សៀមរាប៖ របាយការណ៍គណៈកម្មាធិការគ្រោះមហន្ដរាយខេត្ដសៀមរាប ចេញផ្សាយថា ពីថ្ងៃទី​១៧-២៨ ខែកញ្ញា ឆ្នាំ២០២២ ជំនន់ទឹកភ្លៀងក្នុងខេត្ត បណ្តាលឱ្យមានផលប៉ះពាល់​ប្រជាពលរដ្ឋ ២៥.០៣១គ្រួសារ ភូមិចំនួន៣១៤ភូមិ ឃុំចំនួន ៦១ នៃស្រុកចំនួន៩ រួមមាន៖ ស្រុកស្រីស្នំ ស្រុកក្រឡាញ់ ស្រុកជីក្រែង ស្រុកអង្គរជុំ ស្រុកវ៉ារិន ស្រុកពួក ស្រុកសូទ្រនិគម ស្រុកប្រាសាទបាគង និងស្រុកអង្គរធំ។

របាយការណ៍ បន្តថា គ្រោះធម្មជាតិនេះ ​បានបង្កឱ្យមានផលប៉ះពាល់ និងការខូចខាត​ដំណាំ​ស្រូវ​ប្រជាពលរដ្ឋ ៣២ .៦៥៣ហិកតា ដែលស្មើរ២៣៥៧៨គ្រួសារ ដំឡូងមី ៤៦២៦ហិកតា ដែលស្មើរនឹង​៣៦២៦គ្រួសារ ​ព្រមទាំងហេដ្ឋារចនាសម្ព័ន្ធផ្លូវ និងសត្វចិញ្ចឹមផងដែរ៕