សៀវភៅ «សទ្ទានុក្រមពាក្យន័យដូច» គឺជាស្នាដៃអក្សរសាស្រ្តខ្មែរថ្មីមួយទៀត ដែលត្រូវ​បាន​សិក្សា​ស្រាវជ្រាវ ចងក្រង ដោយសាស្រ្តាចារ្យអក្សរសាស្រ្តខ្មែរ នៃដេប៉ាតឺម៉ង់អក្សរសាស្រ្តខ្មែរ និង​ដេប៉ាតឺម៉ង់​ភាសាវិទ្យា ដែលចេញផ្សាយតាមរយៈមហាវិទ្យាល័យសង្គមសាស្ត្រ-មនុស្ស​សាស្ត្រ​ នៃ​សាកលវិទ្យាល័យ​ភូមិន្ទភ្នំពេញ ដោយមាន​ការ​ជួយគាំទ្រ​ថវិកា​បោះពុម្ព​ផ្សាយ​ដោយ​អគ្គិសនី​កម្ពុជា​។

វណ្ណកម្មអក្សរសាស្រ្តខ្មែរមួយក្បាលនេះបានរំលេចមេពាក្យ និងបញ្ជាក់ន័យពាក្យចំនួន ១៣៥៦ ពាក្យ ដែលត្រូវបានសិក្សាស្រាវជ្រាវ និងរៀប​រៀង​ចង​ក្រង​យ៉ាង​យក​ចិត្ត​ទុក​ដាក់​ពី​គណៈកម្មការ​និពន្ធ ៦ រូប រួមមាន៖ លោកបណ្ឌិត អ៊ុន លាង ព្រឹទ្ធបុរសនៃមហាវិទ្យាល័យសង្គមសាស្ត្រ-មនុស្ស​សាស្រ្ត លោកស្រីសាស្ត្រាចារ្យ វ៉ា សោភា លោកសាស្ត្រាចារ្យ ចាន់ វឌ្ឍនា លោកសាស្ត្រាចារ្យ ឆាន់ គឹមសឿន លោកសាស្ត្រាចារ្យ គេន រង្សី លោកសាស្ត្រាចារ្យ សំ អេងលាង ព្រមទាំង​មាន​ការ​សម្រប​សម្រួលដោយលោកស្រីបណ្ឌិត កែវ ច័ន្ទវុទ្ធី ព្រឹទ្ធបុរសរង នៃមហាវិទ្យាល័យសង្គមសាស្ត្រ-មនុស្សសាស្ត្រ។

គណៈកម្មការនិពន្ធសៀវភៅ សទ្ទានុក្រមពាក្យន័យដូច រំពឹងថាសៀវភៅ​មួយ​ក្បាល​នេះ​នឹង​ផ្ដល់​ប្រយោជន៍​ជា​ច្រើនដល់គ្រប់មជ្ឈដ្ឋានអ្នកសិក្សា និងស្រាវជ្រាវភាសាខ្មែរ និងអ្នកប្រើ​ប្រាស់​ពាក្យ​ខ្មែរ ដើម្បីឈ្វេងយល់ពីភាសាខ្មែរឱ្យកាន់តែស៊ីជម្រៅជាងមុន៕