បាល់ទាត់៖ ​កាល​បរិច្ឆេទ​កំណត់​សំរាប់​ទីក្រុង​ម្ចាស់ផ្ទះ​ទាំង ១២ នៅ Euro ២០២០ ស្ដីពី​ការ​បង្ហាញ​គំរោង​ផែនការ​បើក​ឲ្យអ្នកទស្សនា​ត្រលប់​មកវិញ ​ត្រូវ​បាន​បញ្ចប់​នៅ​ថ្ងៃ​ទី៧ ខែ​មេសា​ម្សិលមិញ​។ ​​ព្រឹត្តិការណ៍​បាល់ទាត់​ទ្វីប​អឺរ៉ុប Euro ២០២០ ដែល​លើក​មក ២០២១ ដោយសារ​មេរោគ​រាតត្បាត Covid-19 នេះនឹង​ចាប់ផ្ដើម​នៅ​ថ្ងៃទី​១១ ខែ​មិថុនា​ដល់​ថ្ងៃ​ទី​១១ ខែ​កក្កដា​ខាងមុខ​។

​​អេ​ស្ប៉ា​ញ ស្កុ​ត​ឡេ​ន និង​ហូ​ឡង់​ពេលនេះ​ប្ដេជ្ញា​ថា ​នឹង​មាន​អ្នកគាំទ្រ​នៅ​ក្នុង​ការប្រកួត​អឺរ៉ុប​ដែល​ពួកគេ​នឹង​ធ្វើជា​ម្ចាស់ផ្ទះ​នៅ​ខែ​មិថុនា​។​ ​​ពួកគេ​គឺជា​ប្រទេស​ចុងក្រោយបង្អស់​ដែល​ផ្តល់​ការធានា​ដល់ UEFA លើ​ការ​វិល​ត្រឡប់​នៃ​អ្នកគាំទ្រ​លើក​លែង​តែ Dublin ជាទី​ក្រុង​មួយ​ក្នុងចំណោម​ទីក្រុង​ទាំង ១២ ដែល​មាន​ការសង្ស័យ​បំផុត​អំពី​ថា ​តើ​អ្នកទស្សនា​នឹង​ត្រូវ​បាន​អនុញ្ញាត​ក្នុងអំឡុងពេល​មាន​ជំងឺ​រាតត្បាត និង​ប្រឈម​នឹង​ការ​កាត់​ចេញពី​បេក្ខភាព​ទីក្រុង​ម្ចាស់ផ្ទះ​។​ ​អាជ្ញាធរ​អេ​ស្ប៉ា​ញ​បាន​និយាយ​កាលពី​ថ្ងៃ​ពុធ​ថា ទីក្រុង Bilbao បាន​ប្រាប់ UEFA ថា​ កីឡដ្ឋាន Sam Mames របស់​ខ្លួន​នឹង​បើក​ឲ្យ​មាន​អ្នកគាំទ្រ​ចូល​ទស្សនា ១/៤ នៃ​ចំនួន​កៅអី​កីឡដ្ឋាន​សរុប ៥៣០០០​។

​​ចំនួន​អ្នកគាំទ្រ​ប្រហាក់​ប្រហែលគ្នា​នេះ​ ក៏​នឹង​មាន​នៅ​ក្នុង​ការប្រកួត​នៅ Amsterdam ដោយ​សហព័ន្ធ​បាល់ទាត់​ហុ​ល្លង់​បាន​និយាយ​ថា ​អាជ្ញាធរ​ចង់​អនុញ្ញាត​ឲ្យ​អ្នកទស្សនា​យ៉ាងហោចណាស់​ចំនួន ១២,០០០នាក់​ដែល​បាន​បង្ហាញ​លទ្ធផល​នៃ​ការ​ធ្វើ​តេស្ត​អវិជ្ជមាន Covid-19 ចូល​ទៅ​ក្នុង​ពហុ​កីឡដ្ឋាន Johan Cruyff​។​ ​​ចំណែក​រដ្ឋាភិបាល​ស្កុ​ត​ឡេ​ន​បាន​កំណត់​កាលពី​ថ្ងៃ​ពុធ​ថា ​អ្នកគាំទ្រ​រហូតដល់ ១២.០០០​នាក់​អាច​ត្រូវ​បាន​អនុញ្ញាត​ឲ្យ​ចូល​ទស្សនា​ការប្រកួត​ចំនួន ៤ នៅ​ទីក្រុង Glasgow ដោយ​កីឡដ្ឋាន Hampden Park មាន​សមត្ថភាព ២៥%​៕

​អត្ថបទ​៖​នាង សុភា​វុ​ធ