ភ្នំពេញ៖ ដើម្បីបង្ការគ្រោះថ្នាក់ចរាចរណ៍ ​ដែលអាចកើតឡើងជាយថាហេតុ ក្នុងពេលធ្វើដំណើរតាមផ្លូវល្បឿនលឿនភ្នំពេញ-ព្រះសីហនុ ដែលត្រូវសម្ពោធដាក់ប្រើប្រាស់ នៅថ្ងៃទី១ខែតុលាស្អែកនេះ មន្រ្តីជំនាញនៃក្រសួងសាធារណការ និងដឹកជញ្ជូន បានរម្លឹក​ពលរដ្ឋត្រូវយល់ដឹងពីលក្ខខណ្ឌនៃបើកបរលើដងផ្លូវ ​និងជាពិសេសហាមបត់បញ្ច្រាសទិស។

មានប្រសាសន៍ប្រាប់BTV នៅថ្ងៃទី៣០ខែកញ្ញានេះ លោក ហ៊ាង សុទ្ធាយុត្តិ អ្នកនាំពាក្យ​ក្រសួងសាធារណការ និងដឹកជញ្ជូន ​បានអំពាវនាវដល់ប្រជាពលរដ្ឋមុន ​សម្រេចចិត្តធ្វើដំណើរ តាមផ្លូវល្បឿនលឿនភ្នំពេញ-ព្រះសីហនុ ត្រូវគោរពតាមការណែនាំ​របស់ក្រសួង​ ដែលមានដូចជា៖ត្រូវចេញ-ចូលតាមច្រកទាំង៨កន្លែង ​ដែលមានស្ថានីយពីភ្នំពេញរហូតដល់ខេត្តព្រះសីហនុ ត្រូវ​គោរពល្បឿនបើកបរ ​និងហាមបត់បញ្ច្រាសទិសជាដើម។

ពលរដ្ឋរស់នៅរាជធានីភ្នំពេញ បានបង្ហាញការសប្បាយចិត្ត ​និងអរគុណរាជរដ្ឋាភិបាល ដែល​បាន​កសាង​សមិទ្ធផល​​ផ្លូវល្បឿលឿនភ្នំពេញ-ព្រះសីហនុ ​ដំបូងគេនៅកម្ពុជា ដើម្បីជា​ប្រយោជន៍​ដល់ប្រជាពលរដ្ឋ និងប្រទេសជាតិ។លើសពីនេះ ពួកគាត់លើកពីគម្រោងធ្វើដំណើរតាម​ផ្លូវ​ល្បឿនលឿនផងដែរ។

ផ្លូវល្បឿនលឿនភ្នំពេញព្រះសីហនុ មានប្រវែងសរុប​ ១៨៧,០៥គីឡូម៉ែត្រ បានបើកការដ្ឋាន​សាងសង់​កាលពីថ្ងៃទី២២ ខែមីនា ឆ្នាំ២០១៩ ដែលតួផ្លូវមានទទឹង​ ២៤ម៉ែត្រ មាន ៤គន្លង (២ទៅ ២មក) ​និងគន្លងឈប់បន្ទាន់ (១ទៅ ១មក) ក្រាលបេតុងកៅស៊ូ (AC) តភ្ជាប់ពីរាជធានីភ្នំពេញ​ទៅ​ដល់សង្កាត់លេខ៣ ក្រុងព្រះសីហនុ ខេត្តព្រះសីហនុ ​ដោយឆ្លងកាត់ខេត្តកណ្តាល កំពង់ស្ពឺ និងខេត្តកោះកុង។ ផ្លូវនេះមានសួនច្បារខណ្ឌកណ្តាល​ មានផ្លូវបំបែកប្តូរទិស (Inter-Change) ភ្ជាប់​មកផ្លូវជាតិលេខ៤ ចំនួន ៦កន្លែងមានកន្លែងឈប់សម្រាក៣កន្លែង និងចំណតរថយន្ត១កន្លែង ៕ អត្ថបទ៖ទូច សោភ័ណ