ភ្នំពេញ៖ ភាពអំណត់ក្នុងការសិក្សារៀនសូត្រ នៃតួអង្គក្នុងពីខ្សែភាពយន្តចម្រៀង «ជីវិតក្មេងវត្ត» ដែលក្រោយមកទៀត បានក្លាយជានាយករដ្ឋមន្រ្តីកម្ពុជា បានក្លាយជាគំរូ សម្រាប់សិស្សានុសិស្ស សង្វាតរៀនសូត្រ ដើម្បីយកគំរូវីរៈតាមសម្តេចតេជោ ហ៊ុន សែន។

សិស្សថ្នាក់អនុវិទ្យាល័យ និងវិទ្យាល័យនៅខេត្តកណ្តាល បានថ្លែងប្រាប់ BTV នៅថ្ងៃទី២៩ ខែកញ្ញានេះថា នៅបណ្តាសិស្សានុសិស្ស បានទស្សនាភាពយន្តចម្រៀង ជីវិតក្មេងវត្ត នៅតាមផេក Facebook សម្តេចតេជោ។ បន្ទាប់ពីទស្សនាចប់ គេបាន ចែករំលែកសិស្សផ្សេងទៀត បានទស្សនា និងនាំគ្នាយកគំរូតាមតួអង្គតំណាងសម្តេចតេជោ ហ៊ុន សែន ដើម្បីជម្រុញបង្កើនស្មារតី​ខិតខំ​សិក្សារៀនសូត្រ ដើម្បីអនាគតជីវិតផ្ទាល់ខ្លួន​ និងអនាគតប្រទេសជាតិទៅថ្ងៃអនាគត។

ដោយឡែកបណ្តាសិស្សស្រីៗវិញ បានថ្លែងថា ​បន្ទាប់ពីទស្សនាសាច់រឿងជីវិតក្មេងវត្ត ដែលមាន​រយៈពេល​ជាងកន្លះម៉ោងមក គឺធ្វើឲ្យគេមាន​អារម្មណ៍​ក្ដុកក្ដួល​អាណិត​តួ​អង្គ​ឳពុកម្តាយ​ដែល​មានជីវភាពក្រីក្រ ​តស៊ូ​ជម្រុញឲ្យកូនរៀនសូត្រចាកឆ្ងាយពីផ្ទះ ​ពីស្រុកកំណើត មកស្នាក់នៅ​វត្តអារ៉ាម​បន្តការសិក្សានៅរាជធានីភ្នំពេញ ​ហើយគេក៏ចង់យកតម្រាប់​តាម​តួអង្គ​ឳពុកម្តាយ និង​តួអង្គតំណាង​សម្តេច​ ក្នុងការជម្រុញកូនបន្តការសិក្សា និងខិតខំសិក្សា ទោះស្ថិតក្នុង​ជីវិត​ក្រលំបាក​យ៉ាង​ណាក៏ណាក៏ដោយ។

ភាពយន្តចម្រៀង «ជីវិតក្មេងវត្ត» ត្រូវបើកសម្ពោធដាក់បញ្ជាំងលើកដំបូងនៅ ទីស្តីការក្រសួងរៀបចំ​ដែនដីនគរូបណីយកម្ម និងសំណង់ ​ដែលមានរយៈពេលជាង៣០នាទី បាន​លាតត្រដាង​ពី​ជីវិត​តស៊ូ​របស់​សម្តេចតេជោ ​នៅពីកុមារភាពឃ្លាតឆ្ងាយឪពុកម្តាយ​ និងភូមិស្រុក មក​ផ្ញើ​វាសនា​នឹង​ព្រះសង្ឃ​ក្នុង​ទីអារាម​នៅរាជធានីភ្នំពេញ ​ដើម្បីស្រវាវិជ្ជា។

ភាពយន្តរឿងជីវិត​ក្មេងវត្តនេះ ត្រូវបានផ្សព្វផ្សាយទូលំទូលាយ​តាមគ្រប់​មធ្យោបាយ សំដៅបំផុស​ស្មារតី​កុលបុត្រ ​កុលធីតាខ្មែរ ​ឲ្យបន្តខិតខំសិក្សារៀនសូត្រ និង ​ដកស្រង់​បទពិសោធន៍​ ពី​គំរូវីរៈភាព​សម្តេចតេជោ ដើម្បីពង្រឹងលើកកម្រិតសមត្ថភាពខ្លួន ព្រមទាំង​ត្រៀមខ្លួន​ក្នុងការ​រួមចំណែក​អភិវឌ្ឍន៍​សង្គមជាតិ​នាពេលអនាគត ៕អត្ថបទ ស៊ុម សុខជា