គរ មានចំនួនប្រមាណ៧៤ ៦៨០​នាក់ នាពិធីបុណ្យភ្ជុំបិណ្ឌប្រពៃណីខ្មែរ ក្នុងរយៈពេល២ថ្ងៃនេះ ចាប់​ពី​ថ្ងៃ​ទី​២៤​ដល់​ថ្ងៃ​ទី​២៥​ខែ​កញ្ញា​ឆ្នាំ២០២២នេះ។ របាយការណ៍បន្ថែមថា មានភ្ញៀវទេសចរជាតិចំនួន៧១ ៩៩៣នាក់ ភ្ញៀវទេសចរ​​​អន្ដរជាតិទិញសំបុត្រចូលទស្សនាអង្គរ មានចំនួន ២ ៦៨៧នាក់។ លំហូរ​ទេសចរ​ចូល​ទស្សនា​ប្រាសាទ​អង្គរនេះ បានបង្ហាញថា វិស័យទេសចរណ៍បានងើបឡើងវិញ បន្ទាប់​ពី​អាក់​ខាន​ពីរ​ឆ្នាំ​កន្លងមក ដោយសារជំងឺកូវីដ១៩៕