សហរដ្ឋអាមេរិក៖ កាលពីថ្ងៃពុធម្សិលមិញ សហរដ្ឋអាមេរិកបានធ្វើការព្រមានចិនពីទង្វើអរិភាពមកលើហ្វីលីពីន និងកោះតៃវ៉ាន់ ដោយពួកគេរំឭកទីក្រុងប៉េកាំងពីកាតព្វកិច្ចទីក្រុងវ៉ាស៊ីនតោន មានចំពោះប្រទេសដៃគូរបស់ខ្លួន។
អ្នកនាំពាក្យក្រសួងការបរទេសសហរដ្ឋអាមេរិក លោក ណេដ ប្រាយ បាននិយាយប្រាប់ក្រុមអ្នកសារព័ត៌មានថា ការវាយប្រហារដោយប្រដាប់អាវុធ ទៅលើកងកម្លាំងប្រដាប់អាវុធហ្វីលីពីន នាវា ឬយន្តហោះសាធារណៈនៅក្នុងមហាសមុទ្រប៉ាស៊ីហ្វិក ដែលរួមទាំងសមុទ្រចិនខាងត្បូងនឹងជំរុញឲ្យមានកាតព្វកិច្ចរបស់ទីក្រុងវ៉ាស៊ីនតោន ក្រោមសន្ធិសញ្ញាការពារជាតិទៅវិញទៅមកសហរដ្ឋអាមេរិក-ហ្វីលីពីន។ លោក ប្រាយ បាននិយាយថា ពួកយើងចែករំលែកក្តីកង្វល់សម្ព័ន្ធមិត្តហ្វីលីពីនរបស់ពួកយើង ពាក់ព័ន្ធនឹងការកៀងគដូចបានរាយការណ៍ របស់កងជីវពលសមុទ្រប្រជាមានិតចិននៅជិតតំបន់ប៉ប្រះទឹកវីតស៊ុន។ គួរឲ្យដឹងថា ទូកចិនជាង ២០០គ្រឿងត្រូវបានគេប្រទះឃើញដំបូងកាលពីថ្ងៃទី៧ ខែមីនាកន្លងទៅនៅតំបន់ថ្មប៉ប្រះទឹកវីតស៊ុន ដែលមានចម្ងាយប្រហែល ៣២០គីឡូម៉ែត្រភាគខាងលិចកោះប៉ាឡាវ៉ាន់ ស្ថិតនៅក្នុងសមុទ្រជម្លោះចិនខាងត្បូង ថ្វីត្បិតតែចាប់តាំងពីពេលនោះមក ទូកជាច្រើនធ្វើដំណើរទៅកាន់តំបន់កោះប្រាតលីក៏ដោយ។
ចិនដែលប្រកាសគ្រប់គ្រងស្ទើរតែទាំងអស់ សមុទ្រសម្បូរធនធានមួយនេះ បានច្រានចោលការតវ៉ាអស់រយៈពេលជាច្រើនសប្ដាហ៍របស់ហ្វីលីពីន ទាមទារឲ្យដកទូកទាំងនេះចេញ ដោយទីក្រុងម៉ានីលអះអាងថា ពួកគេបានចូលដែនទឹកក្នុងតំបន់សេដ្ឋកិច្ចពិសេសរបស់ខ្លួន។ ខណៈពេលនោះដែរ ភាពតានតឹងបានកើតឡើងជាមួយកោះតៃវ៉ាន់ ដែលទីក្រុងប៉េកាំងចាត់ទុកថាជាខេត្តរបស់ចិន ក្រោយពួកគេរាយការណ៍ថា យន្តហោះជាង ១០គ្រឿងរបស់ចិនដីគោក បានហោះចូលតំបន់ការពារដែនអាកាសរបស់កោះមួយនេះ៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
