ភ្នំពេញ ៖ ចៅក្រមសើបសួរសាលាដំបូងរាជធានីភ្នំពេញ នៅល្ងាចថ្ងៃទី២៧ កញ្ញា ឆ្នាំ២០២២ បានចេញដីកាសម្រេចឃុំ ខ្លួន អ្នករកសុីទទួលបញ្ចាំម៉ូតូនៅម្តុំឃ្លាំងរំសេវ ចំនួន០៩ នាក់ ដាក់ពន្ធនា គារជាបណ្ដោះអាសន្ន ក្រោមការចោទប្រកាន់ពីបទ.ទទួលផលចោរកម្ម.ក្នុងចំណោមជនត្រូវចោទទាំង៩ នាក់។

ជនត្រូវចោទទាំង៩ នាក់នោះមាន ៖ទី១.លី វ៉ានឆៃ ភេទប្រុស អាយុ ២៦ឆ្នាំ មុខរបរ កម្មកររុញម៉ូតូនៅហាងបញ្ចាំ ពន្លឺខ្សាច់មាស ។ ទី២.ឈ្មោះ ធន់ ធី ភេទប្រុស អាយុ២៦ ឆ្នាំ មុខរបរ បុគ្គលិក ។ ទី៣.ឈ្មោះ ស៊ុន ហាច ភេទប្រុស អាយុ៥៨ ឆ្នាំ មុខរបរ ទិញ.លក់ម៉ូតូ ។ ទី៤.ឈ្មោះ ស៊ឹម សុខា ភេទប្រុស អាយុ២២ ឆ្នាំ មុខរបរ បុគ្គលិក ។ ទី៥.ឈ្មោះ ប៉េង ឡេង ភេទប្រុស អាយុ៤០ ឆ្នាំ មុខរបរ បុគ្គលិក ។ ទី៦.ឈ្មោះ រឿង សុវណ្ណរ៉េត ភេទប្រុស អាយុ២២ ឆ្នាំ មុខរបរ អ្នកយាមឃ្លាំង ។ ទី៧.ឈ្មោះ ប៊ុន សុខលីម ភេទស្រី អាយុ៤២ ឆ្នាំ អ្នកបោសសម្អាត និងមើលផ្ទះ ។ ទី៨.ឈ្មោះ និត នឿន ភេទប្រុស អាយុ៤១ ឆ្នាំ មុខរបរ បុគ្គលិក។ និងទី៩.ឈ្មោះ មួង សុណា ហៅ ស្រីមុំ ភេទស្រី អាយុ៣៩ ឆ្នាំ មុខរបរ លក់ដូរ ។

គួរបញ្ជាក់ផងដែរ កាលពីរសៀលថ្ងៃទី២២ ខែកញ្ញា ឆ្នាំ២០២២ កម្លាំងអាជ្ញាធររាជធានីភ្នំពេញ សហការជាមួយអាជ្ញាធខណ្ឌទួលគោក រាជធានីភ្នំពេញ បានចុះធ្វើការត្រួតពិនិត្យ ឃ្លាំង និងកន្លែងទទួលបញ្ចាំយានយន្តគ្រប់ប្រភេទ នៅម្តុំឃ្លាំងរំសេវ ក្នុងសង្កាត់ទឹកល្អក់៣ ខណ្ឌទួលគោក ជាលទ្ធផល ចុះត្រួតពិនិត្យទីតាំងហាងបញ្ចាំបានចំនួន៥៣ទីតាំង ក្នុងចំណោមជាង៦០ទីតាំង ដោយបានបិទទីតាំងហាងបញ្ចាំចំនួន ១៣ ទីតាំង ដកហូតម៉ូតូបានចំនួន សរុបចំនួន១១១៣ គ្រឿង រថយន្តចំនួន ១៤ គ្រឿង passapp ចំនួន ១២ គ្រឿងម៉ូតូកង់បីចំនួន ៩គ្រឿង និងឃាត់ខ្លួនម្ចាស់ទីតាំងនិងអ្នកពាក់ព័ន្ធចំនួន ០៩ នាក់ ៕ អត្ថបទ៖ កុម្ភៈ