​ភ្នំពេញ៖ ជា​ការ​ចូលរួម​ក្នុងការ​ប្រយុទ្ធប្រឆាំង​ជំងឺ​កូ​វីដ​-១៩ ជាមួយ​រាជរដ្ឋាភិបាល​កម្ពុជា ក្រុមហ៊ុន Smart Axiata តាមរយៈ​មូលនិធិ​ទឹកប្រាក់​១​លាន​ដុល្លារ ដើម្បី​ប្រឆាំង​កូ​វីដ​១៩ របស់​ខ្លួន​បាន​ជួយ​គាំទ្រ​ដល់​មជ្ឈមណ្ឌល​ចាក់​វ៉ាក់សាំង​បន្ទាន់​ចំនួន ១៤ កន្លែង​នៅ​ភ្នំពេញ​។​

​​ជាការ​ធានា​ឲ្យ​បាន​នូវ​ប្រសិទ្ធិភាព និង​ភាព​ឆាប់រហ័ស​នៃ​ប្រតិបត្តិ​ការចាក់​វ៉ាក់សាំង​ប្រឆាំង​ជំងឺ​កូ​វីដ​១៩ នៅ​រាជធានី​ភ្នំពេញ ក្រុមហ៊ុន Smart Axiata បាន​សហការ​ជាមួយ ក្រសួង​ប្រៃសណីយ៍ និង​ទូរគមនាគមន៍ បាន​គាំទ្រ​សាលា​រាជធានី​ភ្នំពេញ​ក្នុង​ការ​រៀបចំ​ និង​បង្កើត​មជ្ឈមណ្ឌល​ចាក់​វ៉ាក់សាំង​បន្ទាន់​ចំនួន ១៤ កន្លែង​នៅ​ជុំវិញ​រាជធានី​។

មជ្ឈមណ្ឌល​ចាក់​វ៉ាក់សាំង​ចំនួន ១៤កន្លែង នឹងមាន​សមត្ថភាព​អាច​ផ្ដល់​វ៉ាក់សាំង​ដល់​មនុស្ស​ចំនួន ៤,២០០​នាក់ ​ក្នុង​មួយថ្ងៃ​ដោយ​ប្រើប្រាស់​វ៉ាក់សាំង​ស៊ី​ណូ​វ៉ា​ក់ (Sinovac) ចំនួន ១,៥ លាន​ដូ​ស ដែល​ទទួលបាន​ពី​ប្រទេស​ចិន​កាលពី​សប្តាហ៍​មុន​។​

​ក្រុមហ៊ុន Smart បាន​ប្រមូល​ថវិកា​សង្គ្រោះបន្ទាន់​ពី​មូលនិធិ​ទឹកប្រាក់ ១លាន​ដុល្លារ ដើម្បី​ប្រឆាំង​ជំងឺ​កូ​វីដ ១៩ របស់ខ្លួន ដើម្បី​បំពាក់​មជ្ឈមណ្ឌល​នីមួយៗ​នូវ តង់ តុ កៅអី ឧបករណ៍​ស្វ័យប្រវត្តិ​ម៉ាស៊ីន​លាងដៃ អាល់កុល​លាងដៃ ម៉ាស់ និង​ភេសជ្ជៈ​ជាដើម​។

​នាយក​ប្រតិបត្តិ​ក្រុមហ៊ុន Smart Axiata លោក ថូ​ម៉ាស ហ៊ុន (Thomas Hundt) បាន​មានប្រសាសន៍ថា​៖ «​ការបន្ត​រីក​រាលដាល​នៃ​ជំងឺ​កូ​វីដ​១៩ នៅ​ពាសពេញ​ប្រទេស​កម្ពុជា​ គឺជា​ក្ដីបារម្ភ​ដ៏​ធំ​មួយ សម្រាប់​យើងទាំងអស់គ្នា​និង​គូសបញ្ជាក់​ពី​ភាព​បន្ទាន់​នៃ​ប្រតិបត្តិ​ការចាក់​វ៉ាក់សាំង​ឲ្យ​បាន​លឿន​បំផុត​តាម​ដែល​អាចធ្វើ​ទៅបាន​។

យើង​បាន​ប្រមូលយក​ថវិកា​ពី​មូលនិធិ​ប្រឆាំង​វីរុស​កូ​វីដ-១៩ របស់​យើង ដើម្បី​ឆ្លើយតប​តម្រូវការ​បន្ទាន់ របស់​មជ្ឈមណ្ឌល​ចាក់​វ៉ាក់សាំង​ក្នុងស្រុក ដែល​អាច​ការពារ​ពល​រដ្ឋ​ក្នុង​សហគមន៍​របស់​ពួកគេ ដោយ​មិន​ចាំបាច់​ធ្វើដំណើរ​ទៅ​ទីតាំង​ឆ្ងាយ ដែល​អាច​បង្ក​ហានិភ័យ​ផ្ទាល់ខ្លួន​។​»

​​មជ្ឈមណ្ឌល​ចាក់​វ៉ាក់សាំង​ទាំងអស់ ដែល​រួចរាល់​និង​ផ្ដើម​ប្រតិបត្តិការ​ពីថ្ងៃ​ច័ន្ទ ថ្ងៃទី​៥ ខែមេសា មាន​ទីតាំង​នៅតាម​សាលារៀន និង​មណ្ឌល​សុខភាព​ដូចជា​៖ សាលាបឋមសិក្សា​សំពៅ​មាស វិទ្យាល័យ​ហ៊ុន សែន ​ប៊ុនរ៉ានី​វត្តភ្នំ​ពេញ វិទ្យាល័យ​ទួល​ទំពូង វិទ្យាល័យ​បឹង​កេងកង វិទ្យាល័យ​ជាស៊ីម​សន្ធរម៉ុក សាលាបឋមសិក្សា​វត្ត​សន្សំ​កុសល សាលាបឋមសិក្សា​បឹង​ឈូក​ប្រជុំ​វង្ស ផ្សារ OCIC សាលាបឋមសិក្សា​ឬ​ស្សី​កែវ មណ្ឌល​សុខភាព​ភ្នំពេញ​ថ្មី សាលាបឋមសិក្សា​ជម្ពូ​វ័ន មណ្ឌល​សុខភាព​គោក​រកា មណ្ឌល​សុខភាព​ពងទឹក និង​វិទ្យាល័យ​កំបូល​។

​​មូលនិធិ​ទឹកប្រាក់ ១ លាន​ដុល្លារ ដើម្បី​ប្រឆាំង​វីរុស​កូ​វីដ-១៩ របស់​ក្រុមហ៊ុន Smart Axiata ត្រូវបាន​បង្កើតឡើង​កាលពី​ឆ្នាំមុន និង​រហូតមក​ដល់ពេលនេះ ​មូលនិធិ​បានផ្ដល់​ជំនួយ​ដល់​អង្គការ និង​គម្រោង​ចំនួន​ជាង ១២ ដែល​កំពុង​គាំទ្រ​ដល់​ភាព​ធន់​នៃ​សហគមន៍​អំឡុងពេល​ការ​ប្រឈម​នៃ​ជំងឺ​រាតត្បាត​ជា​សកល​នេះ​៕ ​អត្ថបទ​៖​ គឹម ​ហុក

​