ភ្នំពេញ៖ មន្ទីរពេទ្យកុមារជាតិសហការជាមួយអង្គការKOFIH នៅព្រឹកថ្ងៃទី០១ ខែតុលា ឆ្នាំ២០២២​នេះ បានរៀបចំសន្និសីទរោគកុមារលើកទី៤ ស្តីពីការផ្លាស់ប្ដូរបទពិសោធន៍នៃ​ការ​អភិវឌ្ឍគ្លីនិកក្នុង ការថែទាំ ​ព្យាបាលទារក​ និងកុមារ​ ដើម្បីបង្កើនសមត្ថភាពដល់គ្រូពេទ្យ សំដៅពង្រឹងគុណភាពសេវា​ថែទាំ ព្យាបាល ជូន ដល់កុមារប្រកបដោយសុវត្ថិភាព និងប្រសិទ្ធភាពខ្ពស់។

ឯកឧត្តមសាស្ត្រាចារ្យ ញឹប អង្គាបុស្ស នាយកមន្ទីរពេទ្យកុមារជាតិ បានឱ្យដឹងថា សន្និសីទនេះ មិនមែន គ្រាន់តែ​ជាការចែករំលែកពីវាគ្មិនល្បីៗ​នោះទេតែផ្ដោត​សំខាន់​លើការពិភាក្សាផ្លាស់ប្ដូរ​បទ​ពិសោធន៍ដែលបានអនុវត្ត ដើម្បីជួយពង្រឹងសមត្ថភាពកែលម្អចំណុចខ្វះខាត​គ្នាទៅវិញទៅមក ហើយក៏ជា​ការ​បង្កើត​ឱកាសឲ្យសិក្ខាកាមដែលបានទទួលការបណ្តុះបណ្តាល​ពីមន្ទីរពេទ្យកុមារជាតិ បានបង្ហាញពីវឌ្ឍនភាព​នៃសមត្ថភាពរបស់ខ្លួន ​ដែល​បានកំពុងយកចិត្តទុកដាក់ប្រឹងប្រែង​ពង្រឹង​គុណភាព​សេវាតាមស្ថាប័ន ដែលខ្លួន កំពុង មាន ទំនួលខុសត្រូវនិងការរក្សានូវវប្បធម៌ចែករំលែក​ជួយ​ជ្រោមជ្រែងគ្នាផងដែរ។ ទន្ទឹមនឹងនោះ ដើម្បីឆ្លើយតបទៅ នឹងយុទ្ធសាស្ត្ររបស់​ក្រសួង​សុខាភិបាល​ ក្នុងការពង្រឹងគុណភាព​សេវាថែទាំព្យាបាលជូនដល់ប្រជាពលរដ្ឋ ​ប្រកបដោយ​សុវត្ថិភាព និងប្រសិទ្ធភាពខ្ពស់។

ក្រសួងសុខាភិបាល បានផ្ដល់លទ្ធភាពនិងឱកាសឲ្យមន្ទីរពេទ្យកុមារជាតិចូលរួមយ៉ាងសកម្មក្នុង​ការវិវត្តន៍​គុណភាពសេវាកម្មសុខាភិបាល ​និងការពង្រឹងសមត្ថភាពរបស់​ បុគ្គលិកទាំង​ចំណេះដឹង​ជំនាញ​និង​ឥរិយាបថ​ប្រកប​ដោយ​ក្រមសីលធម៌​ វិជ្ជាជីវៈ រហូត​ក្លាយ​ជាគ្រូបង្គោល​ ថ្នាក់ជាតិជា​ពិសេស​បាន​ចូលរួមយ៉ាង​សកម្ម​ជំនួយ​ក្រសួងសុខាភិបាល​ ក្នុង​សកម្មភាព​ទប់ស្កាត់​ការឆ្លងរាល ដាល​នៃជំងឺកូវីដ-១៩កន្លងមក។

ទន្ទឹមគ្នានោះដែរលោក គីម សាំងយ៉ុន ប្រធានអង្គការKOFIHប្រចាំ នៅកម្ពុជា សង្ឃឹមថា តាមរយៈ សន្និសីទ​នេះ នឹងចូលរួមចំណែកក្នុងការបង្កើនជំនាញនិងចំណេះដឹងលើមុខវិជ្ជាគ្លីនិកផ្សេងៗ តាមរយៈការផ្លាស់ប្តូរបទពិសោធន៍គ្នាទៅវិញទៅមក ពិសេសសម្រាប់អ្នកជំនាញវេជ្ជសាស្ត្រវ័យក្មេង នេះជាឱកាសដ៏ល្អ ក្នុងការចាប់យកចំណេះដឹង ​និង​បច្ចុប្បន្នភាព​ទៅ​លើចំណេះដឹងរបស់ពួក​គេកាន់​តែប្រសើរថែមទៀត។

ឯកឧត្តមសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល បានសម្ដែងនូវមោទនភាព​ចំពោះ ថ្នាក់ដឹកនាំបុគ្គលិកទាំងអស់​ នៃមន្ទីរពេទ្យកុមារជាតិ​ដែលមានគំនិតផ្តួចផ្តើមថ្មីៗ​ ជាបន្ត បន្ទាប់​ពីមួយឆ្នាំទៅមួយឆ្នាំក្នុងការរៀបចំសន្និសីទឡើង ​ក្នុងការលើកកម្ពស់និងជំរុញការ​អភិវឌ្ឍ​វិជ្ជាជីវៈ បន្តសម្រាប់បុគ្គលិក សុខាភិបាល តាមរយៈការផ្លាស់ប្ដូរបទពិសោធន៍នៃការអនុវត្តន៍គ្លីនិក រវាងថ្នាក់ជាតិ និងថ្នាក់ខេត្ត ដើម្បីបង្កើនចំណេះដឹងនិងជំនាញគ្លីនិកក្នុងការផ្ដល់សេវា​សុខាភិបាល​ប្រកប​ដោយ​គុណភាព​ប្រសិទ្ធភាព៕ អត្ថបទ រដ្ឋា