ត្បូងឃ្មុំ៖ ផ្ទះសម្បែងប្រជាពលរដ្ឋចំនួន៥គ្រួសារ ដែលប្រឈមនឹងបាក់ធ្លាក់ចូលទន្លេមេគង្គ ក្នុង​ឃុំជីរោទ៍ទី១ ស្រុកត្បូងឃ្មុំ ត្រូវបានកម្លាំងអាជ្ញាធរមានសមត្ថកិច្ច ជួយរុះរើផ្លាស់ទៅរក​ទី​សុវត្ថិភាព ព្រោះច្រាំងទន្លេនៅតំបន់នោះ នឹងត្រូវបាក់ស្រុតបន្តទៀត។

លោក ទួន ឆៃលឹម មេឃុំជីរោទ៍ទី១ នៃស្រុកត្បូងឃ្មុំ ខេត្តត្បូងឃ្មុំ បានឲ្យដឹងថា ការបាក់ស្រុតច្រាំង ទន្លេនេះ គឺបានបង្កឡើងដោយសារទឹកហូរបុកខ្លាំង ​និងបានកើតឡើងកាលពីល្ងាចថ្ងៃទី២៦ ខែកញ្ញានេះ ។ ផ្ទះសម្បែងរបស់ប្រជាពលរដ្ឋ ដែលប្រឈមខ្លាំង មានចំនួន៥ខ្នង​ ហើយច្រាំងទន្លេ ដែលបានបាក់ស្រុត​ ចូលទៅក្នុងទឹកទន្លេនោះ ​មានទទឹងប្រវែង ១៥ម៉ែត្រ និងបណ្ដោយ​ប្រវែង៦០ម៉ែត្រ។

ប្រជាពលរដ្ឋ បានថ្លែងអំណរគុណដល់អាជ្ញាធរ ​និងកងកម្លាំងនគរបាល ​នៃស្នងការដ្ឋាននគរ បាល​ខេត្តត្បូងឃ្មុំ ដែលបានជួយអន្តរាគមន៍រុះរើផ្ទះរបស់ពួកគេ ហើយក៏បានសំណូមពរដល់អាជ្ញាធរពាក់ ព័ន្ធ​ ជួយផ្ដល់ដីធ្លីសម្រាប់សាងសង់លំនៅឋានថ្មី ​និងអន្តរាគមន៍​ ជួយទប់ច្រាំងទន្លេ កុំឲ្យ​បន្តបាក់ស្រុតទៀត។

តាមការឱ្យដឹង រយៈពេល២ថ្ងៃនេះ កម្លាំងនគរបាលស្នងការដ្ឋានខេត្តត្បូងឃ្មុំ ​និងកម្លាំងអធិការដ្ឋាន​ស្រុកត្បូងឃ្មុំ ​សហការជាមួយអាជ្ញាធរមូលដ្ឋាន បានជួយអន្តរាគមន៍រុះរើផ្ទះសម្បែងរបស់​ប្រជាពល​រដ្ឋ ​ដែលប្រឈមការបាក់ច្រាំងទន្លេមេគង្គ ​នៅចំណុចភូមិរកាធំ ​ឃុំជីរោទ៍ទី១​ ស្រុកត្បូងឃ្មុំ និង​បានអំពាវនាវ ឱ្យប្រជាពលរដ្ឋមានការប្រុងប្រយ័ត្នចំពោះគ្រោះធម្មជាតិនេះ៕ អត្ថបទ៖ ថុង សីហា