ភ្នំពេញ៖ ប្រជាពលរដ្ឋជាច្រើន នៅថ្ងៃទី ២៧ ខែកញ្ញាឆ្នាំ ២០២២នេះ បន្តធ្វើដំណើរ​ចូល​មករាជធានី​ភ្នំពេញ ​ក្រោយឈប់សម្រាកជាច្រើនថ្ងៃ ​ក្នុងកំឡុងពេលពិធីបុណ្យភ្ជុំបិណ្ឌ។

នៅថ្ងៃអង្គារ៍នេះ ទិដ្ឋភាពរាជធានីភ្នំពេញ ​ចាប់ផ្ដើមមានភាព​មមាញឹក​ជាថ្មី រាប់​បញ្ចូល​ទាំងការធ្វើ​ចរាចរណ៍ ​និងការប្រកបអាជីវកម្មជាដើម។ សម្រាប់ថ្ងៃនេះ ប្រជាពលរដ្ឋដែលបានចាកចេញទៅ​ស្រុកកំណើត​កំឡុងពេលភ្ជុំបិណ្ឌ ​កំពុងធ្វើដំណើរចូលរាជធានីភ្នំពេញ តាំងពីព្រឹកព្រលឹម ខណៈពួកគាត់​មួយចំនួនត្រូវចូលបំពេញការងារនៅថ្ងៃនេះ និងមួយចំនួនត្រូវបំពេញ​ការងារនៅ​ថ្ងៃស្អែក។

ជាក់ស្ដែងនៅតាមបណ្ដោយផ្លូវជាតិលេខ ១ គឺមានការធ្វើដំណើររបស់ពលរដ្ឋចូល​មករាជធានី​ភ្នំពេញ​ក្នុងចំនួនច្រើន​ ចេញពីស្រុកកំណើតនៅខេត្ត ​កណ្ដាល ព្រៃវែង ​និងខេត្តស្វាយរៀង។ ការធ្វើដំណើរមានទាំងការប្រើប្រាស់ម៉ូតូ កង់បី និងរថយន្តជាដើម។ ពួកគាត់លើកឡើងពីភាពសប្បាយរីករាយក្នុងឱកាសភ្ជុំបិណ្ឌឆ្នាំនេះ។ ភាពសប្បាយរីករាយព្រោះ ឱកាសកាន់បិណ្ឌ និងភ្ជុំបិណ្ឌ គឺពួកគាត់អាចជួបជុំ និងធ្វើដំណើរដោយសេរី ខុសពីកាន់បិណ្ឌ ភ្ជុំបិណ្ឌឆ្នាំ ២០២១។

ការធ្វើដំណើរចូលរាជធានីភ្នំពេញនេះ ​អាចបន្តមានភាពមមាញឹករហូតដល់ពេលល្ងាច ព្រោះប្រជាពលរដ្ឋមួយចំនួន ពិសេសកម្មករ កម្មការិនី ពុំទាន់ចូលបំពេញការងារនថ្ងៃនេះនោះទេ។ ហេតុនេះពួកគាត់មួយចំនួនអាចចាកចេញពីស្រុកកំណើតនៅពេលរសៀល។

ថ្ងៃទី ២៧ ខែកញ្ញានេះ ក៏ជាថ្ងៃចុងក្រោយដែលរាជរដ្ឋាភិបាល ផ្ដល់ជូនការធ្វើដំណើរពីស្រុកកំណើត​ចូលមករាជធានីភ្នំពេញវិញដោយមិនគិតថ្លៃផងដែរ៕