ភ្នំពេញ ៖ ឯកឧត្តម បណ្ឌិត សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនាបានអៈអាងថា សមិទ្ធផលវិស័យសាសនា វត្តអារាមបានកើនឡើងចំនួន៥.១០៤វត្ត ដំណើរការបានល្អប្រសើរ ក៏ដោយសារសុខសន្តិភាពកំពុងតែមានពេញបរិបូរណ៍នៅកម្ពុជា។

​ការថ្លែងរបស់ឯកឧត្តម បណ្ឌិត សេង សុមុនី យ៉ាងដូច្នេះ ក្នុងសន្និសីទសារព័ត៌មាន ស្តីពីសមិទ្ធផលសម្រេចបានរយៈពេល៥ឆ្នាំកន្លងមក របស់ក្រសួងធម្មការ និងសាសនា, ដែលរៀបចំដោយអង្គភាពអ្នកនាំពាក្យរាជដ្ឋាភិបាល, នារសៀលថ្ងៃទី២៩ ខែកញ្ញា ឆ្នាំ២០២២នេះ នៅទីសី្តការគណៈរដ្ឋមន្រី្ត។

ឯកឧត្តម បណ្ឌិត បានលើកឡើងទៀតថា ព្រះសង្ឃ ទាំងពីរគណៈ គឺគណៈមហានិកាយ និងគណៈធម្មយុតិ្ត បានកើនឡើងមកដល់សព្វថ្ងៃមានចំនួន៧០.៩០០អង្គ ក្នុងនោះមហានិកាយ មានចំនួន៦៨.៤៧៦អង្គ។ ទាក់ទិននឹងបញ្ហាព្រះសង្ឃនេះ ក្នុងវិបតិ្តកូវីដ-១៩ បានប្រគេនវ៉ាក់សាំងបង្ការជំងឺកូវីដ-១៩ ដោយរាជរដ្ឋាភិបាល បានផ្តល់ជូននូវវ៉ាក់សាំងកូវីដ-១៩ ប្រគេនព្រះសង្ឃ បានចំនួន៦៤.៨៦៤អង្គ ស្មើនឹង៩៣% ហើយព្រះសង្ឃ រងផលប៉ះពាល់ដោយសារមេរោគកូវីដ-១៩ មានចំនួន១២៤៥អង្គ និងសុគត១៦អង្គ និងជាសៈស្បើយ មានចំនួន១២៣៣អង្គ។ អាស្រមស្ថានរបស់ព្រះពុទ្ធសាសនា មានចំនួន១៤៤កន្លែង មណ្ឌលវិបស្សនាធុរ មានចំនួន១៤៤កន្លែង អាចារ្យ អាចារិនីខ្មែរ មានចំនួន១៥.១២៤រូប គណៈកម្មការវត្តនៅទូទាំងប្រទេស មានចំនួន៣៧.០០០រូប ហើយតាជី ស្នាក់នៅក្នុងវត្តអារាម មានចំនួន៩៩៥៣រូប យាយជី មានចំនួន៣០៦៣រូប សិស្ស-និសិ្សត ស្នាក់នៅតាមវត្តអារាម នៅទូទាំងព្រះរាជាណាចក្រកម្ពុជា មានចំនួន៧៧៨៥រូប ក្នុងនោះមានក្មេងកំព្រា មានចំនួន២២០១រូប និងជនគ្មានទីពឹង មានចំនួន៥៨៨រូប ដែលកំពុងស្នាក់នៅតាមវត្ត និងប្រជាពុទ្ធបរិស័ទ គោរពប្រតិបត្តិមានចំនួន៩៥%។

ឯកឧត្តម បណ្ឌិត សេង សុមុនី បានបញ្ជាក់ទៀតថា ក្នុងដំណាក់កាលជាប្រវតិ្តសាស្រ្តដែលកម្ពុជា បានជួបប្រទះ គឺជំងឺកូវីដ-១៩ បានធ្វើឲ្យប៉ះពាល់ដល់សកលលោកទាំងមូល មិនថាតែកម្ពុជាទេ ក្នុងនោះវិស័យសាសនារងផលប៉ះពាល់យ៉ាងធ្ងន់ធ្ងរផងដែរ។ ប៉ុន្តែអ្វីដែលជាមោទនភាពធំបំផុត គឺរាជរដ្ឋាភិបាល ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា ជាប្រមុខដឹកនាំដ៏ឈ្លាសវៃ បានធ្វើឲ្យស្ថានភាពនេះ ធូរស្រាល និងទទួលបានជោគជ័យ។ ជាងនេះទៅទៀតក្រសួង បានទទួល និងអនុវត្តន៍នូវសកម្មភាពរបស់ខ្លួនក្នុងការទប់ស្កាត់ ការពារ និងបញ្ជៀសជំងឺកូវីដ-១៩យ៉ាងសកម្ម ជាមួយរាជរដ្ឋាភិបាល។ ដំណើរការនៃការវិវត្តន៍ទៅរបស់រាជរដ្ឋាភិបាលក្នុងឆ្នាំ២០២២នេះ ទាក់ទងនឹងអាស៊ាន ដែលកម្ពុជា ធ្វើជាប្រធានដឹកនាំអាស៊ាន រាជរដ្ឋាភិបាលខិតខំប្រឹងប្រែង ដែលដំណើរការនេះជាថ្មីមួយបន្ថែមទៀត ដែលក្រសួងធម្មការ និងសាសនា បានកំពុងរៀបចំដំណើរការកម្មវិធីអមសសរស្តម្ភរបស់អាស៊ានទាក់ទងនឹងកិច្ចការសាសនា ដែលក្រសួងនឹងប្រារព្ធធ្វើឡើងនាចុងខែតុលា ឆ្នាំ២០២២នេះ និងវឌ្ឍនភាពមួយថ្មីបន្ថែមទៀត ដែលយើងបានមើលឃើញថាទោះបីជាមានស្ថានភាពវិបតិ្តដោយសង្រ្គាមនៅបណ្តាប្រទេសមួយចំនួនក្នុងតំបន់អឺរ៉ុបកី្ត ក៏វិស័យសាសនានៅតែមានដំណើរការយ៉ាងល្អប្រសើរ៕​អត្ថបទ ៖ រដ្ឋា