ភ្នំពេញ៖ តម្រូវការផ្គត់ផ្គង់ជ្រូករស់ ឬ សាច់ជ្រូកសម្រាប់បម្រើការហូបចុក នារយៈពេល ១៥ថ្ងៃ ក្នុងរដូវបុណ្យភ្ជុំបិណ្ឌប្រពៃណីជាតិ ជាពិសេសការផ្គត់ផ្គង់មាន់ ឬសាច់មាន់នៅតាមទីផ្សារ បានកើនឡើងគួរជាទីកត់សម្គាល់ ដោយធ្វើឲ្យកសិករអ្នកចិញ្ចឹមសត្វទទួលបានប្រាក់ចំណូលសមរម្យ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជា បានថ្លែងប្រាប់ភ្នាក់ងារអ្នកយកព័ត៌មាន នៅថ្ងៃទី២៨ ខែ កញ្ញា ឆ្នាំ២០២២ នេះថា បច្ចុប្បន្នកម្ពុជាមានអ្នកចិញ្ចឹមសត្វក្រៅពីលក្ខណៈគ្រួសារ ដោយបើកចិញ្ចឹមជាកសិដ្ឋានធំៗមានចំនួនច្រើន ក្នុងនោះ សម្រាប់ផ្គត់ផ្គង់ជ្រូករស់ ឬសាច់ជ្រូក ក៏កម្ពុជាមិនមានការខ្វះខាតទៀតឡើយ ជាក់ស្តែងក្រៅពីរដូវបុណ្យទានផ្សេងៗ នៅក្នុងមួយថ្ងៃៗ កម្ពុជាមានតម្រូវការនៅទូទាំងប្រទេស សម្រាប់បម្រើការបូបចុក មានចំនួនប្រមាណ ពី ៨ ពាន់ ទៅ ៩ ពាន់ក្បាល ។
លោក បន្តថា ចំណែកនៅក្នុងរដូវបុណ្យភ្ជុំបិណ្ឌឆ្នាំនេះ ការផ្គត់ផ្គង់ជ្រូករស់ ក៏ដូចសាច់ជ្រូកនៅតាមទីផ្សារ មានកំណើនកើនឡើងគួរជាទីកត់សម្គាល់ ជាពិសេសនៅក្នុងរយៈពេល ៣ថ្ងៃចុងក្រោយនៃពិធីភ្ជុំបិណ្ឌ តម្រូវការជ្រូកបានហក់ឡើងខ្ពស់ ជាង ១ម៉ឺនក្បាល ក្នុងមួយថ្ងៃ ក្នុងនោះទោះបីការផ្គត់ផ្គង់កើនឡើងយ៉ាងណា កម្ពុជាមិនមានជួបបញ្ហាកង្វះសាច់ជ្រូកតាមទីផ្សារនេះឡើយ ។
តាមរយៈការលក់ដូរក្នុងរយៈពេល ១៥ថ្ងៃ នៃពិធីភ្ជុំបិណ្ឌនេះ បានធ្វើឲ្យកសិករអ្នកចិញ្ចឹមសត្វ ទទួលបានចំណូលសមរម្យនៅក្នុងមុខរបរចិញ្ចឹមសត្វរបស់ពួកគាត់។
ក្រសួងកសិកម្ម រុក្ខាប្រមាញ់ និងនេសាទ សេចក្តីជូនដំណឹង ស្តីពីឱកាសក្នុងការនាំចេញសត្វ និងផលិតផលសត្វទៅកាន់សាធារណរដ្ឋប្រជាមានិតចិននាពេលអនាគត ក្នុងនោះក្រសួងស្នើរឲ្យវិនិយោគគិនក្នុង វិស័យចិញ្ចឹមសត្វ និងផលិតផលសត្វ ដែលមានបំណងនាំចេញសត្វ និងផលិតផលសត្វដូចជា ជ្រូករស់ គោរស់ សាច់ជ្រូក សាច់គោ សាច់មាន់ ស្បែកគោ ស្បែកជ្រូក និងផលិតផលផ្សេងទៀត អាចធ្វើការស្នើសុំមកអគ្គនាយកដ្ឋានសុខភាពសត្វ និងផលិតកម្មសត្វ ដោយបញ្ជាក់ពីប្រភេទសត្វ និងផលិតផលសត្វឱ្យបានច្បាស់លាស់ ទៅតាមប្រភេទនីមួយៗ ដើម្បីឱ្យអគ្គនាយកដ្ឋាន មានលទ្ធភាពរៀបចំបែបបទពាក់ព័ន្ធផ្សេងៗសុំការអនុញ្ញាតពីភាគីចិន ដើម្បីចុះមកត្រួតពិនិត្យ និងវាយតម្លៃហានិភ័យ និងឈានទៅរកការរៀបចំពិធីសារអនាម័យ និងកិច្ចព្រមព្រៀងក្នុងការនាំចេញ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
