កំពង់ឆ្នាំង៖ គិតមកដល់ថ្ងៃទី២៧ ខែកញ្ញា ឆ្នាំ២០២២នេះ បងប្អូនប្រជាពលរដ្ឋនៅក្នុងឃុំស្រែថ្មី ស្រុករលាប្អៀរ ខេត្តកំពង់ឆ្នាំង បានបន្តលេងកំសាន្ត រហូតមកដល់ល្ងាច​ថ្ងៃនេះ និងមានប្រជាពលរដ្ឋចូលរួមទស្សនាកំសាន្ត ជាង១ពាន់នាក់។ កម្មវិធីប្រណាំងទូកង និងមានតន្ត្រីសម័យអមកំសាន្តផងនោះ បានធ្វើអោយប្រជាពលរដ្ឋដែល​មានភូមិកំណើតនៅក្បែរៗនោះ មកចូលរួមយ៉ាងសប្បាយផងដែរ។

 គណៈកម្មាការបុណ្យបានអោយដឹងថា៖ កម្មវិធីប្រណាំងទូកង និងមានតន្ត្រីអមរាំលេងកំសាន្តនេះ បានចាប់ផ្តើមធ្វើតាំងពីថ្ងៃទី២៥ រហូតមកដល់ល្ងាចថ្ងៃទី២៧ ខែកញ្ញា ឆ្នាំ២០២២ ស្ថិតនៅក្នុងភូមិទ្រៀ ឃុំស្រែថ្មី ស្រុករលាប្អៀរ ខេត្តកំពង់ឆ្នាំង ដោយមានការប្រណាំងទូកចំនួន២គ្រឿង គឺរំលឹកដល់ដូនតាខ្មែរ ដែលមានទឹកចិត្តក្លាហាន ហ៊ានលះបង់គ្រប់បែបយ៉ាងដើម្បីមាតុភូមិរបស់ខ្លួន។ ក្នុងពេលផ្អាកការប្រណាំងម្តងៗ គឺមានតន្ត្រីសម័យលេងរាំកំសាន្ត រហូតដល់យប់ទៀតផង ដើម្បីធ្វើអោយ​បងប្អូនប្រជាពលរដ្ឋ​សប្បាយរីករាយ។ នៅក្នុងកម្មវិធីប្រណាំងទូកងនេះ គេសង្កេតឃើញមានប្រជាការពារភូមិជាច្រើននាក់ កំពុងបន្តការពារនៅទីតាំងនោះ​បានយ៉ាងខ្ជាប់ខ្ជួន មិនអោយមានរឿងអ្វីកើតឡើងនោះឡើយ។

 លោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំង បានអោយដឹងថា៖ ភ្ញៀវទេសចរណ៍ដែលបានមកកំសាន្តនៅតាមរមណីយដ្ឋាននានាក្នុងខេត្តកំពង់ឆ្នាំង ក្នុងពិធីបុណ្យភ្ជុំបិណ្ឌឆ្នាំនេះ ចាប់ពីថ្ងៃទី២៤រហូតដល់ថ្ងៃទី២៦ ខែកញ្ញា ឆ្នាំ២០២២ មានរហូតដល់ជាង៥ម៉ឺននាក់ និងមានភ្ញៀវជនបរទេសចំនួន២៣នាក់ផងដែរ។ ដោយសារតែប្រទេសជាតិមានសុខសន្តិភាពពិតប្រាកដ មិនមានជម្ងឺកូវីដ១៩យារយី ប្រជាពលរដ្ឋនៅគ្រប់ទិសទី បាននាំគ្នាចូលរួមសប្បាយរីករាយសាទរ ជាមួយបុណ្យប្រពៃណីខ្មែរមួយនេះ៕អត្ថបទ ៖ ហុង វាស្នា