ព្រះស៊ីហនុ ៖ មន្ត្រីជំនាញក្រសួងសាធារណការ និងដឹកជញ្ជូន បានចុះណែនាំប្រជាពលរដ្ឋដែលរស់នៅអមសងខាងផ្លូវល្បឿនលឿ​ន​ភ្នំពេញ-ព្រះសីហនុ​ឱ្យបញ្ឈប់​សកម្មភាពកាត់របងបន្លាលួសសុវត្ថិភាព ដើម្បីឆ្លងចេញចូល និងដឹកសត្វពាហនៈលើផ្លូវល្បឿនលឿននេះបន្តទៀតចាប់ពីពេលនេះ ជៀងវាងបង្កគ្រោះថ្នាក់ និងរងទោសទណ្ឌតាមច្បាប់។

ឯកឧត្តម ស៉ឹង សុគង់ អនុរដ្ឋលេខាធិការក្រសួងសាធារណការ និងដឹងជញ្ជូន បានដឹកនាំមន្ដ្រីបច្ចេកទេសក្រសួងសាធារណការ និងដឹងជញ្ជូន ដោយមានការ​ចូលរួមពីតំណាងក្រុមហ៊ុនសាងសង់ផ្លូវល្បឿនលឿននាព្រឹកថ្ងៃទី២៨ ខែកញ្ញា ឆ្នាំ២០២២នេះ បានចុះត្រួតពិនិត្យ និងអប់រំណែនាំឱ្យប្រជាពលរដ្ឋ​បញ្ឈប់សកម្មភាពកាត់​របងបន្លាលួសសុវត្ថិភាពតាមផ្លូវល្បឿនលឿនភ្នំពេញ-ព្រះសីហនុ ដើម្បីដើរ ឆ្លងកាត់ និងដឹកសត្វពាហនៈឆ្លងកាត់ ដែលសកម្មភាពនៅនឹងបង្កជាគ្រោះថ្នាក់ដល់ពលរដ្ឋ និងអ្នកធ្វើដំណើរ និងជាទង្វើខុសច្បាប់ ព្រោះកន្លងមកគណៈកម្មការដោះស្រាយផលប៉ះពាល់ បានដោះស្រាយតាមគោលការណ៍រួចរាល់ហើយ ប្រជាពលរដ្ឋទាំងនោះក៏បានទទួលយកថវិកាសំណងរួចរាល់ហើយដែរ ។

ក្នុងការចុះត្រួតពិនិត្យ និងជួបជាមួយប្រជាពលរដ្ឋផ្ទាល់នេះដែរ មន្ត្រីជំនាញបានអំពាវនាវដល់ប្រជាពលរដ្ឋត្រូវតែបញ្ឈប់សកម្មភាព ល្មើសច្បាប់នេះជាបន្ទាន់ ហើយអាជ្ញាធរមូលដ្ឋានក៏ត្រូវសហការចុះធ្វើការអប់រំណែនាំបន្ថែម។ ជាមួយគ្នានេះដែរ មន្ត្រីជំនាញក៏បានជួបពិភាក្សាជាមួយក្រុមហ៊ុនសាងសង់ ក្នុងការស្វែងរកដំណោះស្រាយ សមស្របមួយរវាងក្រុមហ៊ុន និងប្រជាពលរដ្ឋផងដែរ ខណៈប្រជាពលរដ្ឋមួយចំនួនបន្ទាប់ពីក្រុមហ៊ុនធ្វើរបងលួសបិទសងខាងផ្លូវល្បឿនលឿនក៏ដោយ ក៏នៅមានលួចកាត់របងដើម្បីអាស្រ័យផលពីផ្លូវ ធ្វើជាច្រកចេញចូលផ្ទះតាមផ្លូវល្បឿនលឿន លែងសត្វគោក្របីឱ្យចូលស៊ីស្មៅ ចូលច្រូតស្មៅ និងចេញចូលតំបន់ហាមឃាត់ដែលមានព័ទ្ធរបង ដើម្បីជួបជុំហូបអាហារក្បែរផ្លូវល្បឿនលឿនថែមទៀតផង ដែលអាចបង្កគ្រោះថ្នាក់បានគ្រប់ពេលវេលា។ ចំពោះមុខនៅក្នុងស្មារតីដោះស្រាយជូនប្រជាពលរដ្ឋ ភាគីក្រសួង និងក្រុមហ៊ុន បានឯកភាពជួយសម្រួលឈូសឆាយផ្លូវដែលមានស្រាប់ជូនប្រជាពលរដ្ឋ និងបានធ្វើការណែនាំពីផលប៉ះពាល់ នៃគ្រោះថ្នាក់ចរាចរណ៍ ដែលអាចឆក់យកអាយុជីវិតពលរដ្ឋផង និងអ្នកធ្វើដំណើរតាមផ្លូវផង។

ជាមួយនឹងបញ្ហានេះកន្លងមក ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក៏ធ្លាប់បានជម្រាបដល់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីអន្តរាគមន៍ទៅអាជ្ញាធរតាមមូលដ្ឋានឱ្យជួយអប់រំប្រជាពលរដ្ឋ ឱ្យបញ្ឈប់សកម្មភាពលួចកាត់របងលួសនៅផ្លូវល្បឿនលឿន ដែលទុកសម្រាប់ទប់ស្កាត់កុំឱ្យមានសត្វពាហនៈឆ្លងកាត់នេះផងដែរ។

សូមបញ្ជាក់ដែរថា ផ្លូវល្បឿនលឿនភ្នំពេញ-ក្រុងព្រះសីហនុ នឹងដាក់ឱ្យប្រជាពលរដ្ឋប្រើប្រាស់ដោយឥតគិតថ្លៃរយៈពេល១ខែ គិតចាប់ពីថ្ងៃទី០១ ដល់ថ្ងៃ៣១ ខែតុលា ឆ្នាំ២០២២ ដោយកំណត់ឱ្យបើកបរក្នុងល្បឿនចាប់ពី ៦០គីឡូម៉ែត្រ ដល់ ១២០គីឡូម៉ែត្រ ក្នុងមួយម៉ោង។ ផ្លូវល្បឿនលឿនភ្នំពេញ-ព្រះសីហនុ មានប្រវែង ១៨៧,០៥គីឡូម៉ែត្រ ផ្លូវនេះតភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ៕ អត្ថបទ ៖ ប្រាក់ វ៉ាន់ដា ​