ភ្នំពេញ៖ ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាល ​រាជធានីភ្នំពេញ ប្រាប់BTV ព័ត៌មាន នាថ្ងៃទី៣០ ខែកញ្ញានេះថា ប្រជាពលរដ្ឋរស់នៅក្នុងមូលដ្ឋានរាជធានីភ្នំពេញ គិតត្រឹម​ល្ងាច​ម្សិលមិញ​ថ្ងៃទី២៩ ខែកញ្ញា ឆ្នាំ២០២២ អាយុចាប់ពី១៨ឆ្នាំឡើង ​បានមកចាក់វ៉ាក់សាំងបង្ការជំងឺកូវីដ-១៩ ដូសជំរុញទី៣ ​បានចំនួន១,៥០៧,១៥៥នាក់ ស្មើនឹង១០៦.៦៨% នៃគោលដៅ ១,៤១២,៧៦៩នាក់។

ឯកឧត្តម វេជ្ជបណ្ឌិត ងី មានហេង បានបន្តថាសម្រាប់ប្រជាពលរដ្ឋ មកទទួលវ៉ាក់សាំងបង្ការជំងឺ​កូវីដ១៩ ដូសជំរុញទី៤ បានចំនួន១,១៥៥,៦៩៨នាក់ ស្មើនឹង៨១.៨០% និងដូសជំរុញទី៥ បានចំនួន១៧៧,១០៩នាក់ ស្មើនឹង១២.៥៤%។

ចំណែកលោកវេជ្ជបណ្ឌិត អ៊ុន សុភស្ត៍ ប្រធានមនី្ទរពេទ្យបង្អែកសម្តេចឪ ​សម្តេចម៉ែ ខណ្ឌឬស្សីកែវ រាជធានីភ្នំពេញ បានលើកឡើងថា ​កន្លងមកនេះទោះបីជាក្នុងពិធីបុណ្យកាន់បិណ្ឌ ភ្ជុំបិណ្ឌ គឺក្រុមការងារគ្រូពេទ្យ បានផ្តល់សេវាចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋ​ជា​រៀងរាល់​ថ្ងៃ មិនមានថ្ងៃណាមួយអាក់ខាននោះទេ។

ក្នុងនោះចំនួនប្រជាពលរដ្ឋមកចាក់វ៉ាក់សាំង ជាមធ្យម ក្នុងមួយថ្ងៃ ចន្លោះពី២០នាក់ ទៅ៤០នាក់ ក៏សូមអំពាវនាវដល់សាធារណជនដែលមិនទាន់បានមកទទួលចាក់វ៉ាក់សាំងកូវីដ-១៩ ដូសដំបូង និងមិនទាន់ចាក់វ៉ាក់សាំងកូវីដ-១៩ គ្រប់ដូស ​សូមអញ្ជើញមកទទួលវ៉ាក់សាំងឲ្យបានគ្រប់​ដូស​នៅមនី្ទរពេទ្យបង្អែកសម្តេចឪ ​សម្តេចម៉ែ រៀងរាល់ថ្ងៃ ព្រឹកម៉ោង៨ រសៀលម៉ោង២ ទាំងថ្ងៃសៅរ៍ ថ្ងៃអាទិត្យ និងថ្ងៃបុណ្យ ​ហើយក្រៅពីមនី្ទរពេទ្យបង្អែកសម្តេចឪ សម្តេចម៉ែ យើងក៏មានទីតាំង​មណ្ឌល​សុខភាពមនី្ទរពេទ្យបង្អែកជាតិក្នុងរាជធានីភ្នំពេញ ​មានជាង៤០ទីតាំងទៀត សូមអញ្ជើញ​មកចាក់វ៉ាក់សាំងកូវីដ-១៩ ដើម្បីការពារ ​ការចម្លងវីរុសកូវីដ១៩ និងបង្កើនភាពស៊ាំក្នុងសហគមន៍ ដើម្បីឲ្យសហគមន៍មានសុខភាពល្អ។

ទន្ទឹមនឹងនោះបងប្អូនប្រជាពលរដ្ឋ និងអាណាព្យាបាលបាននាំកូនមកទទួលសេវាចាក់​វ៉ាក់សាំង​កូវីដ-១៩ ​ពីក្រុមការងារគ្រូពេទ្យនៃមនី្ទរពេទ្យបង្អែកសម្តេចឪ ​សម្តេចម៉ែ បានលើកឡើងស្រដៀង​គ្នាថា​ ការចាក់វ៉ាក់សាំងបង្ការជំងឺកូវីដ-១៩ ​ពិតជាមានសារៈសំខាន់ខ្លាំងណាស់ ជារនាំងសម្រាប់​ការពារសុខភាពកុំឲ្យឆ្លងមេរោគកូវីដ-១៩ ​ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត ​គិតគូរពីសុខភាពរបស់បងប្អូនប្រជាពលរដ្ឋ រកវិធីសាស្រ្តល្អៗ នាំយកវ៉ាក់សាំង​កូវីដ១៩ ល្អៗ ​មកចាក់ជូនប្រជាពលរដ្ឋ ​ដើម្បីជៀសផុតពីជំងឺដ៏កាចសាហាវនេះ។

លោកប្រធានមនី្ទរពេទ្យបង្អែកសម្តេចឪ ​សម្តេចម៉ែ បានបញ្ជាក់ផងដែរថា ក្រៅពីការងារផ្តល់​វ៉ាក់សាំង​បង្ការជំងឺកូវីដ-១៩ ជូនប្រជាពលរដ្ឋ ​គឺមនី្ទរពេទ្យបង្អែក ​មានផ្តល់សេវាសុខាភិបាល ដូចជា​ពិនិត្យ ពិគ្រោះជំងឺទូទៅ ជំងឺទឹកនោមផ្អែម ជំងឺលើសសម្ពាធឈាម ជំងឺកាមរោគ ​ជំងឺរបេង ជំងឺអេដស៍​ និងជំងឺជាច្រើនផ្សេងទៀត។

ដូច្នេះសូមអញ្ជើញបងប្អូនប្រជាពលរដ្ឋដែលមានបញ្ហាសុខភាព សូមមកទទួលសេវាសុខាភិបាល​ក្នុង​មនី្ទរពេទ្យបង្អែក ​ទន្ទឹមនោះបើបងប្អូនប្រជាពលរដ្ឋ មានសុខភាពល្អហើយនោះ សូមបន្តយក​ចិត្តទុកដាក់ និងតាមដានត្រួតពិនិត្យសុខភាពរបស់ខ្លួន ដើម្បីចង់ដឹងកម្រិតសុខភាព និង​ស្ថានភាព​សុខភាព ស្ថិតក្នុងកម្រិតណា ដោយហេតុថាក្នុងមនី្ទរពេទ្យបង្អែករបស់យើង មានក្រុម​គ្រូពេទ្យជំនាញ ដើម្បីពិគ្រោះ ​និងផ្តល់យោបល់អំពីបញ្ហាសុខភាពផងដែរ៕អត្ថបទ រដ្ឋា