កំពង់ធំ៖ ទឹកជំនន់ដែលបានហូរកាត់លើលើកំណាត់ផ្លូវជាតិលេខ៦ ​ចន្លោះគីម៉ែត្រលេខ២២០ ដល់​លេខ ២២៤ ក្នុងស្រុកស្ទោង ខេត្តកំពង់ធំ បានស្រកចុះបន្តិចហើយ ប៉ុន្តែការចរាចររថយន្តដឹក​ទំនិញ​ធុនធ្ងន់ មិនទាន់ត្រូវបានអនុញ្ញាតនោះទេ ។

រហូតដល់ថ្ងៃនេះ ការធ្វើដំណើរនៅលើកំណាត់ផ្លូវជាតិលេខ៦​ ដែលទឹកលិច នៅក្នុងភូមិសាស្រ្ត ស្រុកស្ទោង​ ខេត្តកំពង់ធំ នៅអាចធ្វើបានជាធម្មតា ​ចំពោះរថយន្តធុនតូច លើកលែងករណី​រថយន្ត​ដឹកទំ និញធុនធ្ងន់ ខណៈដែលទឹកក៏បានស្រកចុះបណ្ដើរៗវិញហើយ។

លោក សាយ គឹមឡម អភិបាលស្រុកស្ទោង បានឱ្យដឹងថា បរិមាណធារទឹក ដែលគ្របដណ្តប់លើ ផ្លូវជាតិលេខ៦ ក្នុងភូមិសាស្រ្តស្រុកស្ទោង បានស្រកចុះប្រមាណ០,១០ម៉ែត្រ ដែលអាច​ឲ្យ​ប្រជាពលរដ្ឋ នៅមូលដ្ឋាន និងអ្នកដំណើរឆ្លងកាត់បានស្រួលជាងមុន ហើយចម្ងាយដែល​គ្របដណ្តប់​ដោយផ្ទៃទឹក នៅសល់ប្រហែល៤គីឡូម៉ែត្រ ជម្រៅទឹកលើផ្លូវជាតិ នៅព្រឹកនេះ ចន្លោះពី០,១០ម៉ែត្រ ទៅ០,៣០ម៉ែត្រ។

ទន្ទឹមជាមួយគ្នានេះដែរ ក្នុងនាមគណៈបញ្ជាការឯកភាពស្រុក ​បានដាក់កម្លាំងជាប្រចាំ ក្នុងការជួយ​សម្រួលចរាចណ៍ ​មិនឲ្យមានការកកស្ទះនោះទេ។ មន្រ្តីជំនាញ នៅ​តែ​បន្តការ​ទប់​ទឹក​ដោយ​ប៉ាវច្រកខ្សាច់ ​នៅកន្លែងដែលមានទឹកហូរខ្លាំង ការពារទឹកហូរច្រោះដាច់ផ្លូវ។

លោក បានបន្តថា ប្រភពទឹកនៅផ្នែកខាងលើ គឺទំនប់អាងស្ទាក់ទឹក ​៣០ កញ្ញា នៅថ្ងៃនេះ បាន​ស្រកចុះ០,១៣ម៉ែត្រ និងទឹកស្ទឹងស្ទោង ​ស្រកចុះ ០,១០ម៉ែត្រ។ ដោយឡែក ភូមិដែលរងគ្រោះដោយ ទឹកជំនន់ មានចំនួន៥២ភូមិ លើ៨ឃុំ ស្មើនឹង៥,៨៩២គ្រួសារ លិចដីកសិកម្ម ​ចំនួន៣,៦៧៨ហិកតា, លិច ផ្លូវ៣៧ខ្សែ ​លិចទីធ្លាវត្តអារាមចំនួន៧វត្ត, លិចទីធ្លាសាលារៀនចំនួន១៧សាលា, លិចទីធ្លាមណ្ឌលសុខ ភាព ២កន្លែង៕ អត្ថបទ៖ លី សាងស៊ីន