ភ្នំពេញ៖ បច្ចុប្បន្ន ល្បែងស៊ីសងខុសច្បាប់នៅរាជធានីភ្នំពេញ មានការថមថយជាងមុន ក្រោយអាជ្ញាធររាជធានីភ្នំពេញចុះបង្រ្កាប។

ការចុះបង្រ្កាបនេះធ្វើឡើងបន្ទាប់ពីសម្តេចតេជោ នៅថ្ងៃទី១៧ ខែកញ្ញ នេះ បានចេញ បញ្ជាឱ្យមន្ត្រី​ពាក់ព័ន្ធ​គ្រប់រូបជាពិសេសមន្ត្រីថ្នាក់ក្រោមជាតិ ​ត្រូវបង្ក្រាបឱ្យអស់នូវល្បែងស៊ីសងខុសច្បាប់ គ្រប់ប្រភេទ។

ពលរដ្ឋរស់ក្នុងរាជធានីភ្នំពេញ នៅថ្ងៃទី២៨ ខែកញ្ញានេះ បានប្រាប់BTVឲ្យដឹងថា តាមការសង្កេត ឥឡូវនេះ​ ល្បែងស៊ីសងខុសច្បាប់​ នៅក្នុងមូលដ្ឋានរស់នៅ ​មានការថមថយជាងមុន បន្ទាប់ពី​អាជ្ញាធរមូលដ្ឋានចុះបង្ក្រាប។ ពួកគេបានគាំទ្រចំពោះចំណាត់ការបង្ក្រាបល្បែងស៊ីសងនេះ ដើម្បីផលប្រយោជន៍ ប្រទេសជាតិ និងប្រជាពលរដ្ឋ។

កាលពីពេលថ្មីៗកន្លងទៅនេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានចេញបញ្ជាយ៉ាងដាច់ណាត់ឱ្យមន្ត្រីពាក់ព័ន្ធគ្រប់រូប​ ជាពិសេសមន្ត្រីថ្នាក់ក្រោមជាតិ បង្ក្រាប​ឱ្យអស់នូវល្បែងស៊ីសងខុសច្បាប់គ្រប់ប្រភេទ។

ក្រៅពីនេះ សម្តេតេជោ បានព្រមានដកអភិបាលរាជធានី-ខេត្ត ក្រុង ស្រុក ខណ្ឌ រូបណា ដែល​មិន​ទទួលខុសត្រូវលើតួនាទី បណ្តោយឱ្យល្បែងស៊ីសងរីកសាយភាយក្នុងមូលដ្ឋានរបស់ខ្លួន។

ក្រោយមានបទបញ្ជារបស់សម្តេចតេជោរួចមក ​គណៈអភិបាលរាជធានី-ខេត្តទូទាំងប្រទេស បាន​បើក​កិច្ចប្រជុំជាបន្ទាន់រៀងៗខ្លួន ដើម្បីដាក់ផែនការចុះបង្ក្រាបល្បែងស៊ីសងនៅតាមមូលដ្ឋាន។

សម្រាប់មូលដ្ឋានរាជធានីភ្នំពេញ ជាលទ្ធផល គិតចាប់ពីថ្ងៃទី១៧ ​ដល់ថ្ងៃទី២៣​ ខែកញ្ញា នេះ កម្លាំង​គណៈបញ្ជាការឯកភាព បានបើកការបង្ក្រាបល្បែងស៊ីសងខុសច្បាប់​ បាន៧៦ករណី ឃាត់ខ្លួន មនុស្សចំនួន១៤៦នាក់។

បទល្មើស មានដូចជា ឆ្នោតវៀតណាម ​ហាងបញ្ចាំង​ខុសច្បាប់​ ល្បែងអនឡាញ ​បៀរ ម៉ាស៊ីនអនឡាញ​ និងឆ្នោតឡូតូខុសច្បាប់ ៕ អត្ថបទ៖ ទូច សោភ័ណ

​