ភ្នំពេញ ៖ នៅថ្ងៃទី២ នៃកិច្ចប្រជុំគណៈកម្មាធិការនយោបាយអន្តរសភាអាស៊ាន របស់មហាសន្និបាតអន្តរសភាអាសាន អាយប៉ា លើកទី៤១ ឯកឧត្តម ឈាង វុន បានជំរុញមេដឹកនាំសភាអាស៊ានត្រូវរក្សាសន្តិភាពជាកត្តាជំរុញដោះស្រាយបញ្ហាតំបន់ និងពិភពលោក ជាពិសេសបញ្ហាជំងឺកូវីដ១៩។
នាថ្ងៃទី ២ នៃមហាសន្និបាតអន្តរសភាអាស៊ាន អាយប៉ា លើកទី ៤១ ដែលសភាវៀតណាមធ្វើជាម្ចាស់ផ្ទះ នៅថ្ងៃទី៩ ខែកញ្ញា ឆ្នាំ២០២០នេះ ឯកឧត្ដម ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ បានដឹកនាំប្រតិភូគណៈកម្មាធិការនយោបាយកម្ពុជា ចូលរួមកិច្ចប្រជុំគណៈកម្មាធិការនយោបាយអន្តរសភាអាស៊ាន អាយប៉ា តាមរយៈប្រព័ន្ធវីដេអូ ដើម្បីពិភាក្សាគ្នាលើសេចក្ដីព្រាងសេចក្ដីសម្រេចស្ដីពី ការទូតសភាសម្រាប់សន្តិភាព និងសន្តិសុខប្រកបដោយចីរភាពក្នុងតំបន់អាស៊ាន។ ក្នុងកិច្ចប្រជុំនោះ ឯកឧត្តម បានលើកឡើងពីការគំរាមកំហែងនៃជំងឺរាតត្បាតសកលកូវីដ-១៩ និងការកើនឡើងនៃនិន្នាការឯកតោភាគីនិយម ការគាំពារនិយម សង្គ្រាមពាណិជ្ជកម្ម ការប្រកួតប្រជែងភូមិសាស្ត្រនយោបាយ ដែលកំពុងគំរាមកំហែងដល់សណ្ដាប់ធ្នាប់អន្តរជាតិ។
ឯកឧត្ដម ឈាង វុន បន្តថា បញ្ហាស្មុគស្មាញ ទាំងអស់នេះ គឺជាឧបសគ្គដល់ការរក្សាសន្តិភាព សន្តិសុខប្រកបដោយចីរភាព ដែលត្រូវការ ការយកចិត្តទុកដាក់ និងចូលរួមដោះស្រាយពីគ្រប់ប្រទេស និងភាគីពាក់ព័ន្ធទាំងអស់។ ឯកឧត្ដម បានគូសបញ្ជាក់ទៀតថា សភាកម្ពុជាសូមគាំទ្រ និងជំរុញការបន្តកិច្ចសន្ទនា កសាងទំនុកចិត្ត ស្វែងយល់គ្នាទៅវិញទៅមក ដើម្បីពង្រឹងទំនាក់ទំនង និងកិច្ចសហប្រតិបត្តិការ ក្នុងការផ្លាស់ប្ដូរទស្សនៈ បទពិសោធន៍ និងការអនុវត្តល្អៗ។
បន្ថែមលើសនេះ ឯកឧត្តម ឈាង វុន តំណាងសភាកម្ពុជា អះអាងថា នឹងជំរុញតួនាទីរបស់ការទូតសភាឲ្យកាន់តែពាក់ព័ន្ធ និងសកម្ម ដើម្បីគាំទ្រប្រព័ន្ធអន្តរជាតិផ្អែកលើគោលការណ៍ច្បាប់ជាតិ និងអន្តរជាតិ ស្របតាមគោលការណ៍ធម្មនុញ្ញអង្គការសហប្រជាជាតិ តាមរយៈការប្រើមធ្យោបាយសន្តិវិធីក្នុងការដោះស្រាយជម្លោះ ឬការមិនចុះសម្រុងគ្នានៅក្នុងតំបន់។
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
