ភ្នំពេញ៖ ដើម្បីកាត់បន្ថយការកកស្ទះចរាចរណ៍នៅស្ពានមុនីវង្ស សមត្ថកិច្ចចរាចរណ៍ខណ្ឌច្បារអំពៅ បានអំពាវនាវដល់ប្រជាពលរដ្ឋដែលធ្វើទៅផ្លូវជាតិលេខ១ អាចវាងទៅស្ពានព្រែកសំរោងបាន។
មានប្រសាសន៍ BTV នៅថ្ងៃទី០៨ ខែមេសានេះ លោក នង សុទ្ធ នាយករងផ្នែកសណ្ដាប់ធ្នាប់ចរាចរណ៍នៅខណ្ឌច្បារអំពៅ បានស្នើដល់ពលរដ្ឋធ្វើដំណើរទៅផ្លូវជាតិលេខ១ អាចវាងទៅតាមផ្លូវស្ពានព្រែកសំរោងបាន ខណៈស្ពានមុនីវង្សចាស់កំពុងជួសជួល។
លោកបន្តថា កំឡុងពេលជួសជុលស្ពានមុនីវង្សចាស់ មានពលរដ្ឋជាច្រើន បានធ្វើដំណើរតាមផ្លូវស្ពានមុនីវង្សថ្មី ជាហេតុធ្វើឱ្យមានកាកកស្ទុះចរាចរណ៍ បើទោះបីសមត្ថកិច្ចជួយសម្របសម្រួលក្តី។
ជាមួយគ្នានេះ ប្រជាពលរដ្ឋបានលើកឡើងដែរថា ការធ្វើដំណើរមកផ្សារអំពៅ ប្រើរយៈពេលយូរជាងមុន ព្រោះគេបិទស្ពានមុនីវង្សចាស់ និងស្ពានមុនីវង្សថ្មីមានគេជិះច្រើន ដូច្នេះពួកគាត់ស្នើរដល់អ្នកជួសជុលស្ពាន សូមពន្លឿនការជួសជុលឱ្យបានឆាប់តាមដែរអាចធ្វើទៅបាន។
បើតាមសេចក្តីជូនដំណឹងរបស់រដ្ឋបាលរាជធានីភ្នំពេញចេញផ្សាយនៅពេលថ្មីនេះ បានលើកឡើងថា កន្លងមករដ្ឋបាលរាជធានីភ្នំពេញធ្លាប់បានចេញសេចក្តីជូនដំណឹង ស្តីពី ការជួសជុលស្ពានព្រះមុនីវង្សចាស់ឆ្លងកាត់ទន្លេបាសាក់ ស្ថិតក្នុងភូមិសាស្ត្រខណ្ឌច្បារអំពៅ កាលពីថ្ងៃទី ២៧ ខែ មករា ឆ្នាំ២០២១ ដែលរហូតមកដល់ពេលនេះបានបញ្ចប់ការជួសជុលកម្រាលថ្មើរជើង បង្កាន់ដៃស្ពាន និងកំពុងរៀបចំផ្លាស់ ប្តូរបង្គោលភ្លើងបំភ្លឺផ្លូវចាស់ចេញ ដោយដំឡើងបង្គោលភ្លើងបំភ្លឺផ្លូវថ្មីជំនួសវិញ។
ចំពោះមុខនេះការដ្ឋាននឹងចាប់ផ្តើម ដំណើរការជួសជុលកម្រាលស្ពាន ដោយត្រូវកាយបកកៅស៊ូចាស់ចេញ រួចអ៊ុតកៅស៊ូថ្មី ដែលការងារនេះចាំបាច់ត្រូវបិទ ចរាចរលើស្ពានព្រះមុនីវង្សចាស់ជាបណ្ដោះអាសន្នរយៈពេល០៣ថ្ងៃ ចាប់ពីថ្ងៃទី ០៨ ខែ មេសាដល់ថ្ងៃទី១០ ខែ មេសា ឆ្នាំ២០២១។ផុតរយៈពេលនេះនឹងបើកចរាចរលើស្ពានព្រះមុនីវង្សចាស់ជាធម្មតាឡើងវិញ។ទន្ទឹមនឹងនេះ រដ្ឋបាល រាជធានីភ្នំពេញក៏សូមអំពាវនាវដល់បងប្អូនប្រជាពលរដ្ឋ ម្ចាស់រថយន្ត និងទោចក្រយានយន្តគ្រប់ប្រភេទ ដែលធ្វើចរាចរលើផ្លូវជាតិលេខ១ អាចពង្វាងចរាចរទៅផ្លូវក្រវ៉ាត់ក្រុងទី២ (ផ្លូវថៃហ្គ័រ) ដើម្បីចៀសវាងការកកស្ទះចរាចរនៅទីតាំងការដ្ឋានខាងលើផងដែរ៕ អត្ថបទ៖ ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
