ភ្នំពេញ៖ សហភាពសហព័ន្ធយុវជនកម្ពុជា ​ដោយមានកិច្ចសហការជាមួយ គណៈកម្មាធិការជាតិ​រៀបចំការប្រកួតកីឡាអាសីអាគ្នេយ៍ ​បានបើកយុទ្ធនាការBeyond THE GAMES នៅល្ងាចថ្ងៃទី ៣០ ខែកញ្ញាឆ្នាំ ២០២២។ ​យុទ្ធនាការនេះ ​មានគោលដៅមួយចំនួន ហើយក្នុងនោះក៏មានគោលដៅ​សំខាន់មួយ គឺការយកព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ដើម្បី​លើក​តម្កើង​ភាព​អស្ចារ្យ​របស់​កម្ពុជាទៅកាន់ពិភពលោកផងដែរ។

Beyond THE GAMES ដែលមានឈ្មោះជាភាសាខ្មែរថា ​លើសពីការប្រកួត ជាឈ្មោះយុទ្ធនាការថ្មី ដែលចាប់ផ្ដើមនៅពេលនេះរហូតដល់ក្រោយបញ្ចប់ព្រឹត្តិការណ៍កីឡាស៊ីហ្គេម និងអាស៊ាន​ប៉ារ៉ាហ្គេមឆ្នាំ ២០២៣។

ក្នុងឱកាសប្រកាសបើកយុទ្ធនាការនេះ ឯកឧត្តម សុខ សប្បាយណា ជាថ្នាក់ដឹកនាំមួយរូបមកពី សហភាព​សហព័ន្ធយុវជនកម្ពុជា លើកឡើងថា ​យុទ្ធនាការនេះ ​គឺមានគោលដៅសំខាន់ លើសពីការ​ប្រកួតចាញ់ឈ្នះ លើសពីការទទួលមេដាយ។

ឯកឧត្តម បញ្ជាក់ថា យុទ្ធនាការនេះ ​គឺផ្សារភ្ជាប់ជាមួយមហាជនទូទៅនូវ ​មនោសញ្ចេតនា និង​មោទកភាពនៃភាពជាខ្មែរ ទៅនឹងភាពជាម្ចាស់ផ្ទះរបស់ព្រះរាជាណាចក្រកម្ពុជា សម្រាប់​ព្រឹត្តិការណ៍​ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣។

ឯកឧត្តម បន្តថា ពួកយើងនឹងយកព្រឹត្តិការណ៍ស៊ីហ្គេម ​និងអាស៊ានប៉ារ៉ាហ្គេម ដើម្បីលើកតម្កើងកម្ពុជា។ លើកតម្កើងកម្ពុជាទាំងមូល តាមរយៈការបង្ហាញពីមុខមាត់ សុខសន្តិភាព សមត្ថភាព ឧត្តមភាព និងសក្តានុពលរបស់កម្ពុជា។ យើងផ្សារភ្ជាប់តម្លៃនៃការរៀបចំព្រឹត្តិការណ៍ស៊ីហ្គេម ជាមួយមោទកភាពនូវអ្វីដែល​កម្ពុជាមានក្នុង​នាម​ជាម្ចាស់ផ្ទះ និងរំលេចភាពសម្បូរសប្បាយ ការរីកចម្រើន វប្បធម៌ អរិយធម៌ និងមោទកភាពជាតិ ប្រកបដោយភាព​សុទិដ្ឋិនិយម ​ភាពជឿជាក់ និងក្តីសង្ឃឹមចំពោះអនាគតកម្ពុជា។ លើសពីនេះ ក៏ដើម្បីជំរុញឱ្យសាធារណជនស្វែងយល់បន្ថែមទៀត​ ហើយបន្សល់ទុកនូវស្មារតី និងចងចាំ​នូវ​អនុស្សាវរីយ៍​ល្អៗទាំងមុនអំឡុង ​និងក្រោយព្រឹត្តិការណ៍។

ក្នុងយុទ្ធនាការនេះ ក៏នឹងមានការរៀបចំនូវសកម្មភាពជាច្រើន ​ដែលទាមទារឱ្យប្រជាពលរដ្ឋកម្ពុជា ចូលរួមដើម្បីលើកកម្ពស់ផ្សព្វផ្សាយកម្ពុជាទៅកាន់ឆាកអន្តរជាតិ។

យុទ្ធនាការនេះ ធ្វើឡើងក្រោមមូលបទ​ «បេះដូងលោតក្នុងចង្វាក់តែមួយ - Hearts Beat in Sync»។ ជាមួយគ្នានេះ ​យុទ្ធនាការ#BeyondTheGames កំណត់យក «មោទកភាព, វប្បធម៌ សាមគ្គីភាព/ភាព​សុខដុម សន្តិភាព ​និងភាពជាម្ចាស់»ជាសារស្នូលសំខាន់បំផុតរបស់​យុទ្ធនាការ​ទៅកាន់សាធារណជនទូទៅដែលជាក្រុមគោលដៅ។

យុទ្ធនាការ #Beyond TheGames នឹងផ្សារភ្ជាប់ជាមួយសាធារណជនជាក្រុមគោលដៅ ទាំងមុន​ព្រឹត្តិការណ៍ អំឡុងពេលព្រឹត្តិការណ៍ ​និងក្រោយព្រឹត្តិការណ៍ ដែលនឹងធ្វើឡើងជាបួនដំណាក់កាល រួមមាន៖ ទី១-ការបញ្ចៀបការយល់ដឹង ទី២-ការកៀរគរការចូលរួម និងការគាំទ្រ ទី៣-ការបញ្ជាក់ពីភាពជោគជ័យនៃយុទ្ធនាកា និងទី៤-ការនាំយកនូវអនុស្សាវរីយ៍នៃយុទ្ធនាការ និងការបន្តនូវស្មារតីយុទ្ធនាការ៕ អត្ថបទ៖ គឹមហុក