ភ្នំពេញ៖ បន្ទាប់ពីមានការឯកភាពពីនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការ​នគរបាលជាតិ នៅព្រឹកថ្ងៃទី២៩ ខែកញ្ញា ឆ្នាំ២០២២នេះ នាយកដ្ឋានប្រឆាំងបទល្មើសសេដ្ឋកិច្ច នៃអគ្គស្នងការដ្ឋាននគរបាលជាតិសហការគ្នាជាមួយដៃគូបានបើកវគ្គបំប៉នជំនាញស្ដីពី «បទល្មើសកម្មសិទ្ធិបញ្ញា និងនីតិវិធីស៊ើបអង្កេតប្រឆាំងការសម្អាតប្រាក់» ដល់មន្រ្តីនគរបាលប្រឆំាងបទល្មើសសេដ្ឋកិច្ចទូទាំង២៥រាជធានី-ខេត្ត។

ពិធីបើកវគ្គបំប៉នជំនាញនេះក្រោមអធិបតីភាព ឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាន​ប្រឆាំងបទល្មើសសេដ្ឋកិច្ច ដែលធ្វើឡើងរយៈពេលពីរថ្ងៃ ​ចាប់ពីថ្ងៃទី២៩-៣០ ខែកញ្ញា ឆ្នាំ២០២២ ដោយមានសិក្ខាកាមចូលរួមចំនួន១០៣នាក់​ នៅសណ្ឋាគារសាន់វេ រាជធានីភ្នំពេញ។

ថ្លែងក្នុងឱកាសបើកវគ្គជំនាញនោះ ឧត្តមសេនីយ៍ឯក ចាន់ វ៉ាន់ធឿន បានលើកឡើងថា វគ្គបំប៉ន​ជំនាញនេះ ធ្វើឡើងក្នុងគោលបំណងពង្រឹង និងបង្កើនសមត្ថភាពជំនាញដល់មន្ដ្រី​អនុវត្តច្បាប់​ដែល​ជាកត្តា​ចំបង​ ស្របតាមផែនការយុទ្ធសាស្ដ្ររបស់អគ្គស្នងការដ្ឋាននគរបាលជាតិ និងផែនការ​សកម្មភាពរបស់នាយកដ្ឋាន ​សំដៅបង្ការ ទប់ស្កាត់ និងបង្ក្រាប​បទល្មើស​ឲ្យបានទាន់ពេលវេលា និង​មានប្រសិទ្ធភាពខ្ពស់។

ជាមួយគ្នានោះ លោកឧត្តមសេនីយ៍ឯក ចាន់ វ៉ាន់ធឿន បានជំរុញឲ្យមន្ដ្រីនគរបាលប្រឆាំងបទល្មើស​សេដ្ឋកិច្ចទាំងអស់ត្រូវយកចិត្តទុកដាក់លើបទល្មើស​ ដូចជា​បទល្មើស​ទំនិញ​រត់ពន្ធ និងគេចពន្ធគ្រប់​ប្រភេទ,បទល្មើសធនធានធម្មជាតិ​ ដូចជា​រ៉ែមាស, ត្បូង និងធ្យូថ្ម,បទល្មើសជលផល​,បទល្មើស​ទំនិញ​ខូចគុណភាព​ និងមានសារធាតុគីមី,បទល្មើសឱសថខូចគុណភាព និងខុសច្បាប់,និង បទល្មើសសម្អាតប្រាក់ជាដើម។

លោកឧត្តមសេនីយ៍ឯក ក៏បាន​ផ្តាំផ្ញើ​ដល់សិក្ខាកាមទាំងអស់ ឲ្យខិតខំយកចិត្ត​ទុកដាក់​ស្តាប់​គ្រូឧទ្ទេសនាមពន្យល់ ហើយធ្វើការឲ្យបានផុសផុល ​សំដៅស្វែងយល់ឲ្យកាន់តែច្បាស់ និងស៊ីជម្រៅ ដើម្បីចែករំលែកនូវបទពិសោធន៍គ្នាទៅវិញទៅមក ​សម្រាប់ជាប្រយោជន៍ដល់ការអនុវត្តជាក់ស្តែង។ លោក សង្ឃឹមយ៉ាងមុតមាំថា ​ពេលត្រឡប់ទៅអង្គភាពវិញ កងកម្លាំងក្នុងផែនប្រឆាំងបទល្មើស​សេដ្ឋកិច្ច នឹងបន្តខិតខំប្រឹងប្រែងក្នុងបេសកម្មរបស់ខ្លួន ​ឲ្យបានខ្លាំងក្លាបន្ថែមទៀត ដើម្បី​សម្រេច​ឲ្យបាននូវទិសដៅភារកិច្ចការងាររបស់អង្គភាពខ្លួននីមួយៗ ស្របទៅតាមការកែទម្រង់របស់​អគ្គ​ស្នងការដ្ឋានគរបាលជាតិ​ ក្រសួងមហាផ្ទៃ ក៏ដូចជារាជរដ្ឋាភិបាលនោះ៕អត្ថបទ៖ បាន ចក់