សៀមរាប៖ ស្ថិតក្នុងស្ថានភាពប្រឈម អាជ្ញាធរជាតិអប្សរា បានក្រើនរំលឹកដល់ប្រជាពលរដ្ឋ និងភ្ញៀវទេសចរឱ្យមានការប្រុងប្រយ័ត្នខ្ពស់ ក្នុងដំណើរចូលទៅកម្សាន្តក្នុងរមណីយដ្ឋានអង្គរ ជា​ពិសេស ពេលមានភ្លៀងធ្លាក់ខ្លាំងត្រូវនៅឱ្យឆ្ងាយពីដើមឈើធំៗ កុំជ្រក ឬចតយានយន្តក្រោម​ដើមឈើ ដើម្បីជៀសវាងពីគ្រោះថ្នាក់ជាយថាហេតុណាមួយ។

ការអំពាវនាវនេះ បានធ្វើឡើងក្រោយពេល​មាន​គ្រោះធម្មជាតិ​ បណ្ដាល​ឱ្យ​រលំ​ដើមឈើ​នៅក្នុងតំបន់​រមណីយដ្ឋានអង្គរ ​បានរលំបណ្ដាលឱ្យប៉ះពាល់​ដល់ស្ដ្រីម្នាក់រងរបួសស្រាល កាលពីថ្ងៃទី២៨ ខែកញ្ញា ឆ្នាំ២០២២នេះ។

អាជ្ញាធរជាតិអប្សរា ​បានឱ្យដឹងថា ក្នុងស្ថានភាព​អាកាស​ធាតុ​ទូ​ទៅ​នៅក្នុងព្រះរាជាណាចក្រកម្ពុជា ដែល​កំពុងស្ថិតក្នុងរដូវវស្សាដែលមានភ្លៀងធ្លាក់ជាច្រើន ព្រមទាំងសម្ពាធទាបដែលរងឥទ្ធិពល​ពី​ខ្យល់ព្យុះផ្សេងៗ​ធ្វើឱ្យមានភ្លៀងធ្លាក់លើសពីធម្មតា​ និង​មាន​ខ្យល់​ដែល​មានកម្លាំងល្បឿនខ្លាំង។ ករណីនេះ ​ធ្វើឱ្យរមណីយដ្ឋានអង្គរក៏ទទួល​បាន​ទឹកភ្លៀងក្នុងកំរិតខ្ពស់បណ្តាល​ឱ្យ​ដី​មានភាព​ទន់ជ្រាយ ​និងរងទទួលនូវ​ខ្យល់​កន្ត្រាក់​បក់បោកយ៉ាងខ្លាំង​ បណ្តាលឱ្យមានដើមឈើមួយ​ចំនួន​បាន​ដួលរលំជាបន្តបន្ទាប់​ ព្រមទាំងបង្កផលប៉ះពាល់​ដល់ប្រាង្គប្រាសាទ ​សុវត្ថិភាពរបស់ប្រជាពលរដ្ឋ និង​ភ្ញៀវទេសចរទាំងឡាយដែលឆ្លងកាត់ ​និងចូលទៅទស្សនាក្នុងរមណីយដ្ឋានអង្គរ។

ជាក់ស្ដែងកាលពីម្សិលមិញនេះ ដើមឈើមួយដើមបានដួលរលំ ​ដោយសារភ្លៀងខ្យល់ គួបផ្សំ​ដីជ្រាយ ​បានបណ្ដាលឱ្យស្រ្ដីម្នាក់​បានរងរបួសស្រាល ខណៈដែលរូបគាត់​បានធ្វើដំណើរ​តាម​ផ្លូវ​ហ្សាដឺហ្គោល​ ក្នុងក្រុងសៀមរាប ។ ​បច្ចុប្បន្នកម្លាំងជំនាញ​នៃអាជ្ញាធរជាតិអប្សរា បាន​ចុះមកកាត់​ដើមឈើនោះចេញ​ដើម្បីសម្រួលចរាចរណ៍៕