​បាល់ទាត់៖ ​English Premier League ជាលី​គ​បាល់ទាត់​ដែលមាន​កីឡាករ​រងរបួស​ច្រើន​បំផុត ​ក្នុងចំណោម​លី​គ​កំពូល​ទាំង ៥ របស់​អឺរ៉ុប​កាលពី​រដូវ​កាល​មុន​។ ​​ទិន្នន័យ​ដែល​បាន​ប្រមូល​ពី​លី​គ​កំពូល​ទាំង ៥ របស់​អឺរ៉ុបចុះផ្សាយ​ដោយសារ​ព័ត៌មាន​អង់គ្លេស BBC បាន​បញ្ជាក់ថា Premier League មាន​កីឡាករ​រងរបួស​សរុប ១២៣១ករណី ក្នុងនោះ Chelsea រងគ្រោះ​ធ្ងន់​បំផុត​ដោយមាន​កីឡាករ​រងរបួស​សរុប ៩៧ករណី​តូចធំ​។

​​ក្លិប​នៅ​អង់គ្លេស​បានបង្ហាញ​ទិន្នន័យ​នៃ​ការខាតបង់​ពី​បញ្ហា​របួស​កីឡាករ​ផងដែរដល់​ទៅ ១៨៤.៥៧លាន​ផោន​។ ​​សរុប​ជារួម​នៅក្នុង​លី​គ​កំពូល​ទាំង ៥ របស់​អឺរ៉ុប​រួមមាន​អង់គ្លេស អេ​ស្ប៉ា​ញ អ៊ីតាលី អាល្លឺម៉ង់ និង​បារាំងមាន​កីឡាករ​រងរបួស​សរុប ៤៨១០ករណី​សំរាប់​រដូវ​កាល ២០២១-២០២២ ដែលជា​ការកើនឡើង ២០% បើ​ប្រៀបធៀប​នឹង​រដូវ​កាល ២០២០-២១​។ ​​បើតាម​ការសិក្សា​របស់​ភ្នាក់ងារ​ធានារ៉ាប់រង​មួយ​នៅ​អង់គ្លេសបាន​រកឃើញថា​ តម្លៃ​នៃ​ការ​ខាត​បង់​ពី​បញ្ហា​របួស​កីឡាករ​នៅ​អឺរ៉ុប​មាន​សរុប​ដល់​ទៅ ៥១៣.២៣លាន​ផោនកើនឡើង ២៩%​។ ​​ក្លិប​បារាំង Paris Saint Germain បាន​ចំណាយ​ដល់ ៣៤.២២លាន​ផោន​ឈរលើ​គេ​លើ​បញ្ហា​របួស ខណៈ Real Madrid ឈរ​ទី​២ ​ចំណាយ​អស់ ៣៣.៩៥លាន​ផោន​។

​​នៅ​អង់គ្លេស Manchester United, Liverpool, Chelsea និង Manchester City រួមបញ្ចូល​គ្នា​មាន​មធ្យមភាគយ៉ាង​ហោច​ណាស់ ៣នាក់​ត្រូវ​អវត្តមាន​ក្នុង​មួយ​ប្រកួត​ដោយសារ​បញ្ហា​របួស​។ ​​ចំណែក​នៅឯ​កីឡាករ​ក្រោម​អាយុ ២១ឆ្នាំ​ក៏មាន​ការកើនឡើង​ដែរ​ដោយមាន​សរុប ៣២៦ករណី​នៅ​រដូវ​កាល ២០២១-២០២២ ខណៈ​រដូវ​កាល ២០១៨-១៩ មាន​ត្រឹម ៣០ករណី​៕

​អត្ថបទ​៖​នាង សុភា​វុ​ធ