អ៊ីតាលី៖ កាលពីថ្ងៃពុធម្សិលមិញអ៊ីតាលីបាននិយាយថា ការចាក់វ៉ាក់សាំងបង្ការជំងឺ COVID-19 របស់ក្រុមហ៊ុនឱសថ AstraZeneca នឹងប្រើប្រាស់លើអ្នកដែលមានអាយុលើសពី ៦០ឆ្នាំ ហើយអង់គ្លេសបាននិយាយថា ពលរដ្ឋមានអាយុក្រោម ៣០ឆ្នាំគួរតែមានជម្រើសផ្សេងមួយទៀត ដោយសារតែទំនាក់ទំនងរវាងវ៉ាក់សាំង និងករណីកំណកឈាមដ៏កម្រ។
ប្រទេសជាច្រើននៅសហភាពអឺរ៉ុប ធ្លាប់បានផ្អាកការប្រើប្រាស់វ៉ាក់សាំងមួយនេះ ដែលចាក់ដល់ពលរដ្ឋរាប់លាននាក់នៅទូទាំងអឺរ៉ុប ប៉ុន្តែភាគច្រើននៃប្រទេសទាំងនេះបានចាប់ផ្ដើមចាក់វ៉ាក់សាំងឡើងវិញ ក្នុងនោះប្រទេសមួយចំនួនរួមទាំងបារាំង ហូឡង់ និងអាល្លឺម៉ង់បានណែនាំឲ្យប្រើប្រាស់លើមនុស្សដែលមានវ័យចំណាស់។ ទោះបីជាយ៉ាងណាក៏ដោយ ក្រុមរដ្ឋមន្ត្រីសុខភាពសហភាពអឺរ៉ុបមិនអាចឈានដល់សេចក្តីណែនាំរួម លើការប្រើប្រាស់វ៉ាក់សាំងមួយនេះទេ ថ្វីត្បិតតែមានការអំពាវនាវឲ្យមានការ សម្របសម្រួលនៅទូទាំងរដ្ឋជាសមាជិក ដើម្បីជំនះភាពស្ទាក់ស្ទើររបស់សាធារណជន ក្នុងការទទួលយកវ៉ាក់សាំងក្រុមហ៊ុន AstraZeneca។
ក្រុមអាជ្ញាធរសុខភាពអ៊ីតាលីបានណែនាំថា ការចាក់វ៉ាក់សាំងក្រុមហ៊ុន AstraZeneca ប្រើប្រាស់តែលើមនុស្សមានវ័យជាង ៦០ឆ្នាំប៉ុណ្ណោះ ប៉ុន្តែអ្នកមានវ័យក្រោម ៦០ឆ្នាំដែលទទួលបានដូសដំបូងរួចហើយ ពួកគេនៅអាចទទួលបានដូសទី២ ដដែល។ មន្ត្រីមួយរូបនៅអង់គ្លេសបាននិយាយថា សេចក្តីណែនាំថ្មីពីក្រុមប្រឹក្សាយោបល់រដ្ឋាភិបាល ឲ្យមានវ៉ាក់សាំងផ្សេងទៀត សម្រាប់អ្នកដែលមានអាយុក្រោម ៣០ឆ្នាំដោយសារតែក្តីកង្វល់ពីសុវត្ថិភាពធ្ងន់ធ្ងរ។ ក្រុមនិយតករអឺរ៉ុបបានអះអាងថា ពួកគេបានរកឃើញការផ្សារភ្ជាប់រវាងវ៉ាក់សាំង និងកំណកឈាមដ៏កម្រមួយ ប៉ុន្តែពួកគេបានបញ្ជាក់ពីសារសំខាន់របស់វ៉ាក់សាំងមួយនេះ ក្នុងការពារមនុស្សពីការឆ្លងជំងឺ COVID-19៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
