បន្ទាយមានជ័យ៖ ក្នុងពេលអញ្ជេីញចុះពិនិត្យស្ថានភាពទឹកជំនន់តាមបណ្តាខេត្ត នៅថ្ងៃទី២៨ ខែកញ្ញា ឆ្នាំ២០២២ ឯកឧត្តមទេសរដ្ឋមន្រ្តី គន់ គីម ​អនុប្រធានទី១នៃគណ:កម្មាធិការជាតិគ្រប់គ្រង​គ្រោះមហន្តរាយ មានប្រសាសន៍ថាក្នុងចំណោមខេត្តចំនួន៤ មានតែភូមិសាស្រ្តខេត្តបន្ទាយមានជ័យ​រងផលប៉ះពាល់​ដោយទឹកជំនន់ខ្លាំងជាងគេ ពិសេសគឺស្រុកព្រះនេត្រព្រះ។ ឯកឧត្តមទេសរដ្ឋមន្រ្តី បានថ្លែងប្រាប់BTV បន្ទាប់ពីចុះពិនិត្យស្ថានភាព​ទឹកជំនន់ និងចែកអំណោយ​របស់​សម្តេចតេជោ ហ៊ុន សែន នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនប្រជាពលរដ្ឋក្នុងឃុំទឹកជោរ​ស្ថិតក្នុងស្រុកព្រះនេត្រព្រះ ដោយបញ្ជាក់ថា​ស្ថានភាពទឹកជំនន់ខេត្តកំពង់ធំ បានស្រកចុះបន្តិច និងបន្តហូរទៅបឹងទន្លេសាប។ ឯកឧត្តមទេសរដ្ឋមន្រ្តី​បន្តថាក្នុងចំណោមខេត្ត៤ ​ដូចជា កំពង់ធំ ឧត្តរមានជ័យ សៀមរាប និងបន្ទាយមានជ័យ ឃេីញថា មានតែខេត្តបន្ទាយមានជ័យប៉ុណ្ណោះ​ បានរងផលប៉ះពាល់ខ្លាំង​ជាងគេ ខណតាមរបាយការណ៍ខេត្តបន្ទាយមានជ័យមានក្រុង-ស្រុកចំនួន៥ ដោយមាន​ប្រជាពលរដ្ឋសរុបជាង៧ពាន់​គ្រួសាររងគ្រោះ​ជំនន់ ក្នុងនោះស្រុកព្រះនេត្រព្រះមានចំនួនជាង៤ពាន់គ្រួសារ និងជម្លៀសទៅទីទួលសុវត្ថិភាពជិត៣០០គ្រួសារ។

ឯកឧត្តមទេសរដ្ឋមន្រ្តី ថ្លែងថាទឹកជំនន់ក្នុងខេត្តបន្ទាយមានជ័យ​ ដោយសារការហូរស្រុងពីខេត្តឧត្តរមានជ័យ​ដែលភ្លៀងបន្តធ្លាក់​ប៉ុន្មាន​ថ្ងៃ​ជាប់​គ្នាតាមជួរភ្នំដងរ៉ែក។ក្នុងនាមសម្តេចតេជោ ហ៊ុន សែន នាយករដ្ឋមន្រ្តី និងជាប្រធានគណ:កម្មាធិការជាតិគ្រប់គ្រងគ្រោះមហន្តរាយ ឯកឧត្តមទេសរដ្ឋមន្ត្រី គន់ គីម បាននឹងកំពុងតាមដានយ៉ាងយកចិត្តទុកដាក់ខ្ពស់បំផុតលើបាតុភាពធម្មជាតិថ្មីនេះ​បន្ថែមពីលើគ្រប់កម្លាំង​ប្រតិបត្តិការរបស់​គណៈកម្មាធិការជាតិគ្រប់គ្រងគ្រោះមហន្តរាយ ក៏បានត្រៀមលក្ខណៈសម្បត្តិឆ្លើយតបបន្ទាន់ក្នុងករណីមានការជន់លិចធ្ងន់ធ្ងរ។

ទន្ទឹមគ្នានេះ ឯកឧត្តមទេសរដ្ឋមន្ត្រី គន់ គីម បានអំពាវនាវទៅដល់លេខាធិការដ្ឋានគ្រប់គ្រងគ្រោះមហន្តរាយ នៅតាមបណ្តារាជធានី ឱ្យត្រៀមលក្ខណៈសម្បត្តិ ២៤ម៉ោង ចេញជួយសង្គ្រោះប្រជាពលរដ្ឋក្នុងករណីមានការលិចធ្ងន់ធ្ងរ។

ជាមួយនឹងការអំពាវនាវទៅកាន់អាជ្ញាធរ ឯកឧត្តមទេសរដ្ឋមន្ត្រី គន់ គីម ក៏បានអំពាវនាវដល់ប្រជាពលរដ្ឋនៅតាមតំបន់ប្រឈមការជន់លិច ឱ្យត្រៀមលក្ខណៈសម្បត្តិជម្លៀសទៅកាន់ទីទួលសុវត្ថិភាព និងលើកដាក់ទ្រព្យសម្បត្តិទាំងឡាយនៅទីខ្ពស់បញ្ចៀសការលិចលង់។ បន្ថែមលេីសពីនេះ ឯកឧត្តមទេសរដ្ឋមន្ត្រី ក៏បានណែនាំដល់ប្រជាពលរដ្ឋប្រញាប់ទាក់ទង​ទៅអាជ្ញាធរជា​បន្ទាន់នៅពេល​ផ្ទះសម្បែងខ្លួនរងការគំរាមពីជំនន់ទឹកភ្លៀង ជាពិសេសត្រូវប្រយ័ត្នប្រយែងកូនចៅតូចៗមិនឱ្យលេងទឹក អាចប្រឈមនឹងគ្រោះថ្នាក់លង់ទឹក៕ អត្ថបទ ៖ ឧត្ដម