កំពត៖ ក្រុមហ៊ុនស៊ីណូហាយដ្រូកំចាយ កាលពីវេលាម៉ោង៨យប់ថ្ងៃទី២៧ ខែកញ្ញា ឆ្នាំ២០២២ បាន​សម្រេចបើកទ្វារបង្ហូរទឹកចេញពីអាងទំនប់វារីអគ្គិសនីកំចាយ ហើយការបើកទ្វារទឹកនេះ មិនបានធ្វើឲ្យកម្ពស់ទឹកព្រែកហក់ឡើងនោះទេ​ បើគិតមកដល់ព្រឹកថ្ងៃទី២៨ ខែកញ្ញានេះ។ ចំណែកអាកាសធាតុក្នុងក្រុងកំពតមានភាអាប់អួរបន្តិច តែមិនបង្កប៉ះពាល់ដល់ការប្រកបរបររបស់​ប្រជាពលរដ្ឋឡើយ ។

ប្រធានមន្ទីររ៉ែ និងថាមពលខេត្តកំពត លោក សោម វិចិត្រ បានប្រាប់ឲ្យដឹងថា ក្រុមហ៊ុនស៊ីណូ​ហាយ​ដ្រូ​ បាន​ឱ្យដឹងថា ​កាលពីវេលាម៉ោង៨យប់ថ្ងៃទី២៧ ខែកញ្ញា កម្រិតទឹក​ក្នុងអាងស្តុក​នៃទំនប់វារីអគ្គិសនីកំចាយបានឡើងដល់កម្ពស់ ១៤៨,៦៤ម៉ែត្រ ខណៈទឹកហូរចូលមានចំណុះ ១៤៧,៨២ម៉ែត្រត្រីគុណក្នុង១វិនាទី។ ដូច្នេះហើយក្រុមការងារបច្ចេកទេស បាន​សម្រេចបើកបង្ហូរ​ទឹកចេញ​ដោយលើកបង្ហើបទ្វារទឹក១ ក្នុងកម្រិតកម្ពស់ ១ម៉ែត្រពីបាតទំនប់វារីអគ្គីសនី ។

លោក បានបញ្ជាក់ថា សម្រាប់នៅថ្ងៃទី២៨ ខែកញ្ញា វេលាម៉ោង ១០នាទី នេះ កំពស់ទឹកអាង ១៤៨.៣៤ម៉ែត្រ លំហូរទឹកចូលអាងស្តុក ១៤០.៤៧ម៉ែត្រគូបក្នុងមួយវិនាទី នៅបើកទ្វារទឹកចំនួន១ ដដែល ប៉ុន្តែបន្ថយនៅត្រឹម កម្ពស់កន្លះម៉ែត្រវិញ ។

លោក បន្ថែមថា ការបើកទ្វារទឹកនេះ ធ្វើឡើងនៅក្នុងកម្រិតមួយតិចបំផុត ដើម្បីបង្ការករណី​មាន​ភ្លៀងធ្លាក់ច្រើន ​នៅតំបន់ជួរភ្នំកំចាយ​ ដូចការ​ព្យាករណ៍របស់ក្រសួងធនធានទឹក ​និងឧតុនិយម។

គិតត្រឹមម៉ោង១១ព្រឹកថ្ងៃទី២៨ ខែកញ្ញានេះ ​តាមការពិនិត្យជាក់ស្តែង ការបើកទ្វារទឹកទំនប់​វារីអគ្គីនីកំចាយ​ មិនបានធ្វើឲ្យកម្ពស់ទឹកព្រែកកំពតហក់ឡើងនោះទេ ​ រីឯកអាកាសធាតុក្រុងកំពត មានសភាពរលឹមហើយរាំងៗ ហើយការប្រកបរបរប្រចាំថ្ងៃរបស់ពលរដ្ឋដំណើរការតាមប្រក្រតី ។

នាយខណ្ឌរដ្ឋបាលជលផលខេត្តកំពត លោក ស សុរិន បានឲ្យដឹងថា គិតមកដល់ព្រឹកថ្ងៃទី២៨

ពាក់ព័ន្ធនឹងការទទួលរងឥទ្ធិពលព្យុះទីហ្វុង ​ឈ្មោះ ណូរុ ដែលបានបោកបក់មកលើ​ប្រទេស​វៀតណាម​នេះដែរ រដ្ឋបាលខេត្តកំពតក៏បាន​ ណែនាំដល់អាជ្ញាធរ ​មន្ត្រីជំនាញ​ ពាក់ព័ន្ធ សូមមាន​ការប្រុងប្រយ័ត្ន និងយកចិត្តទុកដាក់ខ្ពស់ ​ពិសេសប្រជានេសាទ​ ពលរដ្ឋរស់នៅ និង​ប្រកប​របរនៅតាមដងព្រែកកំពត ៕