ភ្នំពេញ៖ លោកវេជ្ជបណ្ឌិត ស៊ឹម ស៊ូយេង អនុប្រធានប្រតិបត្តិសមាគមTYDA ទទួល​បន្ទុក​បេសកកម្មសាលារៀន ​បានលើកឡើងថា​ ឯកឧត្តម ហ៊ុន ម៉ាណែត និង លោកជំទាវ ពេជ ចន្ទមុន្នី ប្រធានអនុប្រធានក្រុមប្រឹក្សាភិបាល តែងតែយកចិត្តទុកដាក់យ៉ាងខ្លាំង​ក្នុងការ​សុខុមាលភាព​របស់ប្រជាពលរដ្ឋ ​។

លោកវេជ្ជបណ្ឌិត ស៊ឹម ស៊ូយេង បានបន្ថែមទៀតថា ការថែទាំសុខភាពបឋម និងសុខភាពមាត់​ធ្មេញ​មានសារៈសំខាន់ណាស់ ​ដែលតម្រូវឱ្យមានចូលរួមទាំងអស់គ្នា ព្រោះនៅពេលដែលសុខភាពមាត់​ធ្មេញរឹងមាំ សុខភាពទូទៅកាន់តែល្អប្រសើរ ​ហើយរាង្គកាយរឹងមាំ នោះក្មួយៗមករៀនសូត្រ​បាន​ទៀងទាត់ ដែលនឹងឱ្យលទ្ធផលសិក្សាបានល្អ។

លោកវេជ្ជបណ្ឌិតក៏បញ្ជាក់ថា រហូតមកដល់សព្វថ្ងៃនេះ TYDA មានអាយុ១០ឆ្នាំហើយ ដោយមានសមាជិកជាង ៨ពាន់នាក់ ហើយក្នុងរយៈពេល១០ឆ្នាំនេះ TYDA បានព្យាបាល​ជំងឺទូទាំងប្រទេសបានជាង ៣៥ម៉ឺននាក់ ​ហើយអ្នកជំងឺធ្ងន់ធ្ងរចំនួនជាង​ ៦ពាន់នាក់ ត្រូវបាន​សមាគមបញ្ចូនមកព្យាបាលបន្តនៅរាជធានីភ្នំពេញ ​និងជាមួយដៃគូរសហការនានា ក្នុងនោះ​អ្នកជំងឺបេះដូងធ្ងន់ធ្ងរចំនួន ៥៨នាក់ បាន​បញ្ចូនមក និង វះកាត់ដោយជោគជ័យផងដែរ។

លោក ឯក ឃុនឌឿន អភិបាលនៃគណៈអភិបាលខណ្ឌឬស្សីកែវ បានគោរពថ្លែងអំណរគុណ​ឯកឧត្តម ហ៊ុន ម៉ាណែត និង លោកជំទាវ ពេជ ចន្ទមុន្នី ដែលបានបញ្ជូនក្រុមការងារនិង​កម្លាំង​ស្ម័គ្រចិត្តនៃសមាគមគ្រូពេទ្យស្ម័គ្រចិត្តយុវជនសម្តេចតេជោ “TYDA ” ព្យាបាល និងអប់រំសុខភាព​មាត់​ធ្មេញសិស្សានុសិស្សវិទ្យាល័យឬស្សីកែវ និងថ្លែងអំណរគុណយុវជនសមាគម អ.ម.ត យុវជនសសយក សប្បុរសជន លោក លោកស្រី មន្ត្រីសាលាខណ្ឌ លោកនាយកសាលា លោកគ្រូ អ្នកគ្រូ និងផ្នែកដែលពាក់ព័ន្ធ ដែលបានចូលរួមសហការ រៀបចំកម្មវិធីពិនិត្យជំងឺនាថ្ងៃនេះ។

សូមបញ្ជាក់ថា ក្រុមការងារនិងកម្លាំងស្ម័គ្រចិត្តនៃសមាគម TYDA ចំនួន៩៧នាក់ បានចុះ​ពិនិត្យ​ព្យាបាលជំងឺមាត់ធ្មេញ ​ជំងឺទូទៅ និងអប់រំ សុខភាពមាត់ធ្មេញ-សុខភាពទូទៅ​ ជូនក្មួយៗ​សិស្សានុសិស្ស ​និងលោកគ្រូ អ្នកគ្រូ នៅវិទ្យាល័យឬស្សីកែវ ​ ។ក្នុងនោះ ក៏​បាននាំយក​មកជាមួយនូវ​កញ្ចប់​ឃីតសម្រាប់ក្មួយៗ លោកគ្រូអ្នកគ្រូ ​និងអាណាព្យាបាលផងដែរ។ រួមមាន៖ ​មាន​សៀវភៅរូបសម្តេច ចំនួន ០២ក្បាល ប៊ិច ចំនួន ០២ដើម ជែលលាងដៃ ​០៥ដប ម៉ាស ចំនួន ២០ម៉ាស ច្រាសដុសធ្មេញ ០១​ និងជូនវិទ្យាល័យឬស្សីកែវ ជែលលាងដៃ ចំនួន១២០ដបធំ និងម៉ាស់ ចំនួន៥០០០ម៉ាស៕