​រុស្ស៊ី៖ ប្រធានាធិបតី​រុស្ស៊ី​លោក Vladimir Putin បាន​និយាយ​កាលពី​ថ្ងៃ​សុក្រ​ក្នុង​ពិធី​ចុះហត្ថលេខា​លើ​សន្ធិសញ្ញា ​ស្តីពី​ការ​ដាក់​បញ្ចូល​សាធារណរដ្ឋ​ប្រជាមានិត Lugansk និង Donetsk ព្រមទាំង​តំបន់ Kherson និង Zaporizhzhia ដែល​បាន​ប្រកាស​ឯករាជ្យ​ពី​អ៊ុយ​ក្រែ​ន​បញ្ចូល​ទៅ​ក្នុង​ប្រទេស​រុស្ស៊ី​ថា ទីក្រុង​មូ​ស្គូ​បាន​ត្រៀមខ្លួន​រួចជាស្រេច​សម្រាប់​ការចរចា​ជាមួយ​ទីក្រុង​គី​វ​។

​លោក​បាន​និយាយ​ថា យើង​អំពាវនាវ​ឱ្យ​របប​ទីក្រុង​គី​វ​បញ្ឈប់​អរិភាព​ទាំងអស់ បញ្ឈប់​សង្គ្រាម​ដែល​វា​បាន​ចាប់ផ្តើម​តាំងពី​ឆ្នាំ២០១៤ ហើយ​ត្រលប់​មក​រក​តុ​ចរចា​វិញ​។ លោក​និយាយ​ថា ទោះជា​យ៉ាង​ណា​ទីក្រុង​មូ​ស្គូ​នឹង​មិន «​ក្បត់​» ទឹកដី​ដែល​ចង់​ក្លាយ​ជា​ផ្នែក​មួយ​របស់​រុស្ស៊ី​នោះ​ទេ​។​ ​ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​ថ្លែង​សារជាថ្មី​កាលពី​ថ្ងៃ​សុក្រ​ថា ការសន្យា​របស់​លោក​នឹង​ដណ្តើម​យក​ទឹកដី​អ៊ុយ​ក្រែ​ន​ទាំងអស់​មកវិញ​ ដែល​រុស្ស៊ី​បាន​ចូល​កាន់កាប់​។

លោក​និយាយ​ថា «​ទឹកដី​ទាំងមូល​របស់​ប្រទេស​យើង​នឹង​ត្រូវ​បាន​រំដោះ​ពីស​ត្រូវ​មកវិញ​» ឆ្លើយតប​ទៅនឹង​ការ​អំពាវ​នាវ​ឱ្យមាន​ការចរចា​ពី​ប្រធានាធិបតី​រុស្ស៊ីលោក Vladimir Putin លោក Zelenskyy បាន​និយាយ​ថា «​យើង​ត្រៀមខ្លួន​រួចជាស្រេច​សម្រាប់​ការសន្ទនា​ជាមួយ​រុស្ស៊ី ប៉ុន្តែ​ជាមួយ​ប្រធានាធិបតី​រុស្ស៊ី​ផ្សេង​ទៀត​។ នៅ​ក្នុង​វីដេអូ​មួយ លោក Zelenskyy ត្រូវ​បាន​គេ​មើល​ឃើញ​ថា ​បាន​ចុះហត្ថលេខា​លើ​ពាក្យ​ស្នើសុំ​សម្រាប់​ការ​ពន្លឿន​ការ​ចូល​ជា​សមាជិក​អង្គការ NATO រួម​ជាមួយ​នាយករដ្ឋមន្ត្រី​អ៊ុយក្រែ​ន​លោក Denys Shmyhal៕

អត្ថបទ៖ ប៊ុនថន