បន្ទាយមានជ័យ៖ ស្ថានភាពទឹកជំនន់នៅក្នុងតំបន់មួយចំនួន នៃខេត្តបន្ទាយមានជ័យ បានចាប់ផ្ដើម​ស្រកហើយបណ្ដើរៗហើយ ប៉ុន្តែនៅតំបន់ខ្លះទៀត ដែលជាប់នឹងព្រំដែនថៃ ចាប់ផ្ដើមមានទឹកជំនន់លិចលង់ តែមិនទាន់ប៉ះពាល់អ្វីធ្ងន់ធ្ងរនោះទេ ហើយអាជ្ញាធរបានអំពាវនាវដល់ពលរដ្ឋសូមមានការប្រុងប្រយ័ត្ន ។ 

ក្នុងឱកាសចុះពិនិត្យស្ថានភាព និងនាំយកស្បៀងអាហារ ចែកជូនពលរដ្ឋរងគ្រោះដោយទឹកជំនន់ នៅស្រុកភ្នំស្រុក នៅថ្ងៃទី៣០ ខែកញ្ញា ឆ្នាំ២០២២ ឯកឧត្តម អ៊ុ រាត្រី អភិបាលខេត្តបន្ទាយមានជ័យ មានប្រសាសន៍ថា ស្រុកមួយចំនួន មានស្រុកព្រះនេត្រព្រះ និងស្រុកភ្នំស្រុកជាដើម ទឹកបានស្រកជាបណ្ដើរៗ ដោយសារប្រភពខាងលើ ដែលហូរមកពីខេត្តឧត្តរមានជ័យនោះ ពុំមានភ្លៀងធ្លាក់បន្ត ដែលធ្វើឲ្យកន្លែង​ខ្លះបានស្រកជាង១តឹកក៏មាន និងរហូតដល់ជិត ១ម៉ែត្រ ។

ឯកឧត្តមបានបន្តថា ដោយសារទឹកជំនន់ ហូរមកពីប្រទេសថៃ ក្នុងរយៈពេល២ថ្ងៃមកនេះ បានធ្វើឲ្យជន់លិចផងដែរ នៅស្រុកមួយចំនួន ដែលជាប់នឹងព្រំដែនថៃ មានស្រុកអូរជ្រៅ ស្រុកថ្មពួក និងក្រុងប៉ោយប៉ែត ដោយទឹកជំនន់នេះ មិនមែនកើតឡើងដោយសារបាក់ទំនប់ពីប្រទេសថៃនោះទេ គឺមកពីបញ្ហាជំនន់ទឹកភ្លៀងប៉ុណ្ណោះ ។

ឯកឧត្តម អ៊ុ រាត្រី បញ្ហាគ្រោះទឹកជំនន់ នៅខេត្តបន្ទាយមានជ័យនេះ បានប៉ះពាល់ពលរដ្ឋចំនួនជាង ៧ពាន់គ្រួសារ ដោយបច្ចុប្បន្ន មានពលរដ្ឋជាង ១០០គ្រួសារ ត្រូវបានជម្លៀងទៅកាន់ទីទួលមានសុវត្ថិភាព។

គួរបញ្ជាក់ថា ខេត្តបន្ទាយមានជ័យ ក្រៅពីក្រុងប៉ោយប៉ែត កំពុងរងការជន់លិច ក៏នៅមានក្រុង ស្រុកមួយចំនួន កំពុងរងគ្រោះនូវបញ្ហាដូចគ្នានេះផងដែរ ក្នុងនោះមានក្រុងសិរីសោភ័ណ ស្រុកមង្គលបូរី ស្រុកម៉ាឡៃ ស្រុកភ្នំស្រុក និងស្រុកព្រះនេត្រព្រះ ៕​ អត្ថបទ ៖ ឧត្ដម