កំពង់ឆ្នាំង៖ នៅរសៀលថ្ងៃទី២៧ ខែកញ្ញា ឆ្នាំ២០២២នេះ លោក ប៉ាត់ គន មេឃុំផ្លូវទូក ស្រុក​កំពង់លែង ខេត្តកំពង់ឆ្នាំង បានស្រែកសុំជំនួយពីអាជ្ញាធរស្រុកខេត្ត និងថ្នាក់ជាតិ ដើម្បី​ជួយ​ដល់​ប្រជាពលរដ្ឋ​នៅក្នុងឃុំផ្លូវទូក ស្រុកកំពង់លែង ទាក់ទងនឹងជំនន់​ទឹក​ទន្លេ​ឡើង​ខ្លាំង​ប៉ះពាល់​ដល់​ការ​រស់​នៅរបស់ប្រជាពលរដ្ឋ។

លោក ប៉ាត់ គន បានអោយដឹងទៀតថា នៅឆ្នាំ២០២២នេះ ទឹកទន្លេបានហក់​ឡើង​ខ្ពស់​ជាង​ឆ្នាំ​កន្លង​ៗ​​មក ធ្វើអោយភូមិសាស្ត្រក្នុងឃុំទាំងមូលដែលប្រជាពលរដ្ឋធ្លាប់រស់នៅ ត្រូវបាន​ទឹក​ជន់​លិច​អស់ និងមិនមានទីទួលសម្រាប់រស់នៅនោះឡើយ។ គិតមកដល់ថ្ងៃទី២៧ ខែកញ្ញា ឆ្នាំ​២០២២នេះ មានប្រជាពលរដ្ឋប្រមាណជាង១០០គ្រួសារនៅក្នុងឃុំមួយនេះ បាន​រង​គ្រោះ​ដោយ​សារ​ជំនន់ទន្លេ និងមួយចំនួនផ្សេងទៀតកំពុងប្រឈមនឹងការជន់លិចផងដែរ។ បើទោះជាឃុំផ្លូវទូក ស្រុកកំពង់លែង ជាឃុំមួយនៅលើផ្ទៃទឹកក៏ដោយ ក៏ប៉ុន្តែជារៀងរាល់ឆ្នាំ ទឹក​ទន្លេ​មិនឡើងខ្លាំងដូចឆ្នាំនេះនោះឡើយ ទើបតែរយៈពេលប៉ុន្មានថ្ងៃមកនេះ ទឹក​ទន្លេ​បាន​ហក់​ឡើង​ជា​បន្តបន្ទាប់ទៀតំ អាស្រ័យហេតុនេះ សូមជូនដំណឹងដល់អាជ្ញាធរស្រុក ខេត្ត ជួយ​អន្តរាគមន៍​ដល់ប្រជាពលរដ្ឋនៅក្នុងឃុំផ្លូវទូកផង៕ អត្ថបទ៖​ ហុង វាស្នា