មណ្ឌលគិរី៖ នៅព្រឹកថ្ងៃទី២៩ កញ្ញា ២០២២ ក្រុមមន្ត្រីជំនាញចម្រុះ ដឹកនាំដោយលោក ស៊ាវ ងីឈាន់ ព្រះរាជអាជ្ញារង នៃអយ្យការអមសាលាដំបូងខេត្តមណ្ឌលគិរី បានចុះពិនិត្យទីតាំងសំណង់​ជញ្ជាំង​រំលោភចូលអូរធម្មជាតិ ​ស្ថិតនៅភូមិចំការតែ សង្កាត់ស្ពានមានជ័យ​ ក្រុងសែនមនោរម្យ ដែល​សំណង់នេះ ត្រូវបានមន្ត្រីជំនាញមូលដ្ឋានហាមប្រាមចំនួន២លើកមកហើយ ឱ្យ​ផ្អាក និង​រុះរើ​ចេញជាកំហិត តែម្ចាស់ទីតាំង ឈ្មោះ ហ៊ាង ឆៃលី មិនអនុវត្ត ទើបមន្ត្រីជំនាញបញ្ជូន​សំណុំរឿង​ទៅតុលាការ ។

ព្រះរាជអាជ្ញារងនៃអយ្យការអមសាលាដំបូងខេត្តមណ្ឌលគិរី លោក ស៊ាវ ងីឈាន់ បានប្រាប់ថា នៅ​ក្នុងប្រតិបត្តិការលើកនេះ គឺមិនទាន់អនុវត្តនីតិវិធីនៅឡើយទេ ​ដោយគ្រាន់តែចុះមកពិនិត្យជាក់ស្ដែង ទីតាំងសំណង់រំលោភចំណីអូរ ​ដើម្បីយកនិយាមការ ប្រមូលទិន្នន័យជាក់លាក់ ដើម្បីអនុវត្ត​នីតិវិធីនៅ​ពេលខាងមុខ៕