តាកែវ៖ ប្រជាពលរដ្ឋជាង ១០០០ គ្រួសារ ដែលរស់នៅក្នុង ភូមិត្រពាំងខ្នា ឃុំជំរៈពេន ស្រុកសំរោង ខេត្តតាកែវ កំពុង​រអ៊ូរទាំ​នឹងផ្លូវលំជនបទក្នុងភូមិចំនួន ​៣ខ្សែ ប្រវែងជាង ​២គីឡូម៉ែត្រ ដែល​កំពុងរង​ការខូចខាតយ៉ាងដំណំ ចាប់តាំងពីដើមភូមិរហូតដល់ចុងភូមិ និងបង្កការលំបាកជាខ្លាំង​ដល់​ការធ្វើដំណើរទៅមកប្រចាំថ្ងៃ។

លោក ឌី ខន ប្រធានភូមិត្រពាំងខ្នា ឃុំជំរៈពេន ស្រុកសំរោង ខេត្តតាកែវ ​បានប្រាប់ឱ្យដឹងថា ផ្លូវទាំង៣ខ្សែ ក្នុងភូមិរបស់លោក ​គឺបានខូចខាតបែបនេះជាច្រើនឆ្នាំមកហើយ ជាពិសេស​នៅ​រដូវវស្សាតែម្ដងគឺពិតជាពិបាកធ្វើដំណើរណាស់ ប៉ុន្តែមកទល់ពេលនេះ​ពុំឃើញមាន​ទម្លាក់​ថវិកា​ដើម្បីជួសជុលផ្លូវទាំង៣ខ្សែនេះឡើយ។ លោក បានបន្តថា កន្លងមក ក្នុងនាមលោកជាអាជ្ញាធរភូមិ ក៏បានស្នើសុំប្រើប្រាស់ថវិកាមូលនិធិឃុំ​បន្តិចបន្តួច​ដែល​រៃអង្គាស​ពីប្រជាពលរដ្ឋនៅក្នុងភូមិ ដើម្បីជួសជុលខ្លះដែរ ​ប៉ុន្តែមិនអាចជួសជុលបានស្អាតទាំងស្រុងនោះទេ។

លោកប្រធានភូមិខាងលើនេះ ​បានបញ្ជាក់ទៀតថា ក្នុងចំណោមផ្លូវទាំង៣ខ្សែ ​មាន១ខ្សែប្រវែងជាង ១,៥ គីឡូម៉ែត្រ ​ដែលអូសកាត់ក្នុងភូមិ ​គឺរងការវាយប្រហារដោយទឹកជំនន់សឹងតែរៀងរាល់ឆ្នាំ។ លោក បន្តថា កាលពីពីរឆ្នាំកន្លងទៅផ្លូវ១ខ្សែនេះត្រូវបានកាត់ផ្ដាច់ដោយទឹកជំនន់ជាច្រើនកន្លែង។

បន្ថែមពីលើបញ្ហាផ្លូវ លោក ឌី ខន ប្រធានភូមិត្រពាំងខ្នា ​បានឱ្យដឹងទៀតថា ​កាលពីពេលថ្មីៗ កន្លង​ទៅនេះ ទឹកជំនន់បានធ្វើឱ្យបាក់ស្ពាន ១កន្លែងបន្ថែមទៀត ​ហើយទឹក​បានហូរច្រោះទំបន់ប្រឡាយ​មេក្នុងភូមិ ​ធ្វើឱ្យបាក់ខ្នងទំនប់លិចលុងផ្ទះសំបែង និង​ស្រែស្រូវ​របស់​បងប្អូនប្រជាពលរដ្ឋ​ជា​ច្រើនហិកតា។

នៅចំពោះមុខនេះ​ ទាំងអាជ្ញាធរភូមិ ​និងប្រជាពលរដ្ឋជាង ១០០០គ្រួសារ បានសំណូមពរដល់​រដ្ឋបាល​ស្រុកសំរោង ​និងលោកអភិបាលខេត្តតាកែវ ​មេត្តាចុះពិនិត្យមើលពីបញ្ហាលំបាកជាក់ស្ដែង​របស់ប្រជាពលរដ្ឋតាមមូលដ្ឋានផង។

ជាមួយគ្នានេះ​ ពួកគាត់ក៏បានសំណូមពរដល់រាជរដ្ឋាភិបាល​ និងសប្បុរសជននានា មេត្តាជួយជួស​ជុល​ផ្លូវទាំង៣ខ្សែនេះ ​ដើម្បីជួយសម្រួលការធ្វើដំណើរឱ្យបានស្រួលជាងមុន និងដើម្បី​លើកកម្ពស់​ជីវភាពរស់នៅប្រចាំថ្ងៃបានប្រសើរជាងមុនផង៕