ព្រះវិហារ៖ ឯកឧត្តមអភិបាលខេត្តព្រះវិហារ​ បាន​ណែ​នាំដល់​មន្ត្រី​ទាំងអស់​ សូមកុំអោយ​មាន​វប្បធម៌​អន្តរាគមន៍​ក្នុង​រឿង​តែងតាំង​មន្ត្រី​ឱ្យ​សោះ ក្នុងនោះ​ដែរ​ឯកឧត្តម ក៏​ប្រកាសមិនយកលុយ ក្នុង​ការ​តែងតាំង​មន្រ្តីនៅរដ្ឋបាលខេត្តព្រះវិហារ ​ដើម្បី​លើកទឹកចិត្តដល់មន្ត្រីដែលមានសមត្ថភាព។

ឯកឧត្តម គីម រិទ្ធី ​បាន​ជម្រុញបន្ថែមដល់មន្ដ្រីរដ្ឋបាលខេត្តព្រះវិហារទាំងអស់ ត្រូវ​អនុវត្តការងារ​របស់​ខ្លួនជាបន្តទៀត ជាពិសេសត្រូវរួមគ្នារខិតខំ ​ដោះស្រាយការងារដែល​នៅ​សេសសល់ ​បន្តចុះ​ផ្សព្វ​ផ្សាយ​ការ​ការចាក់វ៉ាក់សាំងកូវីដ-១៩ ដូសទី៣ ទី៤ ទី៥ ជូនប្រជាពលរដ្ឋ​ឲ្យ​បានឆាប់រហ័ស និង​បន្តចុះសួរសុខទុក្ខបងប្អូនប្រជាពលរដ្ឋនៅតាមមូលដ្ឋាន ។

ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ ថ្លែងបែបនេះ នៅ​រសៀលថ្ងៃទី២៨ ខែកញ្ញា ម្សិលមិញនេះ ក្នុងឱកាសបើកកិច្ចប្រជុំប្រចាំខែកញ្ញាឆ្នាំ២០២២ និងមានការ​អញ្ជើញ​ចូលរួម​ពីសំណាក់ឯកឧត្តម លោកជំទាវ ជាអភិបាលរងខេត្ត កងកម្លាំងទាំង៣ មន្ទីរអង្គភាពជុំវិញខេត្ត អភិបាលក្រុងស្រុកមន្ត្រីសាលាខេត្តជាច្រើនរូបផងដែរ។

​ឯកឧត្តម គីម រិទ្ធី ​ក៏​បាន​ថ្លែងកោតសរសើរ​និង​វាយតម្លៃខ្ពស់​ចំពោះកិច្ច​ខិតខំ​ប្រឹងប្រែង​របស់​ថ្នាក់ដឹកនាំ ​និង​មន្ត្រី​រាជការ​ទាំង​អស់​នាពេល​កន្លងមក។

សូមបញ្ជាក់ថា កិច្ចប្រជុំប្រចាំខែកញ្ញាឆ្នាំ២០២២ របស់រដ្ឋបាលខេត្តនាឱកាសនោះ ពិភាក្សាអំពី វេទិការសាធារណផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ ឆ្នាំ២០២២ បូកសរុបលទ្ធផលការងារឆមាសទីមួយឆ្នាំ២០២២​ នៃការអនុវត្តកម្មវិធីឧបត្ថម្ភសាច់ប្រាក់ អត្តសញ្ញាណកម្មជនពិការភាព​ និងគម្រោងគាំទ្រការចាក់វ៉ាក់សាំងកូវីដ១៩។

ពិភាក្សាទៅលើផលប៉ះពាល់ ដោយសារជំនន់ទឹកភ្លៀងព្រមទាំងការងារបង្កបង្កើនផល ស្រូវវស្សានិងដំណាំផ្សេងៗ ក្នុងឆ្នាំ២០២២។

ការងារគ្រប់គ្រងសុវត្ថិភាពចរាចរណ៍ផ្លូវគោក ព្រមទាំងការងារ អភិរក្សធនធានធម្មជាតិ ការងារ​គ្រប់គ្រងដីសម្បទានសេដ្ឋកិច្ច ​ដីសម្បទានសង្គមកិច្ច ដីសម្បទានធនធានរ៉ែ ​និងការស្នើសុំ ដី​សម្បទានសង្គមកិច្ចរបស់កម្លាំងយោធា ​និងការងារចុះបញ្ជីដីរដ្ឋ ការចុះបញ្ជីដី ជាលក្ខណៈប្រព័ន្ធ ព្រមទាំងការដោះស្រាយបញ្ហាជម្លោះដីធ្លីក្នុងភូមិសាស្ត្រខេត្តព្រះវិហារ។អំពីការរៀបចំ​ប្លង់​គោលអភិវឌ្ឍន៍ក្រុង និងរបាយការណ៍អំពីការរៀបចំភូមិធម្មជាតិ សម្តេចតេជោ ហ៊ុន សែន នៅស្រុកជាំក្សាន្ត ។ អំពីការរៀបចំផ្ទះអតីតយុទ្ធជន​ ការត្រៀមប្រឡង​ មធ្យមសិក្សាទុតិយភូមិ ឆ្នាំ២០២២ និងបញ្ញាផ្សេងៗ ជាច្រើនទៀត៕ អត្ថបទ៖ សាវី