កំពត៖ បន្ទាប់ពីបានបើករយៈពេលប្រមាណ ៣៤ម៉ោងរួចមក នៅព្រឹកថ្ងៃទី២៩ ខែកញ្ញា នេះ ក្រុមហ៊ុនស៊ីណូហាយដ្រូកំចាយ ​បានបិទទ្វារទឹកទំបន់វារីអគ្គិសនីវិញហើយ បន្ទាប់ពីទឹក​អាងស្រក​ចុះបន្តិចវិញ។ អាកាសធាតុមិនល្អ ​នៅគ្របដណ្ដប់ក្រុងកំពតនៅឡើយ ដោយមានភ្លៀង​រលឹម​ជា​ញឹកញាប់។

ប្រធានមន្ទីររ៉ែ និងថាមពល ខេត្តកំពត លោក សោម វិចិត្រ បានឲ្យដឹងថា ក្រុមហ៊ុនស៊ីណូហាយដ្រូ បានរាយការណ៍មកថា នៅម៉ោង១០ ព្រឹកថ្ងៃនេះ ​កម្ពស់ទឹកក្នុងអាងស្តុក​ នៃទំនប់វារីអគ្គិសនីកំចាយ​ស្រកមកត្រឹម ១៤៨.៨៤ម៉ែត្រ ខណៈរំហូរចូលអាង ២៧៥.៩ម៉ែត្រត្រីគុណ ​ក្នុងមួយវិនាទី ហើយ​ក្រុមហ៊ុន​បានបិទទ្វារទឹកទំនប់វារីអគ្គិសនីវិញហើយ។

មកដល់ពេលនេះ ​តាមការពិនិត្យជាក់ស្តែង អាកាសធាតុនៅក្នុងក្រុងកំពត មិនទាន់ល្អប្រសើរ​នៅ​ឡើយទេ គឺនៅមាន​ភ្លៀងរលឹមជា​ញឹកញាប់​ ឯកការប្រកបរបរប្រចាំថ្ងៃរបស់​ពលរដ្ឋដំណើរ​ការ​តាម​ប្រក្រតី ខណៈដែលការងារនេសាទ ​ក៏បាននឹងកំពុងប្រព្រឹត្តទៅដោយប្រុងប្រយ័ត្នខ្ពស់ដែរ ។

យ៉ាងណាក៏ដោយ រដ្ឋបាលខេត្ត បន្តណែនាំដល់ក្រុមហ៊ុនស៊ីណូដ្រូហាយដ្រូ មន្ត្រីជំនាញ ​ពាក់ព័ន្ធ ត្រូវបន្តពិនិត្យតាមដានដោយយកចិត្តទុកដាក់ចំពោះបញ្ហាអាកាសធាតុ ​និងកម្ពស់ទឹក ដោយសារ​ប្រទេស​ជិតខាង កំពុងទទួលរងឥទ្ធិពលព្យុះទីហ្វុង​ ណូរុ ជាពិសេស​ ប្រជានេសាទ ត្រូវបន្ថែមការ​ប្រុងប្រយ័ត្ន ​ដោយកុំចេញទៅនេសាទឆ្ងាយៗពេក៕ អត្ថបទ៖ អន សារឹម