កំពង់ឆ្នាំង៖ ដំណើរការប្រណាំងទូកងចំនួន៧គូនៅវត្តកោះថ្កូវ ឃុំកោះថ្កូវ ស្រុកកំពង់លែង ខេត្តកំពង់ឆ្នាំង នារសៀលថ្ងៃទី២៦ ខែកញ្ញា ឆ្នាំ២០២២នេះ បានផ្អាក​កម្ម​វិធី​ទៅ​វិញ​ដោយសារ​មេឃ​មាន​ខ្យល់ និងភ្លៀងខ្លាំង នាំអោយ​គណៈកម្មាធិការ​មិន​អាច​បន្ត​ការ​ប្រណាំង​នេះ​តទៅ​ទៀត​បាន ខ្លាចគ្រោះថ្នាក់ដល់ក្រុមកីឡាករ។

លោក ដូវ គឹមស៊ីន អភិបាលស្រុកជលគិរីបានអោយដឹងថា ដើម្បី​ធ្វើ​អោយ​ប្រជាពលរដ្ឋ​ចូល​រួម​លេង​កំសាន្តនៅតាមភូមិឃុំស្រុក យើងបានបង្កើត​អោយ​មាន​ការ​ប្រណាំង​ទូក​ង​បែប​នេះជា​រៀង​រាល់ឆ្នាំ និងដំណើរការទៅដោយរលូន ។ ការប្រណាំងទូកងនៅឃុំកោះថ្កូវនេះមានទាំងអស់៥គូ មាន​ទាំងទូកចែវ និងទូកអុំ ដែលមានកីឡាករកីឡាការនីចូលរួមប្រកួតជិត៥០០នាក់ មកពី​ស្រុក​ជលគិរី ក្រុងកំពង់ឆ្នាំង ស្រុករលាប្អៀរ និងស្រុកកំពង់លែង ។ ការ​ប្រណាំង​បាន​ចាប់​ផ្តើម​នៅ​វេលា​ម៉ោង​២​និង៣០នាទីរសៀលថ្ងៃនេះ ក៏ប៉ុន្តែដោយសារកត្តាអាកាសធាតុមិនល្អ គណកម្មាធិការ​ប្រណាំង​ទូកង ក៏សម្រេចចិត្តផ្អាកការប្រណាំងទូកតែម្តងទៅ ដោយសារខ្លាច​ប៉ះពាល់​ដល់​សុខ​សុវត្ថិភាព​របស់កីឡាករកីឡាការនីក្នុងពេលប្រណាំង។

ប្រជាពលរដ្ឋក៏បានសំដែងនូវទឹកចិត្តសប្បាយរីករាយផងដែរ ក្រោយ​គណៈកម្មាធិការ​ប្រណាំង​ទូក​សម្រេច​ចិត្ត​បានល្អបែបនេះ ព្រោះឆ្នាំនេះទឹកទន្លេឡើងធំជាងឆ្នាំកន្លងទៅ ប្រសិន​បើ​មាន​ការ​ប្រណាំង​ក្នុង​ពេល​មានភ្លៀងខ្យល់បែបនេះ និងពេលមានឧបទវហេតុលិចទូកកើតឡើង ថាតើ​មាន​មនុស្ស​ប៉ុន្មាននាក់ដែលបានរងគ្រោះ។ បងប្អូនប្រជាពលរដ្ឋបានថ្លែងអំណរគុណដល់គណៈកម្មាធិការប្រណាំងទូកង ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ជាពិសេសសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែល​បានបង្កលក្ខណៈសប្បាយៗដល់ប្រជាពលរដ្ឋទូទាំងប្រទេស៕ អត្ថបទ៖ ហុង វាស្នា